Kukinda kwa Yonatana.
14
1 Busi bumozi Yonatana, mwana wa Saulo, atendile ku musikila wekaga ngabo zage bunee: “Vwa, tusuluke ku lisa lya balangi b'ido lya baFilistini.” Tondo ntasambalide isi. 2 Saulo alindide g'isula lya Gibea, gansina muti wa biguma mu Migironi gamozi na babo bantu babezaga nage bwigi na nkama mutuba. 3 Ahiya, mwana wa Ahitubu, mubuto wa Ikabodi, mwana wa Finehasi, mwana wa Eli, sankoga wa Yehowa mu Silo, avwalaga efodi. Bantu tabamenyine buno Yonatana es'enda. 4 Ga mpulungano galondaga Yonatana kusuluka kuli baFilistini, gabezaga kilimbi kya makozi mu luno lulenge nu kilimbi kya makozi mu lulo lungo lulenge, izina lya kimozi lyabezaga Bozezi nu lya kikyo kingo Sene. 5 Kilimbi kimozi kyabezaga ku lulenge lwa kwikazi butunganana na Mikimasi nu kikyo kingo kyabezaga ku lulenge lwa kwidume butunganana na Geba. 6 Yonatana abwide musikila wekaga ngabo zage bunee: “Vwa, tukusuluka kuli ido lya babano batamonesibwa. Embe Yehowa atukasie, kubuno takuli kinakanda Yehowa konia na beingi aba na bakeke.” 7 Wozo mweki wa ngabo zage amutendile bunee: “Kita binsania bili mu mutima wobe; twende. Ntukumona, nili gamozi nobe; buli makengelo mobe u buli mane.”
8 Yonatana atendile bunee: “Tusuluke kuli babo bantu nu kwidolesia kubeli. 9 Ndi batutenda bunee: ‘Emanazi aaba nu gatwamubasile,’ nti twemana gago nu tatwababakamine. 10 Tondo ndi batutenda bunee: ‘Tubakaminazi,’ nti twababakamina kubuno nti Yehowa abakasenne mu kuboko kweitu; bubo u bwabe kalolesio kutuli.”
11 Beidolesizie bobabili ku ido lya baFilistini. BaFilistini batendile bunee: “Lolazi, baEbrania bakubasa mu matengu mabeibisaga mumo.” 12 Nu bantu b'ido babwide Yonatana nu mweki wa ngabo zage bunee: “Tubakaminazi, tukumulolesia kimukulonda.” Yonatana abwide wozo mweki wa ngabo zage bunee: “Nyange, kubuno Yehowa abakasenne mu kuboko kwa Israeli.”
13 Yonatana abakamine na maboko nu magulu nu mweki wa ngabo zage kumbusa kwage. BaFilistini bagwede lwabusio lwa Yonatana nu mweki wa ngabo zage abeitile kumbusa kwage. 14 U kwita kutangi geitaga Yonatana nu mweki wa ngabo zage bwigi ku bantu makumi mabili mu mpapa za bwigi bulimi bwa busi bumozi. 15 Boba bwatengezietengezie ido, nu ibamba nu bantu bansania. Bwabasile ku ido inene aaba nu ku banyagi, nu nsi zatengiletengile kubuno kuko kugilimina kwatukile ku Kalaga. 16 Balangi ba Saulo mu Gibea wa Benjamina bamonine bukukebengana iyombo. 17 Nu Saulo abwide bantu babezaga nage bunee: “Kano kaluma, ganzazi bakoloboyo nu menyazi nazi watukile mutuli.” Baganzile nu basangile buno Yonatana nu mweki wa ngabo zage tababezagago.
18 Saulo abwide Ahiya bunee: “Lusia Sanduku za Kalaga kuno,” kubuno Sanduku za Kalaga zabezaga gamozi na baIsraeli mu bubo busi. 19 Nu gatendaga Saulo na sankoga, kazege ka mu ido lya baFilistini kitilide. Nu Saulo atendile sankoga bunee: “Siga tugu.”
20 Saulo nu bantu bansania babezaga nage bakundamenne nu bendile ku bita. Basangile baFilistini bagalukilana kwitana na myene bwabo bwabo mu kuzangazanga na boba bunene nunse.
21 BaEbrania balingaga kukitila baFilistini bendaga nabo ku ido lyabo, nu bagalukile kuba gamozi na baIsraeli babezaga na Saulo nu Yonatana. 22 Nu baIsraeli bansania beibisaga mu tukililo twa Efuraimu gabongule buno baFilistini batinine, babayangile nu bo ku bita. 23 Ububo Yehowa onezie Israeli mu bubo busi, nu bita byasigelede aaba nu kutinga ku Beti-Aweni.
Saulo alumbilizia baIsraeli.
24 Bamulume baIsraeli bakutilwe bubibu bubo busi kubuno Saulo alumbilizizie baIsraeli bunee: “Aswililwe waliage idia lwabusio busi tabwida, ndi nsisuba ku beiti bane.” Nu takuli umozi wasondile ku idia.
25 Bantu bansania beingide mu lubanda nu kwabezaga buuki gansi. 26 Geingide bantu mu lubanda bamonine ku buuki bukugela. Tondo takwabede wampa walambile kubo kubuno bantu bakule kiswililo boba. 27 Yonatana ntungule ku ikakizio ly'isi gaalumbizagia bantu. Alambizie musumbo wage nu agutobile mu lukeke lwa buuki. Alambile nu kulia kubo nu meiso mage malangamenne.
