1 SAMWELI
1
1 Kwabezaga muntu umozi wa ku Ramataimu-Zufumu mu tukililo twa kisi kya Efuraimu, izina lyage Elkana, mwana wa Yerohamu, mwana wa Elihu, mwana wa Tohu, mwana wa Zufu muEfuraimu. 2 Abezaga na bakikulu babili, izina lya umozi Hana nu lya ungo Penina. Penina abutile bana, tondo Hana ntabutaga. 3 Mwaka na mwaka, wozo muntu atukaga ku mwino wage nu kubakama ku Silo, kukumbamina nu kukasana tuyulo ku Yehowa Mwiya Mayombo. Bana babili ba Eli, Hofuni nu Finehasi, babezaga basankoga ba Yehowa gago. 4 Mu busi bwa kukasana kayulo kage, Elkana akasaga byindi ku Penina mukazi wage nu ku bana bage bansania, bamulume nu bamukazi, 5 tondo akasaga Hana kyindi kimozi kigezye na bibili kubuno amwelamaga nu Yehowa abezaga amubika mugumba. 6 Munyage n'iyali amwililikile buno amwongie bwamubikile Yehowa mugumba. 7 Mu myaka insania bwabede bubo gabakamaga Hana ku numba za Yehowa Penina amwililikaga; ububo nu Hana alilaga nu ntaliaga.
8 Elkana, iba wage, amubwide bunee: “Hana, kyukulilila? Nu kubuni ntukulia? Kubuni uli na kabebe? Ndi nsyatinga bana bamulume bobe ikumi ku busoga bunikukukitilaga?”
9 Gabasilile kulia nu kunua mu Silo, Hana azanzukile. Nu Eli abezaga eikala ga kisumbi bwigi n'iyango lya mwingilo wa numba za Yehowa. 10 Hana abede na kabebe kakali mu mutima nu asegile ku Yehowa na bisozi bingi. 11 Alumbide bunee: “Ee Yehowa Mwiya Mayombo, ndi lebelebe wamona ku kabebe ka mukiti wobe, wankengela nu ntwibilile mukiti wobe, nu ndi wankasa mwana wamulume, nti namukasane ku Yehowa bindi binsania bya kalamo kage, nu kakengo takakatinga ku itoe lyage.”
12 Nu gitide kusega nunse lwabusio lwa Yehowa, Eli alolaga ku kanua kage, 13 nu Hana atengagia milomo tugu nu iyuki talyungubagwako nu Eli akengede buno akatwa na maku. 14 Eli amubwide bunee: “Bulebi bwobe bwasile nkungu nkizi? Sila bulebi bwobe.”
15 Hana amwakwide bunee: “Ta bubo, mukota wane; nili tugu mukikulu uli na kabebe kakali mu mutima. Nsyanune maku, aba makali aba meteli makali. Nalolesagia tugu mutima wane lwabusio lwa Yehowa. 16 Ukengele buno mukiti wobe eli mugazanga; kabebe nu lubaba u byantendagia bubo aaba nu kano kaluma.”
17 Eli amulagile bunee: “Enda na bubobelelo nu Kalaga wa Israeli akukase anga biwamusegile.”
18 Hana abwide bunee: “Mukiti wobe amone mponga ku meiso mobe.” Nu mukikulu wozo eiyendede nu alide nu kilungi kyage takyabede lingo na kabebe.
19 Bayukile lukesikesi nu bakumbaminne Yehowa kusila basubizie ku numba zabo ku Rama. Elkana amenyine Hana, mukazi wage, nu Yehowa amukengede. 20 Hana ekile iyimi, nu gakukile bindi, abutile mwana wamulume. Amwinikile izina lya Samweli, bwisulilwa buli bunee: “Namusegile ku Yehowa.”
21 Elkana abakamine na bansania ba numba zage kukasana kayulo ka mwaka ku Yehowa nu kuliga kilumbilo kyage. 22 Tondo Hana ntabakamine kubuno atendile iba wage bunee: “Kungwa mwana agila mabele, namweke kuko nu abase lwabusio lwa Yehowa nu kwikala kuko bindi binsania.”
23 Iba wage Elkana amwakwide bunee: “Kita buukukengela buli busoga. Sigala aaba nu gaagile mabele. Tugu Yehowa azindilizie iyuki lyage.” Mukikulu asigede nu amomezie mwana wage aaba nu gaagilile mabele.
24 Gagilile mwana mabele, Hana abakamine nage nu endile na mulume wa ngombe wa myaka isatu nu nkindi za bunga bwa ngano nu idega lya maku. Amubasizie ku numba za Yehowa ku Silo, nu mwana abezaga eikili mukeke. 25 Basesile ngombe nu babasizie mwana ku Eli. 26 Hana abwide bunee: “Mukota wane, mutima wobe ulame; nne u wozo mukikulu wemanaga gano bwigi nobe kusega ku Yehowa. 27 Nasegile mwana wono nu Yehowa ankasile bunamusegile. 28 Ububo nkumukasana ku Yehowa; akasanwe ku Yehowa bindi binsania bya kalamo kage.” Ububo bakumbaminne Yehowa gago.