BaIsraeli bakindwa na baFilistini.
4
1 Iyuki lya Samweli lyongubagwa na baIsraeli bansania. BaIsraeli bendile kukulumania baFilistini ku bita; babikile ido ku Ebeni-Ezeri, nu baFilistini babikile ido ku Afeki. 2 BaFilistini beidongekile kwitana na baIsraeli nu bita byalingile. BaIsraeli bakindilwe na baFilistini, nu beitile bamulume bwigi na tununu tunazi (4.000). 3 Gasubizie bantu ku ido, bakulu ba baIsraeli babuzizie bunee: “Kubuni Yehowa atukindya lelo lwabusio lwa ba Filistini? Twendazi ku Silo kutola Sanduku z'Idagano lya Yehowa zivwe munkatini mweitu nu zatonie ku kuboko kwa beiti beitu.” 4 Basingile bantu ku Silo. Kuko batolile Sanduku z'Idagano lya Yehowa, Mwiya Mayombo wikalaga gasamba makerubi. Nu babo bana babili ba Eli, Hofuni nu Finehasi, babezaga gago gamozi na Sanduku z'Idagano lya Kalaga. 5 Geingide Sanduku z'Idagano lya Yehowa mu ido, baIsraeli bansania balalukile n'iyuki inene nu kisi kyatengiletengile.
6 BaFilistini bongule ku mibila za kulaluka kwabo nu babuzizie bunee: “Mibila zeno za kulaluka kukuno kunene mu ido lya baEbrania zili za kikizi?” Nu basongololede buno Sanduku za Yehowa zabasile mu ido lyabo. 7 Nu baFilistini bakule boba kubuno batendile bunee: “Kalaga abasa mu ido.” Nu batendile bunee: “Kabebe kutuli! Bubuno tabubezaga lingo. 8 Kabebe kutuli! Nazi watonie ku kuboko kwa tutuno tulaga twa magala? Tutuno u tulaga twazikizye baMisri na nsungio insania mu kalula. 9 Mwidindike. Mube bamulume, ee baFilistini, munakivwa kuba bakobe ba baEbrania anga bubabezaga bakobe beinyu. Mube bamulume nu mwitane.”
10 BaFilistini beitenne na baIsraeli nu baIsraeli bakindilwe. Batinine muntu na muntu ku hema zage. Bakindilwe bubibu nu kwakule tununu makumi masatu (30.000) twa bakoloboyo ba baIsraeli. 11 Sanduku za Kalaga zanyagilwe, nu bana babili ba Eli, Hofuni nu Finehasi, bakule.
12 MuBenjamina umozi eitumine lubilo kutuka mu iyombo lya bita, nu abasile ku Silo na nsulu zage zatika nu bisogo ku itoe mu bubo busi. 13 Gaabasile, asangile Eli eikala ga kisumbi mu ntungo na nzila nnene, akulindila, kubuno mutima wage wabezaga na mpipi ku Sanduku za Kalaga. Geingide mu mwino, wozo muntu asambede musagu. Nu mwino unsania walalukile n'idilo.
14 Gongule Eli ku mibila z'idilo, atendile bunee: “Mibila zeno zili za kikizi?”
Nu wozo muntu asasizie kwenda kusambalila Eli musagu. 15 Eli abezaga eseli na myaka makumi mubula nu kinana nu meiso mage mabezaga maziba, ntavwamaga kumona lingo. 16 Wozo muntu atendile ku Eli bunee: “Nne u wavwa kutuka mu iyombo lya bita, nu gago u ganatinina lelo.”
Eli amubuzizie bunee: “Mwana wane, buni buli misagu za kuko?”
17 Wozo wavwaga na musagu akwide bunee: “BaIsraeli batina lwabusio lwa baFilistini; bantu beingi bakua. Lingo bana bobe, Hofuni nu Finehasi, bakua nu Sanduku za Kalaga zanyagwa.”
18 Nu gaatekwide Sanduku za Kalaga, Eli agwede lugali na kisumbi bwigi na mwingilo. Akalikile kasingi k'ikosi nu alekenne kubuno abezaga mukungu nu muzitu. Abezaga ngatu mu Israeli myaka makumi manazi.
19 Mukamwana wage, mukazi wa Finehasi, abezaga n'iyimi, bwigi na kubika gansi. Gongule ku misagu za kunyagwa kwa Sanduku za Kalaga nu lukuo lw'isibyala nu lw'iba wage, asimukidwe; eikumbile na lubaba nu abikile gansi. 20 Gaabezaga es'asa kukua, basana bamubwide bunee: “Lindia mutima. Wabuta mwana wamulume.” Tondo ntungule nu ntakwide kampa.