BaIsraeli basega mukota.
8
1 Nu gabede Samweli ese mukungu, eimikile bana bage kuba ngatu za baIsraeli. 2 Izina lya nkula zage lyabezaga Yoeli, nu lya wamukatekania lyabezaga Abia; babezaga ngatu ku Beri-Seba. 3 Bana bage tabakitile anga bwakitile isibo. Bagalukile kulonda bikulo; basesile milondo butaswaga buno bamone bikulo. 4 Ububo bakulu bansania baIsraeli bakundamenne, nu babaside Samweli ku Rama. 5 Bamubwide bunee: “Lola, use mukungu nu bana bobe tabakukita mu lukita lwobe. Kano kaluma twimikile mwangati wakutwatulila anga bilongo binsania.”
6 Kitondo kikino kyamonekile kibi ku meiso ma Samweli gabatendile bunee: “Twimikile mwangati wakutwatulila milondo.” Nu Samweli asegile ku Yehowa. 7 Nu Yehowa atendile ku Samweli bunee: “Ungwilila ku iyuki lya bantu mu binsania bibakukutenda. Ta uwe u gubakusomba, tondo Nne u gubakusomba buno nsibangate. 8 Bakukukitila anga bubakunkitilaga gabakunsigaga buno bakitile tungo tulaga kutukila nabatikya ku Misri aaba nu lelo. 9 Kano kaluma, ungwilila ku iyuki lyabo. Tugu batonde nu kubamenyesia nkita za mukota wabangate.”
10 Samweli asolede moki mansania ma Yehowa ku bantu bamusegaga mwangati. 11 Abwide bunee: “Bubuno u bwabe nkita za mukota wamwangate. Akate bana beinyu nu ababike ku tuyanga twage nu ga farasi zage. Nu beitume lubilo lwabusio lwa tuyanga twage. 12 Eimike bakota ba kanunu (1.000) nu bakota ba nkama itano, bango bakulima masoa mage nu kukala matubulo mage; nu kulongeka ngabo zage nu bya tuyanga twage. 13 Akate bakinga beinyu kuba bakiti ba bulago nu bayiki nu bokia ba tumpampa. 14 Atole bili bisoga ku masoa meinyu ma mizabibu nu ku masoa meinyu ma miti za mwambo nu abikasane ku bakiti bage. 15 Atole kyindi ky'ikumi kya mbuto zeinyu nu za mizabibu zeinyu nu abikase ku bemanizi nu bakiti bage. 16 Akate bakiti beinyu bamulume nu bakikulu nu basikila beinyu beli basoga, nu mpunda zeinyu nu ababike ku milimo zage. 17 Akate kyindi ky'ikumi kya bituganwa byeinu nu mubenyene mwabe bakiti bage. 18 Kukavwa busi bumukalila ku kabamba ka mwangati u mwisombolele tondo mu bubo busi Yehowa ntakamwakula.”
19 Tondo bantu tabazigile kungwa iyuki lya Samweli nu batendile bunee: “Kilo, tondo twabe na weitu mwangati. 20 Bubo twabe nu beiswe anga bilongo binsania. Mwangati weitu atwatulile milondo zeitu nu kutusondelezia ku bita nu kutulwanina byo.”