Samweli idongekede lwabusio lwa Israeli.
12
1 Samweli abwide baIsraeli bansania bunee: “Ungwililazi, nungule iyuki lyeinyu, ku binsania bimwambwide nu namwimikila mukota. 2 Kano kaluma mukota eli lwabusio lweinyu kumusondelezia. Tondo nne niseli mukungu wa mbwe. Bana bane beli gamozi n'inyu. Nne namusondelezizie kutukila busikila bwane aaba nu lelo. 3 Nemana gano. Nsongelazi lwabusio lwa Yehowa nu lwabusio lwa mubongibwa wage. Nakatile ngombe za nazi? Aba nakatile mpunda za nazi? Aba nazi u nengelede, aba nasungizie nazi? Nu nakatile bikulo bya nazi buno nigalukye bulili? Nu nne namusubizie byo.” 4 Nu bamwakwide bunee: “Ntwatwengelede nu ntwatusungizie, nu ntwakatile kena ku kuboko kwa muntu wampa.”
5 Ababwide bunee: “Yehowa eli mulongeki wane kumuli nu mubongibwa wage eli mulongeki mu buno busi bwa lelo buno tamwamonine kena kundi.” Nu bamwakwide bunee: “We eli mulongeki.”
6 Nu Samweli atendile ku bantu bunee: “Yehowa u wimikile Musa nu Haruni nu u watikizye basoinyuwe ku kisi kya Misri. 7 Kano kaluma, emanazi, nimulolesie lwabusio lwa Yehowa, makitilo mansania meisanana ma Yehowa maamukitide, beinyuwe nu basoinyuwe. 8 Gendile Yakobo ku Misri, basoinyuwe balilile ku Yehowa, nu Yehowa asingile Musa nu Haruni, nu batikizye basoinyuwe ku Misri nu kubeikazia ku kikino kiziki. 9 Tondo bebilide Yehowa, u Kalaga wabo, nu abakasenne ku kuboko kwa Sisera, musondelezia w'iyombo lya Hazori, nu ku kuboko kwa baFilistini, nu ku kuboko kwa mukota wa Moabu nu beitenne nabo. 10 Balilile ku Yehowa nu babwide bunee: ‘Twagile, kubuno twasigile Yehowa nu twakitide baBaali nu baAstaroti, tondo kano kaluma tonie ku kuboko kwa beiti nu twakukitile.’
11 Yehowa asingile Yerubaali nu Bedani nu Yefuta nu Samweli, nu amwonezie ku kuboko kwa beiti beinyu ba ndenge insania nu mwikede mu bubobelelo. 12 Gamwamonine buno Nahasi, mukota wa baAmoni amuvwilide ku bita, mwambwide bunee: ‘Kilo, mukota atwangate, nu kasi Yehowa, Kalaga weinyu, abezaga mwangati weinyu.’ 13 Kano kaluma, lolazi mwangati u mwasombwede, u mwasegile. Lolazi, Yehowa amukasile mwangati weinyu. 14 Ndi mukukwa Yehowa boba nu kumukitila nu kungwa iyuki lyage, nu ndi tamukunana milembe zage, nu ndi beinyuwe nu mwangati ukumwangata mwayangage Yehowa, Kalaga weinyu, nti busoga. 15 Tondo ndi tamukwanza iyuki lya Yehowa, nu ndi mukuguna makakizio mage, nti kuboko kwage kwabe kizitu kumuli anga bukwabezaga ku basoinyuwe. 16 Lingo, emanazi, mumone ku kitondo kinene kikukita Yehowa lwabusio lweinyu. 17 Ndi lelo ta matubulo ma ngano? Nkusega Yehowa nu asinge mikulumino nu mbula, mumenye buno bubi bweinyu buli bunene bumwakitile ku meiso ma Yehowa, kwisegela mwangati.”
18 Nu Samweli asegile ku Yehowa. Yehowa asingile mikulumino nu mbula mu bubo busi nu bantu bansania bakule Yehowa nu Samweli boba nunse. 19 Bantu bansania babwide Samweli bunee: “Segela bakiti bobe ku Yehowa, Kalaga wobe, buno tatukue, kubuno twatalikide ku bwagi bweitu bunsania, bubuno bwagi bwa kwisegela mwangati.”
20 Samweli akwide bantu bunee: “Tamukue boba. Mwakitile bubuno bwagi bunsania, tondo tamulekele kuyanga Yehowa. Mukitilazi na mutima umozi. 21 Tamwegete kuyanga bitondo bitaswaga biteli na mutali, bitanavwama konia kubuno bili bulia. 22 Kubuno ku kabamba k'izina lyage linene, Yehowa ntalekele bantu bage, tondo Yehowa atundile kumubika bantu bage wenyene. 23 Nu nne nsinagila Yehowa mu kulekela kumusegela. Tondo namwigisagie nzila nsoga zisanana. 24 Tugu kuazi Yehowa boba nu mumukitile mu bulili na mutima umozi kubuno mukumona bwamukitide bitondo binene bya miganogano. 25 Tondo ndi mwakitilila bwagi, nti mwatikibwe, beinyuwe nu mwangati weinyu.”