Saulo avwa ku Samweli.
9
1 Kwabezaga muntu wa Benjamina, izina lyage Kisi, mwana wa Abieli, mwana wa Zerori, mwana wa Bekorati, mwana wa Afia, muBenjamina, ipuka nu mubibu. 2 Abezaga na mwana wage, izina lyage Saulo; abezaga ese wamulume wakuka nu mbangilwa. Takwabezaga ungo muntu mu baIsraeli wamutinga ku busoga; asakama kutukila ku bituli kutinga bango bantu bansania. 3 Mpunda za Kisi, isi wa Saulo, zaziminne. Kisi abwide mwana wage Saulo bunee: “Kano kaluma tola umozi ku bakiti, mwende kulonda mpunda.”
4 Batingile ku kisi kya tukililo twa Efuraimu nu batingile ku kisi kya Salisa tondo tabazisangile ko. Batingile ku kisi kya Salimu, tondo tazabezaga kuko. Nu batingile ku kisi kya Benjamina tondo tabazimonine. 5 Gababasile ku kisi kya Zufu, Saulo atendile mukiti wabezaga nage bunee: “Tusubye, tatane anakivwa kusiga kabebe ka mpunda nu kuba na kabebe ku kabamba keitu.”
6 Nu mukiti amubwide bunee: “Kano kaluma lola, kuli muntu wa Kalaga mu mwino wono nu akwanzwa busoga. Binsania byakutendaga bikubezaga. Kano kaluma twende kuko. Embe atulolesie nzila zitutinga muzo.”
7 Saulo atendile ku mukiti wage bunee: “Ee, ndi twenda, twakase wozo muntu kikizi? Tumpampa twasila mu nsago zeitu nu takuli lukaso lwa kukasa muntu wa Kalaga. Kikizi kituli nakyo?”
8 Mukiti akwide Saulo lingo bunee: “Lola, nili na kyindi kimozi kya binazi bya shekeli za feza. Nakikase ku muntu wa Kalaga nu atulolesie nzila.”
9 Wakalazi mu Israeli, na muntu wendaga kubuzia kitondo ku Kalaga atendaga bunee: “Vwa twende ku wozo ukumona,” kubuno mulengania wa lelo amanagwa mu bingo bindi “wozo ukumona.”
10 Nu Saulo atendile ku mukiti wage bunee: “Busoga buukutenda. Vwa twende.” Nu bendile ku wozo mwino mwabezaga muntu wa Kalaga. 11 Gababakamaga mwiduko ku mwino, bakulumenne na bakinga batukaga ku mwino kutaga mazi, nu bababuzizie bunee: “Ndi wozo ukumona eli muno?”
12 Babakwide bunee: “Ee, eli lwabusio lweinyu. Kano kaluma sasiazi, kubuno avwa lelo ku mwino kubuno bantu beli na kayulo ga nkangamo. 13 Gamwingile mu mwino, mwamumoneko ntebakama ku nkangamo kulia, bantu tabalie ndi ntebasa kubuno we u wakase mponga ku kayulo. Kusila bamaninwe nti balia. Bakamazi kano kaluma kubuno mwamusange mu zeno nkungu.”
14 Babakamine ku mwino nu gababasile ga mulungu, bakulumenne na Samweli gaabakamaga ku nkangamo.
15 Busi bumozi lwabusio lwa kubasa kwa Saulo, Yehowa abezaga alolesia Samweli bunee: 16 “Lubi mu zeno nkungu nakusingile muntu wa ku kisi kya Benjamina. Mubongie mwambo wa kumwimika kuba musondelezia wa bantu bane ba Israeli. Onie bantu bane ku kuboko kwa baFilistini; kubuno namona bantu bane; idilo lyabo lyabasa kundi.” 17 Gamonine Samweli ku Saulo, Yehowa amutendile bunee: “Wono u muntu u nakubwide; we u wangate bantu bane.” 18 Gabasile Saulo bwigi na Samweli ga mwingilo wa mwino, amubuzizie bunee: “Ndi unandolesia numba za wozo ukumona?”
19 Samweli akwide Saulo bunee: “Nne u wozo ukumona. Bakama lwabusio lwane ku nkangamo; walie gamozi na nne lelo. Nakusindikizie mu nindunindu nu nakulolesie binsania bili ku mutima wobe. 20 Nu ku zezo mpunda zaziminne kuse bindi bisatu, ntwikutie lingo nazo, kubuno zamonekile; nu bisoga binse bya baIsraeli bili ku nazi ndi ta kuguli nu ku numba insania za so?”
21 Saulo amwakwide bunee: “Ndi nsili muBenjamina, wa kikanga kikeke mu bikanga bya Israeli? Nu mutula wane ndi taguli kunsi kwa mitula insania za Benjamina? Kyukumbulila bubo?”
22 Samweli avule na Saulo nu mukiti wage nu abeingizizie ga kyage nu abeikazizie ku kiziki kya lwanzo mu babo bamaninwe. Babezaga bwigi ku bantu makumi masatu. 23 Samweli atendile ku muyiki bunee: “Vwa na kyindi kinakukasile, nu kinakutendile buno wakitunda.”
24 Muyiki atolile kiganza kya kuboko kigimagima nu akilusizie ku Saulo. Nu Samweli amutendile bunee: “U kiganza kyabikilwe. Kitole nu ukilie, kubuno ganamanine bantu, nakubikide kyo.” Ububo Saulo alide gamozi na Samweli mu bubo busi. 25 Gabagelile ku nkangamo, babasile ku mwino nu Samweli asambalaga na Saulo ga kyage kya gantata ga numba. 26 Bayukile lukesikesi. Samweli amanine Saulo gantata ga numba nu amutendile bunee: “Yuka nu nakusindikizie.” Saulo ayukile nu babasile kumbuga bobabili, we nu Samweli gamozi. 27 Gababasile ku isula lya mwino, Samweli atendile ku Saulo bunee: “Tenda mukiti wobe atinge ga lwabusio lweitu. Tondo uwe, emana tanga nu nakusambalile iyuki lya Kalaga.”