Davidi asombolwa kuba mwangati.
16
1 Nu Yehowa abwide Samweli bunee: “Busi bukizi buukasiga kulilila Saulo, nu namusombile asigala mwangati wa Israeli. Izazia iyega lyobe na mwambo nu enda. Nakusinga ku Yese wa Betelehemu, kubuno namonine mwangati mu bana bage.” 2 Nu Samweli abwide bunee: “Buni buninenda? Gongwe Saulo kubo, nti anita.” Nu Yehowa akwide bunee: “Wende wasumbia mubamba wa ngombe nu watende bunee: ‘Navwa kukasana kayulo ku Yehowa.’ 3 Wamane Yese ku kayulo. Nakulolesie buwakite. Wambongezie wozo u nakutende.”
4 Nu Samweli akitile bwamutendile Yehowa nu abasile ku Betelehemu. Bakulu ba ku mwino bagiliminaga mu kumukulumania nu babuzizie bunee: “Ndi wavwa mu bubobelelo?”
5 Nu akwide bunee: “Ee, mu bubobelelo. Navwa kukasana kayulo ku Yehowa. Mwiswagie lwabusio lwa Kalaga, nu vwazi na nne ku kayulo.” Nu engezie Yese nu bana bage nu abamanine ku kayulo. 6 Nu gabeingide, amonine ku Eliabu nu atendile bunee: “Lebelebe mubongibwa wa Yehowa eli lwabusio lwage.”
7 Tondo Yehowa abwide Samweli bunee: “Ntulole ku kilungi kyage aba ku bulazi bwage kubuno namusombile; kubuno Yehowa ntakumona anga bukumona muntu. Muntu akumona ku kikumonekako na meiso tondo Yehowa akumona ku mutima.”
8 Nu Yese amanine Abinadabu nu amutingizie lwabusio lwa Samweli, nu Samweli abwide bunee: “Aba wono, Yehowa ntamusombwede.”
9 Lingo Yese atingizie Shama lwabusio lwa Samweli, tondo Samweli atendile Yese bunee: “Yehowa ntasombwede wono.” 10 Lingo Yese atingizie mutubakamo wa bana bage lwabusio lwa Samweli, tondo Samweli atendile Yese bunee: “Yehowa ntasombwede babano.” 11 Nu Samweli abuzizie Yese bunee: “Ndi umpanga bana bobe babano?” Nu akwide bunee: “Kukili malibilo, akulanga mikoko.” Samweli abwide Yese bunee: “Singa muntu kumutola kubuno tatwikale kulia ndi ntevwa gano.”
12 Asingile muntu nu avule nage. Abezaga kansemane nu mbangilwa nunse. Nu Yehowa abwide bunee: “Zanzuka, mubongie mwambo, kubuno wono u wozo.”
13 Samweli akatile iyega lya mwambo nu amubongezie mwambo munkatini mwa mibuto zage. Muuza wa Yehowa avwilide Davidi na magala kutukila ku bubo busi. Nu Samweli azanzukile nu endile ku Rama.
Saulo amana Davidi kumututilaga nzenze.
14 Nu Muuza wa Yehowa atukile ku Saulo nu muuza mubi watukile ku Yehowa kumuzangiazangia. 15 Bakiti ba Saulo bamubwide bunee: “Kano kaluma muuza mubi ukutuka ku Kalaga u gukukuzangiazangia. 16 Mukota weitu, kasa bakiti bobe bwangato, balonde muntu wizi kututa nzenze. Nu gakuvwile muuza mubi kutuka ku Kalaga, atute nzenze na kuboko kwage nu wabobelele.”
17 Saulo abwide bakiti bage bunee: “Kasi ndondelazi muntu wizi kututa busoga nu mvwilazi nage.” 18 Umozi wa bakiti bage akwide bunee: “Namonine mwana umozi wa Yese wa ku Betelehemu wizi kututa nzenze busoga, ipuka lya magala, muntu wa bita, eli na lwatu nu mubili musoga, nu Yehowa eli gamozi nage.”
19 Ububo Saulo asingile migenzi ku Yese nu abwide bunee: “Nsingile mwana wobe Davidi, wozo ukulangaga mikoko.”
20 Yese akatile mpunda, nu tumpampa nu kikoba kya kulanga maku, nu kyana kimozi kya mpene, nu abisingile ku Saulo mu maboko ma Davidi mwana wage.
21 Davidi abasile ku Saulo nu amukitide. Saulo amutundile nunse nu Davidi abede mweki wa ngabo zage. 22 Saulo asingile mugenzi ku Yese kutenda bunee: “Itabizia buno Davidi abe mukiti wane, kubuno antananizia.”
23 Nu gatukaga muuza mubi ku Kalaga nu kuvwila Saulo, Davidi akataga nzenze nu kuzituta na kuboko kwage, nu nti Saulo abobelela nu nti aba na magala, nu muuza mubi nti wamutukila.