II SAMWELI
Davidi ongoa ku misagu za lukuo lwa Saulo.
1
1 Kumbusa kwa lukuo lwa Saulo, gasubizie Davidi mu kwita baAmaleki, eikede bindi bibili ku Ziklagi. 2 Busi bw'isatu, muntu avule kutuka ku ido lya Saulo nu nsulu zage zatika, nu mukungu ku itoe lyage. Gaavule ku Davidi, agwede gansi nu kumukumbamina. 3 Davidi amubuzizie bunee: “Ukutuka kuni?”
Amwakwide bunee: “Natinine kutuka ku ido lya baIsraeli.”
4 Davidi amubuzizie lingo bunee: “Buni bwabede? Nsambalile misagu.”
Akwide bunee: “Bantu batinine kutuka ku bita, nu bantu beingi bakule, nu Saulo nu Yonatana, mwana wage, bakule.”
5 Davidi abuzizie wamusambalilaga misagu bunee: “Buni buwamenyine buno Saulo nu Yonatana, mwana wage, bakua?”
6 Wozo musikila wamusambalilaga amwakwide bunee: “Bunene bwane, ganabezagile gantata ga mwiduko wa Gilboa, Saulo agwelide ku isumo lyage nu tuyanga nu bakwenda ga farasi babezagile bwigi kumusanga. 7 Nu gaalolile kumbusa, ammonineko nu kummana. Nakwide bunee: ‘Nili gano.’ 8 Ambwide bunee: ‘Uwe u nazi?’ Namwakwide bunee: ‘Nne nili muAmaleki.’ 9 Ambwide bunee: ‘Emana bwigi na nne, unite, kubuno lubaba lwankata, nu mutima wane ukili na kalamo munda mwane.’
10 Ububo nendile bwigi nage, nu kumwita, kubuno namenyine nunse buno ntone kumbusa kwa kugoa. Natolile nkumbu za bukota zabezagile ku itoe lyage, nu mukotola wabezagile ku kuboko kwage, nabilusia gano ku mukota wane.”
11 Ububo Davidi akatile ku nsulu zage, nu azatile, nu bantu bansania babezaga gamozi nage bakitile bubo nu bo; 12 balilile nu kwikilizia. Bagilile idia aaba nu mwigolo, ku kabamba ka Saulo, nu ka Yonatana mwana wage nu k'iyombo lya Yehowa, nu numba za baIsraeli kubuno bakule na mwene wa nganda.
13 Davidi abuzizie musozi wa musagu bunee: “Ukutuka kuni?”
Akwide bunee: “Nne nili mwana wa mugeni, muAmaleki.”
14 Davidi amubuzizie bunee: “Kubuni ntwakule boba kwita mubongibwa wa Yehowa?” 15 Davidi amanine umozi wa bamulume, nu atendile bunee: “Mukunde nu mwite.” Amulibwide nu akule. 16 Davidi amubwide bunee: “Mikila zobe zibe g'itoe lyobe, kubuno kanua kobe kakulongekela gawatenda bunee: ‘Nitile mubongibwa wa Yehowa.’”
Davidi akulilila Saulo nu Yonatana.
17 Davidi alilide Saulo nu mwana wage Yonatana na malilo mamano, 18 nu akakizizie kwigisia baYuda idilo lya bunkanda nu lwasangilwe mu mukanda wa Yaseri:
19 “Lutanuno lwobe, ee Israeli, lweitilwe gantata ga mwiduko wobe.
Beiya magala bakindwa nunse.
20 Tamusambale ku Gati, tamubalanganie ku nzila za Askeloni;
Bakinga ba baFilistini banakivwa kubogaboga.
Bakinga ba batamonesibwa banakivwa kwisizia.
21 Inyuwe miduko za Gilboa takube mame aba mbula gantata geinyu,
Aba ku masoa ma tuyulo;
Kubuno kuko u kwisilwe ngabo za mwiya magala zanyagwa,
Ngabo za Saulo geteli kubongibwa makiti.
22 Mu kubasia mikila za beitilwe, nu manona ma beiya magala,
Bunkanda bwa Yonatana tabwakebetukile,
Nu mwene wa nganda wa Saulo tawasubizie bwasi.
23 Saulo nu Yonatana babezaga batundwa nu batananizizie mu kalamo kabo,
Nu mu lukuo tabalekanukibwa;
Basasizie kutinga ndiu, babezaga na magala kutinga kimbwe.
24 Inyuwe bakinga ba Israeli, mulilile Saulo,
Wamuvwalikizie busoga na nsulu zakisimana,
Walebizie nsulu zeinyu na olo.
25 Ee bwakule beya magala ku bita!
Yonatana eitilwe gantata ga mwiduko.
26 Mubuto wane Yonatana, nili na malima ku kabamba kobe;
Wantananizizie nunse.
Lutundo lwobe kundi lwabezaga lwakuganiagania,
Ee, lunene kutinga lutundo lwa bakikulu.
27 Ee beiya magala bagwede nunse,
Nu byuma bya bita binsania byakua!”