Sanduku za Kalaga ku baFilistini.
5
1 BaFilistini banyagile Sanduku za Kalaga nu bazekile kutuka ku Ebeni-Ezeri nu kuzibasia ku Asidodi. 2 BaFilistini bakatile Sanduku za Kalaga nu bazibasizie ku numba za Dagoni, u kalaga kabo, nu bazibikile bwigi na Dagoni. 3 Gabede busi bwakya, bantu ba ku Asidodi bayukile nu basangile Dagoni zagoa bukukama gansi lwabusio lwa Sanduku za Yehowa. Beimikile lingo Dagoni mu kiziki kyazo. 4 Gabayukile lingo lukesikesi, basangile Dagoni zagoa bukukama gansi lwabusio lwa Sanduku za Yehowa. Itoe nu maboko ma Dagoni makalikile ga kitiko; nu zasigede kimbilimbili tugu. 5 Ukinsa aaba nu lelo basankoga ba Dagoni nu bansania bakwingila mu numba za Dagoni tabakunyantaga ga kitiko kya Dagoni mu Asidodi. 6 Kuboko kwa Yehowa kwabede kubibu ku bantu ba Asidodi. Abasungizie nu abeitile na bibimba, Asidodi nu myaga zage insania. 7 Nu gamonine bantu ba ku Asidodi ku bubo, batendile bunee: “Sanduku za Kalaga wa Israeli tazatunganana kusigala kutuli kubuno kuboko kwage kuli kubibu kutuli nu ku Dagoni, kalaga keitu.” 8 Bakundamanizie bakota bansania ba baFilistini. Batendile bunee: “Tukitazi zeno Sanduku za Kalaga wa Israeli buni?”
Bakwide bunee: “Sanduku za Kalaga wa Israeli zigibwe ku Gati.” Beigizie Sanduku kuko. 9 Tondo kumbusa kwa kuzigia kuko, kuboko kwa Yehowa kwabede gantata ga wozo mwino kubazangiazangia nu kwita bansania, bakulu nu bana, na bibimba.
10 Ububo basingile Sanduku za Kalaga ku Ekuroni. Tondo gazabasile ko, ba ku Ekuroni balilile bunee: “Batwigizia Sanduku za Kalaga wa Israeli buno tukue, iswe nu bikanga byeitu.” 11 Ububo bakundamanizie bakota bansania ba baFilistini. Batendile bunee: “Tikyazi Sanduku za Kalaga wa Israeli; zisubye ku kiziki kyazo. Zitwite, iswe nu bikanga byeitu.” Kubuno kwabezaga kuzangazanga kwa lukuo mu mwino unsania. Kuboko kwa Kalaga kwabezaga kubibu kuko. 12 Bantu batakule bakatilwe na bibimba, nu idilo lya mwino lyabasile aaba nu mwigulu.