Samweli atondile Saulo.
13
1 Saulo abezaga na myaka makumi masatu gaalingile kwangata. Nu gaangatile myaka ibili mu Israeli, 2 Saulo eisombolede tununu tusatu (3.000) twa baIsraeli; tununu tubili (2.000) twabezaga na Saulo ku Mikimasi nu ku tukililo twa Beteli, nu kanunu kamozi (1.000) kabezaga gamozi na Yonatana mu Gibea wa Benjamina. Asingile bango bantu basigede nawe ku numba zage. 3 Yonatana eitile iyombo lya baFilistini lyabezaga ku Geba nu baFilistini bongule ku bubo. Saulo idile monze mu kisi kinsania kutenda bunee: “BaEbrania bansania bongwe.” 4 BaIsraeli bansania bongule buno Saulo eitile iyombo lya baFilistini nu Israeli es'uga bubi ku baFilistini. Bantu bansania bamaninwe kukundamana kuli Saulo ku Gilgali.
5 BaFilistini bakundamenne kwitana na baIsraeli. Babezaga na tuyanga tununu makumi masatu (30.000) nu bakoloboyo ba ga mpunda tununu mutuba (6.000) nu bantu anga misege za ku kitatenge ku bwingi. Bavule nu babikile ido ku Mikimasi, kuntata kwa Beti-Aweni. 6 BaIsraeli bamonine buno beseli gabibu kubuno iyombo lyabo lyasindikilwe lumbusambusa. Bantu beibisile mu tulimba nu mu byundundu nu mu biziki bya makozi nu mu matengu nu mu mizinga. 7 BaEbrania basokile Yordani ku kisi kya Gadi nu Gileadi. Saulo abezaga eikili ku Gilgali, nu bantu bansania bamwendede nu bagiliminaga. 8 Alindide bindi mutubakamo, anga bindi byalagile Samweli, tondo Samweli ntabasile ku Gilgali nu bantu balingile kubalangana.
9 Saulo abwide bunee: “Mvwilazi na kayulo ka kugisibwa nu kayulo ka bubobelelo.” Nu akasenne kayulo ka kugisibwa. 10 Nu gasilile Saulo kukasana kayulo ka kugisibwa, Samweli abasile. Saulo endile kumukulumania nu kumusekela.
11 Samweli abuzizie bunee: “Wakitile buni?” Saulo akwide bunee: “Kubuno ganamonine buno bantu bambalangana nu ntwabasile ku kindi kyalagilwe, nu baFilistini bakundamanenne ku Mikimasi, 12 natendile bunee: ‘Kano kaluma baFilistini bagele kundi kunitania nu nsisega Yehowa mponga zage.’ Ububo nisindikile nu nakasenne kayulo ka kugisibwa.”
13 Nu Samweli abwide Saulo bunee: “Wakitile bukongolo. Ntwanza ikakizio lya Yehowa, Kalaga wobe, lyakukakizizie. Songo wamwanzile, songo Yehowa analindizie bukota bwobe ku Israeli ku milyalya. 14 Tondo kano kaluma bukota bwobe tabwizizie. Yehowa eisombolela muntu walembe mutima wage nu Yehowa amubikile mwangati wa bantu bage, kubuno ntwanzile bubo bwakukakizizie Yehowa.”
15 Samweli atukile ku Gilgali nu endile ku Gibea wa Benjamina. Saulo aganzile bantu basangagwa nage, bwigi ku bantu nkama mutuba. 16 Saulo nu mwana wage Yonatana, nu bantu babasangagwa nabo beikede ku Gibea wa Benjamina, tondo baFilistini babikile ido ku Mikimasi. 17 Mu ido lya baFilistini mwatukile bibombo bisatu bya banyagi. Kibombo kimozi kyendile mu nzila za ku Ofura mu kisi kya Suali, 18 nu kingo kibombo kyendile mu nzila za Beti-Horoni, nu kingo kibombo kyendile mu nzila za mwaga walolela ku kibitabita kya Zeboimu ku lulenge lwa ku kalula. 19 Takwabezaga mutumbi mu kisi kinsania kya Israeli kubuno baFilistini batendile bunee: “BaEbrania banakivwa kutula myene aba masumo.” 20 BaIsraeli bansania bagelile ku baFilistini, nawe kuyikililwa mundu wage wa kumba ku isoa nu iyembe lyage nu isaga lyage nu kakunda kage ka kukala mumpunge. 21 Bukunza bwa kuyikililwa mundu aba iyembe aba nkanya za meinyo masatu aba isaga nu kakunda bwabezaga byindi bibili bya bisatu bya shekeli emozi za feza. 22 Ububo mu busi bwa bita takwabezaga aba bupanga aba isumo mu kuboko kwa muntu aba umozi mu babo babezaga gamozi na Saulo nu Yonatana, tugu kyamonekile ku Saulo nu ku mwana wage Yonatana. 23 Iyombo lya baFilistini lyabasile ku mpulungano za Mikimasi.