Saulo akinda baAmori.
11
1 Nahasi muAmoni abakamine ku Yabesi-Gileadi nu abikile ido lya bita. Bamulume bansania ba Yabesi babwide Nahasi bunee: “Tukitazi idagano nu iswe twabe bakiti beinyu.” 2 Nahasi muAmoni abwide bunee: “Nakite idagano na beinyuwe, ndi meiso meinyu ma kwidume mabotolwa, nne nabubike kisimbwa ku Israeli unsania.”
3 Bakulu ba ku Yabesi bamubwide bunee: “Tukase bindi mutubakamo nu twasinge migenzi mu myaga insania za Israeli. Ndi takuli unatonia, twakubasile.”
4 Migenzi zavule ku Gibea wa Saulo. Basambede musagu ku bantu nu bantu bansania balalukile n'idilo. 5 Nu Saulo atukaga ku isoa na ngombe zage. Saulo atendile bunee: “Kikizi kikulilila bantu?” Bamubwide misagu za bantu ba ku Yebusi. 6 Gongule Saulo ku zezo misagu, Muuza wa Kalaga wavule kweli na magala nu ongilwe nunse. 7 Akatile zizo ngombe zage ibili nu azikekile byindi byindi. Asingile bibyo byindi mu myaga insania za Israeli mu maboko ma migenzi. Atendile bunee: “Wozo utayanga Saulo nu Samweli, ngombe zage zakitwe anga bubuno.” Boba bwa Yehowa bwabaside bantu nu bavule anga muntu umozi.
8 Saulo abakundamanizie ku Bezeki. Aganzile baIsraeli tununu nkama isatu (300.000) nu baYuda tununu makumi masatu (30.000). 9 Batendile migenzi zavwaga bunee: “Tendazi bantu ba ku Yabesi-Gileadi buno lubi mu nkungu za makuluka mwakululwe.” Gavule migenzi nu kusambalila bantu ba ku Yabesi babogilebogile. 10 Nu bantu ba ku Yabesi batendile Nahasi bunee: “Lubi twamubasile nu mwatukitile anga bunsania buli busoga ku meiso meinyu.”
11 Gakede busi, Saulo abeganizie bantu ku bibombo bisatu. Babasile ku ido mu nkungu za bakikaga bita mu lukesikesi nu beitenne na baAmoni aaba nu ku makuluka. Babo tabakule babalangenne nunsania, takuli umozi wabezaga na munyage gamozi.
12 Bantu babuzizie Samweli bunee: “Nazi watendile buno ndi Saulo atwangate? Tukase babo bantu, tubeite.”
13 Tondo Saulo atendile bunee: “Takuli muntu umozi w'itoe lelo kubuno Yehowa onia Israeli busi bwa lelo.”
14 Samweli atendile bantu bunee: “Vwazi, twendazi ku Gilgali, tukokomezie lingo bukota kuko.” 15 Bantu bansania bendile ku Gilgali, nu beimikile Saulo mwangati lwabusio lwa Yehowa ku Gilgali. Bakasenne tuyulo twa bisansa bya bubobelelo gago lwabusio lwa Yehowa, nu Saulo nu baIsraeli bansania babogilebogile nunse kuko.