Goliata akubenga baIsraeli.
17
1 BaFilistini bakundamanizie mayombo mabo ku bita ku Soko, mwino wa Yuda. Babikile ido gasamba Soko nu Azeka mu Efesi-Damimu. 2 Saulo nu baIsraeli bakundamenne nu babikile ido mu kibitabita kya Ela. Beidongekile kuba kayikayika kwitana na baFilistini. 3 BaFilistini bemenne mu mwiduko ntungo emozi nu baIsraeli bemenne mu mwiduko mu engo ntungo nu kibitabita gabasamba. 4 Ipuka lyatukile ku ido lya baFilistini; izina lyage Goliati wa ku Gati; musakamo wage wabezaga mabusu mutuba nu kyindi. 5 Abezaga na nkumbu za nsubi ku itoe nu avwalaga nsulu za kyuma zasusania magamba. Zabezaga na buzitu bwigezye na shekeli za nsubi tununu tutano (5.000). 6 Avwalaga nsubi zatulwa ku magulu nu kilamba kya nsubi gasamba bituli. 7 Bunene bwa mwiya w'isumo lyage bwabezaga bwigezye na kasungu ka muluki nu isumo lyabezaga na buzitu bwa shekeli za kyuma nkama mutuba. Mweki wa ngabo zage endaga ga lwabusio lwage. 8 Emenne nu alalukile ku mayombo ma baIsraeli, ababwide bunee: “Kubuni kumwavule kwidongeka ku bita kwitana? Ndi nsili ipuka lya baFilistini nu beinyuwe tamuli bakiti ba Saulo? Sombolazi umozi kumuli agele kundi. 9 Ndi akosia kwitana na nne nu kunita nti iswe twabe bakobe beinyu. Tondo ndi namuvwama nu kumwita nti mwabe bakobe beitu nu kutukitila.”
10 MuFilistini abwide lingo bunee: “Lelo nkumulumbizia, iyombo lya Israeli, munsingile muntu, twitane.”
11 Saulo nu baIsraeli bansania gabongule ku moki ma muFilistini, batambile nu bakule boba nunse.
Davidi avwa kulola mibuto zage.
12 Davidi abezaga mwana wa wozo muEfurata wa Betelehemu-Yuda, izina lyage Yese. Yese abutile bana bamulume kinana, nu mu bindi bya Saulo abezaga ese mukungu. 13 Bana basatu batangi ba Yese bayangile Saulo ku bita. Nkula ku babo basatu bendile ku bita amanagwa Eliabu, wa babili amanagwa Abinadabu, nu wa basatu Shama. 14 Davidi u wabezaga malibilo; babo bana basatu batangi bayangile Saulo, 15 tondo Davidi atukile ku Saulo kwenda kulisia mikoko z'isi ku Betelehemu. 16 Wozo muFilistini avwaga nindu nu igolo, nu eidolesizie bindi makumi manazi.
17 Yese abwide mwana wage Davidi bunee: “Ekela basolonzi luzi lwa mabela mamano mokibwa nu tumpampa tutuno ikumi, nu itume lubilo ku ido kuli mibuto zobe. 18 Eka byindi ikumi bya mabele magaga kuli musondelezia wa kanunu kabo. Lola buli mibuto zobe nu vwa na kakengelezio kabo.”
19 Saulo nu bo nu bamulume bansania ba Israeli babezaga mu kibitabita kya Ela kwitana na baFilistini. 20 Davidi ayukile lukesikesi nu asigile mikoko na mulangi. Ekile muzigo nu endile anga bwamukakizizie Yese. Gaabasile ku ido, iyombo lyabezaga lise lyidongeka kwenda ku bita nu kulaluka na tukemi twa bita.
21 BaIsraeli nu baFilistini beibikile kayikayika kwitana, iyombo ku iyombo. 22 Davidi asigile muzigo mu maboko ma mulangi wa bintu nu eitumine lubilo ku iyombo. Gaabasile ku mibuto zage, ababuzizie misagu. 23 Gaatendanaga nabo, lola, ipuka, izina lyage Goliati, abakamine kutuka mu iyombo lya baFilistini. Atendile anga mamo moki maatendaga, nu Davidi amunguleko. 24 Gabamonine ku wozo muntu, baIsraeli bansania bamutinine nu bakule boba nunse.
Davidi akinda Goliati.
25 Nu baIsraeli batendile bunee: “Ndi wamona ku wozo muntu wabakamine kuno? Avule kulumbizia katuba ku Israeli. Ganaba muntu amwita nti mukota amugumie na bikulo byingi, amukase mukinga wage, nu akandule ba numba z'isi munkatini mwa baIsraeli.”
26 Davidi atendile ku bantu bemenne nage bunee: “Buni bwakitilwe wozo muntu ukwita wono muFilistini nu kutikizya Israeli nsoni? U nazi wono muFilistini utamonesibwa buno analinga mayombo ma Kalaga Mulami?”
27 Nu bantu bamwakwide anga mamo moki bunee: “Bubuno u bubakitile wozo muntu wamwite.”
28 Nkula zabo Eliabu ongule gatendaga Davidi na babo bantu, nu amwongedwe. Abwide bunee: “Kubuni kuwagelile kuno? Nu wasigile zezo mikoko mikeke mu kalula na nazi? Nizi lwikotio lwobe nu bubi bwa mutima wobe, kubuno wagelile buno ulole bita.”
29 Nu Davidi abuzizie bunee: “Kikizi kinakita kalazi? Nabuzagia tugu.” 30 Agalukile ku ungo nu amubuzizie lulo lubuzio lwabuzagia, nu bantu bamwakwide anga lilyo iyuki itangi.
