Saulo abongibwa mwambo.
10
1 Samweli akatile kabongelo ka mwambo nu akakubwide ku itoe lya Saulo. Amumumine ku matama nu abwide bunee: “Ndi Yehowa ntakubongia mwambo buno ube mwangati wa bwiyani bwage? 2 Gatukulekanuka lelo wakulumane na bantu babili bwigi na nsinda za Rakeli, mu mwaga wa Benjamina ku Zeleza. Bakusambalile bunee: ‘Mpunda ziwendagile walonda zamonekile, nu kano kaluma so ntakukengela lingo bitondo bya mpunda tondo es'azangazanga ku kabamba kobe, nu akwibuzia bunee: “Buni bunikita ku kabamba ka mwana wane?”’” 3 “Kutuka gago, wende nu wabase ku muti wozo munene guli ku Tabori, nu wasange bantu basatu bakubakama kwa Kalaga ku Beteli, umozi akweka byana bisatu bya mpene, ungo tumpampa tusatu nu ungo idega lya kulanga maku. 4 Bakusambizie nu bakukase tumpampa tubili nu watutole ku maboko mabo. 5 Kusila wabase ku Gibeati-Elohimu, geli kiziki kikwikalaga mu iyombo lya baFilistini. Nu gawabase ku mwino wakulumane na kibombo kya balengania bakutuka ga nkangamo nu basondelezibwe na nzenze nu ngoma nu monze nu lungo lukita lwa nzenze nu gabakwenda, bakulengania. 6 Muuza wa Yehowa wakuvwile na magala nu walenganie gamozi nabo. Wagalukibwe kuba ungo muntu. 7 Gawamone ku tukengelezio tutuno, kita anga bwakulungana kubuno Kalaga eseli gamozi nobe. 8 Gela lwabusio lwane ku Gilgali nu ndindile bindi mutubakamo. Menya buno nakusange kuko, kukasana bisansa bya kugisia nu tuyulo twa bubobelelo, nu nakulolesie buwatunganana kukita.”
9 Nu geidile Saulo mugongo, mu kulekanuka na Samweli, Kalaga amugalukizye mutima. Nu tukengelezio tutuno tunsania twazindilide mu bubo busi. 10 Gababasile ku mwiduko, kibombo kya balengania kyakulumenne nage. Muuza wa Kalaga amuvwilide na magala nu Saulo alenganizie gamozi nabo. 11 Nu bansania bamumenyaga kalazi gabamonine bwalenganagia na balengania babuzanizie bunee: “Buni bubuno bwabasila mwana wa Kisi? Kasi Saulo eseli umozi wa balengania?”
12 Muntu umozi wa gago akwide bunee: “Nu nazi isibo?” Ku bubo bwabede buseli nsumo za bunee: “Kasi Saulo eseli umozi wa balengania!”
13 Gaasilile kulengania, Saulo endile ku nkangamo. 14 Isi mwana muto wa Saulo abuzizie Saulo nu mukiti wage bunee: “Mwendile kuni?”
Amwakwide bunee: “Kulonda mpunda. Gabede tatwazimona, twabasile ku Samweli.”
15 Isi mwana muto atendile bunee: “Ndi bwakutananizia, nsambalile bwakubwide Samweli.” 16 Saulo akwide muto w'isi bunee: “Atubwide bwasi bwasi buno mpunda zamonekile.” Tondo ntamutendile bubo bwabwide Samweli ku kitondo kya bukota.
Saulo eimikwa mukota.
17 Samweli amanine bantu bakundamane lwabusio lwa Yehowa ku Misipa. 18 Nu atendile ku baIsraeli bunee: “Bubuno u bukutenda Yehowa, Kalaga wa Israeli, bunee: ‘Natikizye Israeli ku Misri nu namwonezie ku kuboko kwa baMisri nu ku kuboko kwa makota mansania mamusungagia. 19 Tondo lelo mukusomba Kalaga weinyu wozo ukumwonagia mu mbabazio insania zeinyu nu nsungio zeinyu; lingo mukumubula bunee: “Kilo, twiyimikile mwangati weitu.” Kano kaluma basazi mu bikanga byeinyu nu mu tununu tweinyu ku meiso ma Yehowa.’”
20 Samweli akundamanizie bikanga binsania bya baIsraeli nu kikanga kya Benjamina u kyalasile. 21 Akundamanizie tununu twa Benjamina mu bikanga byabo, nu kikanga kya Matiri kyalasile. Nu Saulo mwana wa Kisi alasile. Tondo gabamulondile tabamumonine. 22 Ku kabamba kako babuzizie lingo ku Yehowa bunee: “Ndi wozo muntu ntevwa?” Nu Yehowa akwide bunee: “Eibisa mu bintu.” 23 Beitumine lubilo nu bavule nage kuko. Geemenne munkatini mwa bantu, abezaga asuluka bansania ku bulazi kutukila ku bituli. 24 Samweli abwide bantu bansania bunee: “Tamukumona wozo wasombwedwe na Yehowa! Mu bantu bansania takuli ungo wigezye nage.” Nu bantu bansania balalukile nu batendile bunee: “Mukota alame.”
25 Samweli alolesizie bantu nkita za bakota nu kuzisanza mu kigondi kya mukanda nu agubikile lwabusio lwa Yehowa. Kusila Samweli abalanganizie bantu bansania, nawe ku numba zage. 26 Saulo nu we endile kwage ku numba ku Gibea gamozi n'iyombo lya babo bamanwa na Kalaga mu mitima. 27 Tondo binsalansala byatendile bunee: “Wono muntu anatonia buni?” Bamubengile nu tabamuvwilide na nkaso. Tondo Saulo ntangile bubo.