Lwimbo lwa Hana.
2
1 Hana nu we asegile bunee: “Mutima wane ukubogaboga na Yehowa;
Magala mane masakikwa mu Yehowa.
Kanua kane kalimbuka ku basombi bane,
Kubuno nabogaboga mu lonio lwobe.
2 Takuli ungo wasililila anga Yehowa,
Takuli ungo gantata gobe,
Ee, takuli lwanda anga Kalaga weitu.
3 Tamutalike moki meinyu,
Tamutende na lwikotio,
Kubuno Yehowa eli Kalaga wa menge
Nu We akulindikaga makitilo.
4 Mankanda ma mapuka makalika,
Nu babo bakukikitanwa balindibwa bibunda byabo na magala.
5 Babo babezaga bembuka bese bakitila bango kumona idia.
Tondo bakuaga na nzala tabeli nazo lingo.
Mugumba abuta bana mutubakamo,
Nu mwiya bana beingi akutwa.
6 Yehowa akwita nu akulamia.
Akugezia ku nsinda nu akuyukya.
7 Yehowa akuzambia nu akugumia,
Akusigulizia nu akusakika.
8 Akusakika bazambi kutuka ku mukungu,
Akuzanzula bakwiyanina kutuka ku iyala,
Kubeikazia gamozi na mitonge.
Nu akubeiyania kisumbi kya lutanuno,
Kubuno, Yehowa eli na mango ma kisi,
Nu gantatamo u gaabika kisi.
9 Akulanga masindi ma beisanana bage,
Tondo bagi beikazibwa kibibi mu kapilo.
Kubuno muntu ntakukinda na magala mage wenyene.
10 Babo bakulwana na Yehowa bakekwe byindi byindi,
Kutuka mwigulu akabakema na mukulumino.
Yehowa akwatula ndenge za kisi,
Nu akukasa mukota wage magala,
Nu akusakika magala ma mubongibwa wage.”
11 Elkana asubizie kwage ku numba ku Rama. Tondo mwana akitide Yehowa lwabusio lwa Eli sankoga.
Bwagi bwa bana ba Eli
12 Bana ba Eli babezaga migazanga, tabanzile Yehowa. 13 Lukita lwa basankoga ku bantu lwabezaga buno ndi muntu akukasana kayulo, nu ndi nyama zise zabiluka mu nyungu, nti mukiti wa sankoga avwa na nkanya zakumbama mu kuboko, 14 nu azitobaga na magala mu nyungu za lukita na lukita zibayikaga muzo. Na musuna unsania wekagwa ku nkanya nti sankoga agutola. U bubakitaga ku baIsraeli bansania bavule kuko ku Silo. 15 Lingo lwabusio lwa kugisia manona, mukiti wa sankoga avwaga kutenda ku wozo ukukasana kayulo bunee: “Kasa sankoga nyama za kulanga. Ntakate kuguli zayikwa tondo mbisi tugu.”
16 Nu ndi muntu wozo amwakula bunee: “Lindila manona magisibwe tanga, nu kusila wakate anga buukutunda,” nti mukiti atenda bunee: “Ta bubo, ukunkasa kano kaluma. Ndi ta bubo, nkuzikata na magala.” 17 Ku bubo bantu babengaga tuyulo twa Yehowa, ububo bwagi bwa babo basikila bwabezaga bunene lwabusio lwa Yehowa.
18 Gabezaga Samweli eikili mwana, akitilaga Yehowa nu avwalaga nsulu za mpeku zamanagwa efodi. 19 Na mwaka na mwaka, nina amulukilaga nsulu nkeke za gantata nu amwendelaga nazo gaabakamaga n'iba wage kukasana kayulo ka mwaka. 20 Eli akasile Elkana nu mukazi wage mponga. Atendile bunee: “Yehowa akukase bana na wono mukikulu ga kiziki kya wozo u wakasenne ku Yehowa.” Nu basubizie kwabo. 21 Ububo Yehowa akengede Hana nu ekile meimi nu abutile bana basatu bamulume nu babili bamukazi. Nu mwana Samweli akulile lwabusio lwa Yehowa.
22 Eli abezaga mukungu nunse. Ongule bunsania bwakitilaga basikila bage ku baIsraeli, nu bubakitile butazi na bakikulu bakundamanaga ga mwingilo wa numba za musanganano. 23 Nu abatendile bunee: “Kubuni kumukukita bitondo bibino? Kubuno nkungwa ku misako zeinyu mibi ku bantu bansania. 24 Ta bubo, basikila bane. Misagu zinkungwa kuzo ta misoga, mukubigia bantu ba Yehowa. 25 Ndi muntu agila ungo muntu, Kalaga akamusungia, tondo ndi muntu agila Yehowa, nazi unamutendela?” Tondo tabongule iyuki ly'isibo kubuno Yehowa atundile kubeita.
26 Nu mwana Samweli akulile, nu atananizizie Yehowa nu bantu.
27 Muntu wa Kalaga abaside Eli nu amubwide bunee: “Bubuno u bukutenda Yehowa bunee: ‘Ndi lebelebe nsidolesizie ku numba za so gababezaga bakobe mu Misri ku numba za Farao, 28 aba nu kumusombola mu bikanga binsania bya Israeli buno abe sankoga kundi, kubakama ku kasenga kane ka makozi, kugisia bulago nu kuvwala efodi lwabusio lwane? Nu ndi nsyakasile numba za so tuyulo tunsania twa kugisibwa na keiya twa bana ba Israeli? 29 Kubuni kumukubenga tuyulo twane nu bisansa binakakizizie bikitwe mu numba zane? Nu kubuni kuukukutya bana bobe kuntinga buno mwidundia na bisoga bya tuyulo twa bantu bane?’
30 Yehowa, Kalaga wa Israeli, akutenda bunee: ‘U kinsa natendile lebelebe buno ba numba zobe nu za so banatabangile lwabusio lwane bindi binsania,’ tondo kano kaluma Yehowa akutenda bunee: ‘Idagano lilino libe bulazi na nne! Kubuno bakunanza, nabanze, nu bakumbenga, babengwe. 31 Ungwilila, bindi bikuvwa ganasese kuboko kwobe nu kuboko kwa numba za so buno takwabe mukungu mu numba zobe. 32 Wamone kabebe mu numba zane mu busoga bunsania bunakitide Israeli, tondo takwabe mukungu mu numba zobe bindi binsania. 33 Wozo muntu mumuli u nsyatikye ku kasenga kane, abe wa kukwezia meiso nu kukwinia mutima. Nu bansania ba numba zobe bakue beikikili na magala. 34 Bubo bwabasile bana bobe babili, Hofuni nu Finehasi, u bwabe kalolesio kuguli: bakue bobabili mu busi bumozi.
35 Nu niyimikile sankoga mukatizia. Akitage binsania bili mu mutima wane nu kalenganio kane. Namwobakile numba za gugumana nu atabangage lwabusio lwa mubongibwa wane bindi binsania. 36 Nu bubuno u bwabe unsania wasigale mu numba zobe, avwe kukumbama kweli kusega lukalilo lwa feza nu kampampa. Nu babuzie bunee: “Mbike, nkukusega, ku mulimo umozi wa busankoga buno nimone kyindi kya kampampa kya kulia.”’”