31 Gabongule ku moki matendaga Davidi, bamasambede ku Saulo nu Saulo amumanine buno avwe kweli. 32 Davidi abwide Saulo bunee: “Mutima wa muntu unsania tagukutuke ku kabamba ka wozo. Mukiti wobe ende kwitana na wozo muFilistini.”
33 Saulo abwide Davidi bunee: “Ntunakosia kwenda kwitana na wono muFilistini, kubuno uli mwana muto nu we eli muntu wa bita kutukila ku busikila bwage.”
34 Nu Davidi akwide Saulo bunee: “Mukiti wobe akubezaga mulangi wa mikoko z'isi. Kwavule kimbwe nu dubu, nu zanyagile mukoko mu lusumba. 35 Naziyangile nu nazitile, nu nonezie mukoko mu kanua kazo. Zansolobokede nu nakatile ku luzelu lwazo nu nazilibwide nu kuzita. 36 Mukiti wobe eitile kimbwe nu dubu, nu muFilistini wono utamonesibwa abe anga umozi kuzo, kubuno alingile mayombo ma Kalaga Mulami.”
37 Lingo Davidi abwide bunee: “Yehowa wanonezie n'ibumbu lya kimbwe nu lya dubu, anonie mu kuboko kwa wono muFilistini.”
Nu Saulo abwide Davidi bunee: “Enda, Yehowa abe nobe.” 38 Saulo avwalikizie Davidi nsulu zage za bita, nkumbu za nsubi ku itoe nu nsulu za kyuma zasusania magamba. 39 Nu Davidi eiyanikile mwene wa Saulo gantata nsulu zage nu agelekile kwenda, tondo abezaga ntebilindika. Davidi abwide bunee: “Nsinavwama kwenda na bibino kubuno nsyabigomia.” Nu Davidi abitikizye. 40 Akatile kalembula kage mu kuboko nu eisombolede ku luuzi makozi matano makolombela nu amabikile mu nsago zage za bulangi bwa mikoko zaabezaga nazo. Nkumbi zage zabezaga mu kuboko nu asigelede bwigi na muFilistini.
41 MuFilistini asigelede bwigi na Davidi na mweki wa ngabo zage ga lwabusio. 42 Nu gamonine muFilistini ku Davidi, amubengile kubuno abezaga mwana muto nu kansemane nu mbangilwa. 43 Nu muFilistini abwide Davidi bunee: “Ndi nili mboa buno umvwile na tuti?” Nu muFilistini aswilide Davidi mu tulaga twage. 44 Lingo muFilistini abwide Davidi bunee: “Vwa kundi, nkukasana misuna zobe ku tuzoni twa mu mpelela nu nyama za mu lubanda.”
45 Tondo Davidi akwide muFilistini bunee: “Ukumvwila na mwene nu isumo nu kilamba. Tondo nne nkuvwa mu izina lya Yehowa, Mwiya Mayombo, u Kalaga wa mayombo ma Israeli, u walingile. 46 Lelo Yehowa akukukasana mu kuboko kwane. Nkukwita nu kusesa itoe lyobe. Nu lelo nkukasana bitumba by'iyombo lya baFilistini ku tuzoni twa mu mpelela nu ku nyama za mu lubanda. Nu kisi kinsania kyamenye buno kuli Kalaga mu Israeli. 47 Musanganano wono unsania wamenye buno Yehowa ntakonagia na mwene aba isumo, kubuno bita bili bya Yehowa nu amukasenne mu kuboko kweitu.”
48 Gemanukile muFilistini kwenda buno akulumanie Davidi, Davidi eitumine lubilo ku ibamba lya bita kukulumania muFilistini. 49 Nu Davidi eisile kuboko kwage mu nsago zage nu atolile ikozi. Alisile na nkumbi nu alibwide muFilistini ga malanga. Ikozi lyabotwede malanga mage nu agwede bukukama. 50 Ububo Davidi akindile muFilistini na nkumbi nu ikozi. Alibwide muFilistini nu kumwita. Takwabezaga mwene mu kuboko kwa Davidi, 51 ububo, Davidi eitumine lubilo nu emenne gabezaga muFilistini nu akatile mwene wage. Agutikizye mu musagi nu amwitile; amusesile itoe nago. Gamonine baFilistini buno ipuka lyabo lyakua, batinine.
52 BaIsraeli nu baYuda bazanzukile nu balalukile na tukemi nu kuyanga baFilistini aaba nu kubasa ku kibitabita, nu ku isula lya Ekuroni. BaFilistini basumitilwe, bagwede mu nzila za ku Saraimu aaba nu kubasa ku Gati nu ku Ekuroni. 53 BaIsraeli basubizie mu kuyangana na baFilistini nu basongezye binsania bya ku ido lyabo. 54 Davidi akatile itoe lya muFilistini nu alyekile ku Yerusalema; tondo abikile ngabo zage mu numba zage za hema.
55 Gamonine Saulo ku Davidi es'enda kukulumania muFilistini, abuzizie Abeneri, musondelezia w'iyombo bunee: “Abeneri, wono eli mwana wa nazi?” Nu Abeneri amwakwide bunee: “Ee, mukota, anga buguli mulami nsimwizi.” 56 Nu mwangati atendile bunee: “Buzia ku bango wono musikila eli mwana wa nazi?”
57 Gasubizie Davidi, kusila kwa kwita muFilistini, Abeneri amukatile nu kumulusia lwabusio lwa Saulo; nu itoe lya muFilistini lyabezaga mu kuboko kwa Davidi. 58 Nu Saulo amubuzizie bunee: “Uwe musikila, uli mwana wa nazi?” Nu Davidi amwakwide bunee: “Nili mwana wa mukiti wobe Yese wa ku Betelehemu.”