28 Muntu umozi mubeli amubwide bunee: “So alumbizizie bantu bunee: ‘Aswlililwe waliage idia lelo.’ U kinsa bantu batamba.”
29 Yonatana abwide bunee: “Tatane akutia kisi. Ntukumona bwandangamana meiso kubuno nasonda ku bubuno buuki bukeke. 30 Bunabede busoga kutinga songo bantu balide anga bubatunda ku bibyo bibasangile ku beiti babo; kubuno kano kaluma, baFilistini tabeitwa beingi bubibu.”
31 Mu bubo busi beitile baFilistini kutukila ku Mikimasi nu kubasa ku Ayaloni, nu bantu bakutilwe nunse. 32 Bantu bakakaninne bibyo byasigile baFilistini nu bakatile mikoko nu ngombe nu byana bya ngombe; bazisesile gansi nu bantu balide nyama zili na mikila.
33 Basambalide Saulo bunee: “Ntukumona, bantu bakwagila Yehowa mu kulia nyama zili na mikila.” Nu atendile bunee: “Mwakita bwagi. Nkumbiziazi ikozi inene kano kaluma.” 34 Nu Saulo atendile bunee: “Balanganazi ku bantu nu kubatenda bunee: ‘Nawe nawe nti avwa na ngombe zage kundi nu nawe na mukoko wage. Mwazisese gano nu kulia.’ Aba tamwagile Yehowa mu kulia zili na mikila?”
Ububo bantu bansania bavule nawe na ngombe zage mu kindi kikyo nu bazisesile gago. 35 Saulo angile kasenga ka tuyulo ku Yehowa, u kasenga katangi kaangide Yehowa. 36 Saulo abwide bunee: “Tugelazi kuyanga baFilistini mu kindi nu tubatukule aaba nu gakye busi. Tatusige muntu wampa kubeli.”
Batendile bunee: “Kita bunsania buli busoga ku meiso mobe.” Tondo sankoga abwide bunee: “Tusigelelazi bwigi na Kalaga gano.”
37 Saulo abuzizie Kalaga bunee: “Ndi nigele kuyanga baFilistini? Ndi wabakasane mu maboko ma baIsraeli?” Tondo ntamwakwide mu bubo busi.
38 Saulo atendile bunee: “Beinyuwe basondelezia bansania ba bantu, kundazi kuno. Menyazi nu lolazi buni bwabede bubuno bwagi lelo. 39 Kubuno anga bukulamaga Yehowa ukonagia Israeli, aba ndi eli Yonatana mwana wane wakitile, lebelebe akue.” Nu mu bantu bansania takwabezaga wamwakwide.
40 Abwide baIsraeli bansania bunee: “Mwikale ku lulenge lumozi nu nne nu mwana wane Yonatana tukwikala ku luno lungo lulenge.”
Nu bantu bamwakwide bunee: “Kita bubo bukumoneka busoga ku meiso mobe.”
41 Saulo abwide Yehowa, Kalaga wa Israeli, bunee: “Lolesia kulasa kwa bulili.” Yonatana nu Saulo balasilwe, nu bantu bonine.
42 Nu Saulo abwide bunee: “Esazi mbale ganisamba na mwana wane Yonatana.” Nu Yonatana alasilwe.
43 Saulo abwide Yonatana bunee: “Nsambalile kiwakitile.” Nu Yonatana amusambalide bunee: “Lebelebe nasondile buuki bukeke na ntonga za musumbo wabezaga mu kuboko kwane. Nne wono, nitabizia kukua.”
44 Saulo abwide bunee: “Kalaga ankitile bubuno nu kwitila. Yonatana, lebelebe wakue.” 45 Tondo bantu batendile ku Saulo bunee: “Buni bukukua Yonatana wozo wonezie Israeli bugezie gago? Kilo, aba kakeke. Anga bukulamaga Yehowa, aba luzwili lwage lumozi talutuke kubuno akitaga gamozi na Kalaga lelo.” Ububo bantu bakulwide Yonatana nu ntakule.
46 Saulo alekede kuyanga baFilistini nu baFilistini bendile kwabo. 47 Saulo, gaakatile bwangato mu Israeli, eitenne na beiti bage mu ndenge insania; na baMoabu, nu na baAmoni, nu na baEdomu, nu na bakota ba Zoba, nu na baFilistini. Kunsania kwatingile abakindile. 48 Akitile na bupuka nu eitenne na baAmaleki. Onezie Israeli ku kuboko kwa babo babatukulaga. 49 Bana ba Saulo babezaga: Yonatana nu Isiwi nu Malki-Sua; nu bana bage bamukazi, nkula einikilwe Merabu nu muto wage einikilwe Mikali. 50 Izina lya mukazi wa Saulo lyamanagwa Ahinoamu, mwana wa Ahimasi. Izina lya mukota w'iyombo lyage lyamanagwa Abeneri, mwana wa Neri, isi mwana muto wa Saulo. 51 Kisi, isi wa Saulo, nu Neri, isi wa Abeneri, babezaga bana ba Abieli.
52 Bita na baFilistini byabezaga bikali bindi binsania bya kalamo ka Saulo. Nu gamonaga Saulo ku muntu wa magala aba ipuka nti amutola buno abe gamozi nage.