Kusubya kwa Sanduku ku ba Israeli.
6
1 Sanduku za Yehowa zasigede mu kisi kya baFilistini myezi mutubakamo. 2 BaFilistini bamanine ba sankoga nu bagila, nu batendile bunee: “Tukitazi buni na Sanduku za Yehowa? Tumenyesiazi butunavwama kuzisubya ku kiziki kyazo.” 3 Bakwide bunee: “Ndi mwasubya Sanduku za Kalaga wa Israeli tamuzisubye bulia, tondo muzisubye kweli na lukaso lwa kusigililwa. Ububo mwonibwe nu nti mwamenye kubuni kuboko kwage takwamutukila.” 4 BaFilistini babuzizie bunee: “Lukaso lukizi lutumusingila?” Bakwide bunee: “Bibimba bitano bya olo nu mbagu itano za olo, anga buli maganzo ma bakota ba baFilistini, kubuno lulo lusungio lwabede kumuli mubansania nu bakota beinyu. 5 Kitazi bisusania bya bibimba nu bisusania bya mbagu zikwita kisi, nu kasazi lutanuno ku Kalaga wa Israeli. Embe atikye kuboko kwage kumuli nu ku tulaga tweinyu nu ku kisi kyeinyu. 6 Kubuni mwalimbanizie mitima zeinyu anga bwalimbanizie baMisri nu Farao mitima zabo? Kengelazi buni bwabakitide wono Kalaga, gaabasungizie na miganogano zage. Ndi tabazigide baIsraeli nu bendile? 7 Kano kaluma kitazi kayanga kato nu katazi ngombe ibili zikumomia zitebulutaga kayanga. Swikazi ngombe ku kayanga nu tikyazi byana byazo nu kubikanda mu mukumba. 8 Tolazi Sanduku za Yehowa nu muzibike mu kayanga. Bikazi bwigi nazo, sanduku zili na bintu bya olo bimukukasana kweli anga lukaso lwa kusigililwa, nu muzisinge. 9 Muzilole busoga buzikwenda. Ndi zabakama mu nzila za myaga za Beti-Semesi, nti Yehowa u watulusizizie luluno lusungio lunene. Ndi tabubo, twamenye buno ta kuboko kwage u kwatusungizie tondo nti bwanya bweitu.”
10 Babo bantu babukitile. Bakatile ngombe ibili zamomagia nu baziswikile ku kayanga. Bakandile byana byazo mu mukumba. 11 Babikile Sanduku za Yehowa mu kayanga nu sanduku zili na mbagu za olo nu bisusania bya bibimba byabo. 12 Ngombe zendile bulingilingi mu nzila za Beti-Semesi, tondo zendaga zalaka mu zezo nzila kankanka nu tazegetile ku seikazi aba ku seidume. Bakota ba baFilistini baziyangile aaba nu ku mwaga wa ku Beti-Semesi. 13 Bantu ba ku Beti-Semesi bakalaga ngano mu kibitabita. Gabalambwide meiso, bamonine ku sanduku nu babogilebogile kuzimona ko. 14 Kayanga kabasile mu isoa lya Yosua wa Beti-Semesi nu kemenne kuko. Gago gabezaga ikozi linene; bakekile miti za kayanga nu bakasenne kisansa kya kugisibwa kya zizo ngombe ku Yehowa.
15 BaLawi bagezizie Sanduku za Yehowa gamozi na zezo zabezaga mu nkaso za olo. Bazibikile g'ikozi inene mu bubo busi. Bantu ba Beti-Semesi bakasenne bisansa bya kugisibwa nu tuyulo ku Yehowa. 16 Nu gamonine bakota batano ba baFilistini ku bubo, basubizie ku Ekuroni mu bubo busi.
17 Bibino u bibimba bya olo byakasenne baFilistini ku Yehowa anga lukaso lwa kusigililwa; kimozi kya Asidodi, kimozi kya Gaza, kimozi kya Askeloni, kimozi kya Gati, kimozi kya Ekuroni, 18 nu mbagu za olo anga maganzo ma miino insania za baFilistini, za bakota batano, kutukila ku miino zili na mikolo aaba nu ku miino mikeke ziteli na mikolo. Lilyo ikozi linene, libabikile ga Sanduku za Yehowa, lili kakengelezio mu isoa lya Yosua wa Beti-Semesi aaba nu lelo.
19 Nu Yehowa eitile ku bantu ba ku Beti-Semesi kubuno balolile mu Sanduku za Yehowa. Ee, eitile bantu tununu makumi matano nu makumi mutubakamo (50.070) twa bantu. Nu bantu balilile kubuno Yehowa eitile ku bantu na lukuo lubibu. 20 Bantu ba ku Beti-Semesi batendile bunee: “Nazi unavwama kwemana lwabusio lwa Yehowa, Kalaga wono wasililila? Kwa nazi kwabakame ndi atuka kutuli?”
21 Basingile migenzi ku bantu ba ku Kiriati-Yearimu kubatenda bunee: “BaFilistini basubizie Sanduku za Yehowa. Gelazi muzibakamie kweinyu.”