Kunana kwa Saulo.
15
1 Samweli atendile ku Saulo bunee: “Yehowa ansingile kukubongia mwambo wa kuba mwangati wa bantu bage u baIsraeli. Kano kaluma, ungwilila moki ma Yehowa. 2 Bubuno u bukutenda Yehowa, Mwiya Mayombo: ‘Nakengela bwakitide Amaleki Israeli anga bwakandide Israeli nzila gaatukaga ku Misri. 3 Enda kano kaluma wite baAmaleki nu kuzikya binsania byabo. Ntubakwile kyombo. Wite bamulume nu bakikulu, bana nu babo bakumoma, ngombe nu mikoko, ngamia nu mpunda.’” 4 Saulo ongule nu akundamanizie bantu mu Telaimu, bakoloboyo tununu nkama ibili (200.000) nu tununu ikumi (10.000) twa bantu ba Yuda. 5 Gabasile Saulo ku mwino wa Amaleki, akobile mu mpinga. 6 Saulo abwide baKeni bunee: “Endazi! Tukazi! Tukazi munkatini mwa baAmaleki, ninakivwa kumwita gamozi nabo; kubuno mwakitide baIsraeli bansania busoga gabatukaga ku Misri.” Ububo baKeni batukile munkatini mwa baAmaleki.
7 Saulo eitile baAmaleki kutukila ku Havila aaba nu kubasa ku Suri guli kuntata kwa Misri. 8 Nu akatile Agagi mukota wa Amaleki eikili na kalamo, tondo eitile bantu bansania na mwene wa nganda.
9 Saulo nu bantu bakwilide Agagi kyombo nu mikoko misoga nu ngombe nsoga nu byana byazo byalunda nu kinsania kyabezaga kisoga; tabazigile kubizikya. Tondo kinsania kitabezaga na mutali aba kyabezaga kisosu bakitile.
10 Nu iyuki lya Yehowa lyabaside Samweli bunee: 11 “Nibezia bunimikile Saulo mwangati kubuno angalukila, ntakwanza makakizio mane.” Samweli ongilwe nu alilile ku Yehowa kindi kinsania.
12 Samweli ayukile lukesikesi kwenda kukulumania Saulo. Batendile Samweli bunee: “Saulo abasile ku Karmeli, nu eiyimikide iyango lya kakengelezio, kusila agalukile nu atingile nu agelile ku Gilgali.”
13 Samweli abasile ku Saulo nu Saulo amutendile bunee: “Mponga za Yehowa zibe kuguli. Nakitile ikakizio lya Yehowa.” 14 Nu Samweli abwide bunee: “Kasi buni buli zeno milaki za mikoko mu matuzi mane nu lutumbi lwa ngombe lunkungwa kulo?”
15 Saulo amwakwide bunee: “Bantu bavule nazo kutuka ku baAmaleki kubuno bantu balangile mikoko misoga nu ngombe nsoga buno bazikasane tuyulo ku Yehowa, Kalaga wobe. Twazikizye bingo binsania byasigede go.”
16 Samweli abwide Saulo bunee: “Lindila, nikusambalile bwambwide Yehowa mu kindi kya lelo.” Nu amutendile bunee: “Tenda tugu.”
17 Samweli abwide bunee: “Aba wimonaga mukeke ku meiso mobe, ndi ntuseli musondelezia wa bikanga bya Israeli? Yehowa akubongezie mwambo kuba mwangati wa baIsraeli. 18 Nu Yehowa akusingile nu atendile bunee: ‘Enda nu zikya babo bagi ba Amaleki, kwitana nabo aaba nu gabazikibwa.’ 19 Kasi kubuni ntungule iyuki lya Yehowa? Kubuni wakakaninne bikulo bya kutukula nu kukita bwagi ku meiso ma Yehowa?”
20 Nu Saulo abwide Samweli bunee: “Lebelebe nanzile iyuki lya Yehowa nu nendile kwansingile, nu navule na Agagi mukota wa baAmaleki, nu nazikizye baAmaleki. 21 Tondo bantu batukwide mikoko nu ngombe nsoga mu zizo zatunganenne kuzikibwa, buno bazikasane tuyulo ku Yehowa, Kalaga wobe, ku Gilgali.”
22 Nu Samweli abwide bunee: “Ndi Yehowa akubogaboga na bisansa byagisibwa nu tuyulo kutinga kwanza iyuki lya Yehowa? Ungwilila, kwanza kwatinga tuyulo nu kungwilila kwatinga manona ma bilimba bya mikoko. 23 Kubuno kuguna kwigezye na bwagi bwa bugila nu kabenga kili anga kukumbamina nkisi. Kubuno wasombile iyuki lya Yehowa, ububo akusomba wasigala mwangati.”
24 Nu Saulo akwide Samweli bunee: “Nagile, kubuno nasigile ikakizio lya Yehowa nu moki mobe, kubuno nakule bantu boba nu nungule iyuki lyabo. 25 Kano kaluma nkukusega, sigilila bwagi bwane nu subya na nne buno nikumbamine Yehowa.”
26 Tondo Samweli akwide Saulo bunee: “Nsyasubye nobe, kubuno wasombile iyuki lya Yehowa, nu Yehowa akusomba wasigala mwangati wa Israeli.”
27 Gakebetukile Samweli buno ende, Saulo akatile ku mwimbo wa nsulu zage nu zatikile. 28 Nu Samweli amubwide bunee: “Yehowa akutikya bukota bwa Israeli lelo, nu abukasa ku munyobe wakutinga busoga. 29 Nu lingo We uli Lutanuno lwa Israeli ntaneka buza aba ntanagaluka, kubuno nteli muntu buno agaluke.”
30 Nu Saulo abwide bunee: “Nagile, tondo nkukusega, nkutye kano kaluma lwabusio lwa bakulu ba bantu bane nu lwabusio lwa baIsraeli. Subya na nne, nikumbamine Yehowa, Kalaga wobe.” 31 Nu Samweli asubizie na Saulo nu Saulo akumbaminne Yehowa.
32 Nu Samweli abwide bunee: “Mvwilazi na Agagi, mukota wa Amaleki.” Nu Agagi amuvwilide na kyelele. Agagi abwide bunee: “Lebelebe nabezaga nakua.”
33 Samweli atendile bunee: “Anga bwakwilidwe bakikulu na bana na mwene wobe, ububo nyoko akukwilwa na mwana mu bakikulu.” Nu Samweli asesile Agagi byindi byindi lwabusio lwa Yehowa ku Gilgali. 34 Kusila Samweli endile ku Rama nu Saulo endile kwage ku numba ku Gibea wa Saulo. 35 Samweli ntamonenne lingo na Saulo aaba nu ku busi bwage bwa lukuo, tondo Samweli alilide Saulo, kubuno Yehowa eibezizie buno eimikile Saulo mwangati mu Israeli.