RUTA
Lukuo lwa Elimeleki nu bana bage.
1
1 Mu nkiko za ngatu kwabede nzala za munganda mu kisi. Muntu umozi wa ku Betelehemu wa Yuda endile kwikala mu kisi kya Moabu, we nu mukazi wage nu basikila bage babili. 2 Izina lya wozo muntu lyabezaga Elimeleki, nu lya mukazi Naomi, nu ma basikila bage, Malona nu Kiliona. Babezaga baEfrata wa ku Betelehemu-Yuda. Babasile mu kisi kya Moabu nu beikede kuko. 3 Elimeleki, iba wa Naomi, akule nu Naomi asigede na basikila bage babili. 4 Basongile bakinga ba baMoabu. Umozi amanagwa Orupa nu ungo Ruta. Beikede kuko bwigi ku myaka ikumi. 5 Malona nu Kiliona bakule nubo, bobabili. Bubo Naomi akwilidwe n'iba nu basikila bage babili.
6 Kusila azanzukile, we nu bakamwana bage, kutuka ku kisi kya Moabu, kubuno ongule mu kisi kya Moabu buno Yehowa abaside bantu bage nu abakasile idia. 7 Ububo batukile mu kiziki kibabezaga mukyo, Naomi gamozi na bakamwana bage nu bendile ku nzila za kusubya ku kisi kya Yuda.
8 Naomi abwide bakamwana bage babili bunee: “Endazi, musubye nawe ku numba za nina. Yehowa amukitile mponga anga bumwakitide babo bakule nu nne. 9 Yehowa amukase bubobelelo nawe mu numba z'iba wage.” Abamumine ku matama nu balalukile n'idilo.
10 Nu bamubwide bunee: “Kilo, tukwenda nobe kweinyu.”
11 Naomi abakwide bunee: “Subyazi bakinga bane. Kubuni kumunenda na nne? Ndi mukili basikila mu nda zane buno babe beiba beinyu? 12 Bakinga bane, subyazi. Niseli mukungu, nsinasongwa lingo. Aba ndi ninatenda buno nili na kilemanizio nu nasongwa lelo nu lingo nabuta basikila, 13 ndi munabalindila bakule? Ndi muneikanda ku kabamba kabo buno tamusongwe na bango? Kilo, bakinga bane, ku kabamba keinyu nili na kabebe kakali nu lubaba kubuno kuboko kwa Yehowa kwansungizie.”
14 Nu balalukile lingo n'idilo, nu Orupa amumine ninabyala ku matama, tondo Ruta ntazigile kumusiga.
15 Naomi abwide bunee: “Lola, nyokobyala Orupa asubya kwabo nu ku tulaga twage. Subya nu uwe, uyange nyokobyala.”
16 Ruta akwide bunee: “Ntunsindike buno nikusige aba nilekele kukuyanga. Kubuno kuwendage, nende ko nu nne; nu kuwikalage, nikale ko nu nne. Bantu bobe babe bantu bane nu Kalaga wobe abe Kalaga wane. 17 Kuukakwila, nkakwila ko, nu u kunkayikilwa. Yehowa ansungie na lusungio lukali ndi nakusiga geteli lukuo; lukuo umpanga u lukatulekanukya.”
18 Gamonine Naomi buno Ruta eikokomezia kwenda nage, ntamwakwide lingo bungo. 19 Bendile bobabili aaba nu babasile ku Betelehemu. Gabeingide mu mwino wa Betelehemu, bantu bansania ba mu mwino baganineganine nabo nu babuzizie bunee: “Ndi Naomi wono?”
20 Nu ababwide bunee: “Tamummane lingo Naomi. Mummane Mara kubuno Mwiya Mayombo a ambabazia bubibu nunse. 21 Nendile nakuka tondo Yehowa ansubya maboko bwasi. Kubuni kumukummana Naomi nu Yehowa es'andola ko na lusombo. We, Mwiya Mayombo, ansungia.”
22 Ububo, Naomi asubizie na Ruta muMoabu, mukamwana wage. Batukile ku kisi kya Moabu nu babasile ku Betelehemu mu kulinga kwa matubulo ma mumpunge wa shayiri.