Yehowa amana Samweli.
3
1 Musikila Samweli akitilaga Yehowa lwabusio lwa Eli. Nu iyuki lya Yehowa talyavule mambizi mengi mu bibyo bindi; takwabezaga tulolesio twingi. 2 Eli abezaga es'alimalima, kubuno ntamonaga busoga lingo. Mu zezo nkungu, Eli abezaga es'eiyombeka mu kiziki kyage. 3 Nu kasuku ka Kalaga kabezaga takazima. Samweli abezaga eiyombeka mu numba za Yehowa gabezaga Sanduku za Kalaga.
4 Nu Yehowa amanine Samweli nu eitabide bunee: “Nne wono.” 5 Nu eitumine lubilo kuli Eli nu atendile bunee: “Nne wono, kubuno wammanine.”
Eli amubwide bunee: “Nsyakumanine. Subya wiyombeke.”
6 Yehowa amanine lingo bunee: “Samweli.”
Nu Samweli ayukile, endile kuli Eli nu atendile bunee: “Nne wono, kubuno wammanine.”
Eli amwakwide bunee: “Nsyakumanine, mwana wane. Subya wiyombeke.”
7 Samweli abezaga ntemenya Yehowa nu iyuki lya Yehowa lyabezaga talimenyesibwa kweli. 8 Yehowa amanine Samweli lingo limbizi lya masatu. Nu ayukile, endile kuli Eli, nu amutendile bunee: “Nne wono, kubuno wammanine.”
Eli asongololede buno Yehowa u wamanaga mwana. 9 Ububo Eli atendile Samweli bunee: “Enda wiyombeke. Nu ndi akumana lingo, nti watenda bunee: ‘Ee, Yehowa, tenda, kubuno mukiti wobe akungwa.’” Nu Samweli endile kwiyombeka mu kiziki kyage.
10 Yehowa avule kwemana nu amanine anga bwalingaga kumana bunee: “Samweli, Samweli.”
Nu Samweli akwide bunee: “Tenda, kubuno mukiti wobe akungwa.”
11 Yehowa abwide Samweli bunee: “Ungwilila, nkukita kitondo kimozi mu Israeli kyalengie matuzi ma unsania wakyungwageko. 12 Mu bubo busi, nazindilizie ku Eli binsania binatendile ku numba zage, bitangi nu bizinda. 13 Namusambalide buno nasungie numba zage bindi binsania ku kabamba ka bwagi bwizi kubo, kubuno bana bage beibigizie nunse nu ntabatobezie. 14 Ukinsa nalumbide ku numba za Eli buno bwagi bwa numba za Eli tabukengibwa ku bisansa aba ku tuyulo ku milyalya.”
15 Samweli eiyombekile aaba nu kukya kwa busi; nu eigwide nibi za numba za Yehowa. Samweli akule boba kusambalila Eli kalolesio.
16 Eli amanine Samweli nu atendile bunee: “Samweli, mwana wane.”
Nu eitabide bunee: “Nne wono.”
17 Eli amubuzizie bunee: “Iyuki ikizi lyakubwide Kalaga? Ntumbise lyo. Kalaga akukitilebo nu kutinga ndi wambisa kena ku binsania byakutendile.” 18 Samweli amusambalide binsania geteli kumubisa kampa. Nu Eli abwide bunee: “U bukutunda Yehowa, akite anga bwakutunda.”