Kwigonga kwa baIsraeli.
7
1 Bantu ba ku Kiriati-Yearimu bavule nu babakamizie Sanduku za Yehowa, nu bavule nazo ku numba za Aminadabu ga mwiduko. Nu bengezie Eleazari mwana wage buno alange Sanduku za Yehowa. 2 Sanduku za Yehowa zikede mu Kiriati-Yearimu bindi bingi anga myaka makumi mabili. Nu bantu baIsraeli beiyanine Yehowa. 3 Samweli abwide numba insania za Israeli bunee: “Ndi mukusubya ku Yehowa na mutima umozi, tikyazi tulaga tugeni nu Astaroti kumuli. Nu longekazi mitima zeinyu ku Yehowa nu mukitilazi wenyene tugu, nu amwonie ku kuboko kwa baFilistini.” 4 Bantu baIsraeli batikizye baBaali nu baAstaroti, nu bakitide Yehowa wenyene tugu.
5 Samweli atendile bunee: “Kundamaniazi baIsraeli bansania ku Misipa nu namusegele ku Yehowa.”
6 Ububo bakundamenne ku Misipa nu batagile mazi nu kumakubula lwabusio lwa Yehowa. Nu bagilile idia mu bubo busi nu gago batendile bunee: “Twagide Yehowa.” Nu Samweli agizie baIsraeli ku Misipa. 7 Nu gongule baFilistini buno baIsraeli bakundamenne ku Misipa, bangati ba baFilistini babakamine kwitania baIsraeli bita. BaIsraeli bongule nu bakule baFilistini boba. 8 BaIsraeli babwide Samweli bunee: “Ntulekele kutulilila ku Yehowa, Kalaga weitu, buno atonie ku kuboko kwa baFilistini.”
BaFilistini bakindwa ku Ebeni-Ezeri.
9 Samweli akatile kyana kya mukoko kikili kyamoma nu akikasenne ku Yehowa kisansa kya kugisibwa kigimagima. Samweli alilile ku Yehowa ku kabamba ka Israeli nu Yehowa amwakwide. 10 Nu gakasanaga Samweli kisansa kya kugisibwa, baFilistini bakundile baIsraeli buno balwane nabo, tondo Yehowa abazugide n'iyuki inene anga mukulumino mu bubo busi, nu abazangiziezangizie nu bakindilwe lwabusio lwa baIsraeli. 11 BaIsraeli batukile ku Misipa nu bayangile baFilistini nu babeitile aaba nu kubasa ku Beti-Kari. 12 Samweli atolile ikozi nu alyimikile gasamba Misipa nu Seni, nu alyinikile izina lya Ebeni-Ezeri; atendile bunee: “Yehowa atukasizie aaba nu lelo.” 13 BaFilistini bakindilwe nu tabasokile lingo mu myaga za Israeli. Kuboko kwa Yehowa kwabezaga kubibu ku baFilistini mu bindi binsania bya kalamo ka Samweli. 14 Miino zanyagaga baFilistini ku Israeli zasubizibwe ku Israeli kutukila ku Ekuroni aaba nu kubasa ku Gati, nu Israeli onezie myaga zage ku kuboko kwa baFilistini. Nu kwabezaga bubobelelo gasamba baIsraeli nu baAmori.
15 Samweli abezaga ngatu za baIsraeli bindi binsania bya kalamo kage. 16 Na mwaka na mwaka, Samweli endaga ku Beteli nu Gilgali nu Misipa, kwatula milondo za baIsraeli mu bibino biziki binsania. 17 Kumbusa asubanagia ku Rama, kubuno numba zage zabezaga kuko. Nu atulaga milondo za Israeli kuko, nu angile ko kasenga ka bisansa ku Yehowa.