Lukuo lwa Saulo.
31
1 BaFilistini beitenne na baIsraeli nu baIsraeli batinine baFilistini. Beingi bagwede nu beitilwe mu mwiduko wa Gilboa. 2 BaFilistini bayangile Saulo nu bana bage bubibu. Beitile Yonatana nu Abinadabu nu Malki-Sua, bana ba Saulo. 3 Bita byabede bikali ku Saulo. Ndasa zalasile Saulo na musungu nu atambile nunse. 4 Saulo abwide mweki wa ngabo zage bunee: “Tikya mwene wobe, unite nago buno batamonesibwa banavwa kunsumita nu kunkitila bubi.” Tondo mukiti wage ananine kubuno akule boba nunse. Ububo Saulo atolile mwene wage, nu agwelide kugo. 5 Nu gamonine mweki wa ngabo zage buno Saulo akua, agwelide ku mwene wage; akule gamozi nage.
6 Ububo Saulo akule na bana bage basatu, mweki wage wa ngabo nu bantu bage bansania mu busi bumozi.
7 Nu gamonine baIsraeli beikalaga mu mpinga nu ku lisilya lya Yordani buno baIsraeli batina, nu Saulo nu bana bage bakua, basigile miino zabo nu batinine. Nu baFilistini bavule kwikala muzo.
8 Gakede busi, baFilistini bavule kutikya nsulu za babo bakule. Basangile kitumba kya Saulo nu bya bana bage basatu gantata ga mwiduko wa Gilboa. 9 Bamusesile itoe. Batikizye ngabo zage nu kuzisinga ku kisi kinsania kya baFilistini, kubalangania misagu mu numba za nkisi zabo, nu ku bantu. 10 Babikile ngabo zage mu numba za Astaroti. Baswikile kitumba kyage ku kitutu kya Beti-Sani. 11 Nu baYabesi-Gileadi bongule misagu zakitide baFilistini ku Saulo. 12 Mapuka mansania mazanzukile nu bendile mu kindi kutikya kitumba kya Saulo, nu bitumba bya bana bage ku kitutu kya Beti-Sani. Basubizie ku Yabesi nu babongezie bitumba byabo na bulago nu kubigisia. 13 Bayikile makwa mabo mu nsinda. Babayikile gansina muti wa mukwaju wa Yabesi. Bagilile kulia bindi mutubakamo.