Boazi asonga Ruta.
4
1 Boazi endile kwikala ga mwingilo wa mwino, nu amonine, wozo mubuto watekwide Boazi atingile. Boazi amubwide bunee: “Kilemba kyane, vwa kuno, wikale gano.” Atukile mu nzila nu eikede go. 2 Mu bakulu ba mwino, Boazi amanine bamulume ikumi nu ababwide bunee: “Ikalazi gano.” Nu beikede go. 3 Boazi abwide wozo mubuto mukuluzi bunee: “Naomi watukile ku Moabu akukunzia isoa lyasigile Elimeleki mubuto weitu. 4 Nu nakengede kukusambalila nu kukutenda bunee: ‘Kunza lyo lwabusio lwa babo beikala gano nu bakulu ba mibuto zeitu. Ndi walikulule, nti wakulula lyo, nu ndi ntwalikulule, ntende nimenye. Kubuno takuli ungo kumbusa kwobe unalikulula, tugu nne.’”
Nu atendile bunee: “Nkulikulula.”
5 Kusila Boazi atendile bunee: “Busi buwakunze lilyo isoa ku kuboko kwa Naomi, ukukunza lingo Ruta wa Moabu, musigala wa wozo wakule buno uzanzule izina lya wozo wakule ku ntiko zage.”
6 Nu wozo mubuto abwide bunee: “Nsikuvwama kulikulula buno libe lyane kubuno linavwa kubigia ntiko zane. Kasi nitabizia buno ulikunze uwenyene, nsikuvwama kulikulula.”
7 Wakalazi mu Israeli, lukita lwa bukuluzi aba bukunza lwabezaga buno, kukokomezia kitondo, umozi nti atikya kisalapata nu kukikasa ku munyage. U bwabezaga kamenyikilo mu Israeli. 8 U bubo wozo mubuto atendile ku Boazi bunee: “Ikunzile lyo uwenyene.” Nu atikizye kisalapata kyage.
9 Boazi abwide bakulu nu bantu bansania bunee: “Buno busi muli balongeki buno nakunza ku kuboko kwa Naomi, binsania byasigile Elimeleki, nu binsania byasigile Kiliona nu Malona. 10 Lingo, nakunza Ruta muMoabu, musigala wa Malona, abe mukazi wane buno izina lya wozo wakule lisigale ku ntiko zage, buno izina lya wozo wakule talizimine mu mibuto zage aba mu mwino wage. Inyuwe muli balongeki lelo.”
11 Nu bantu bansania babezaga ga mwingilo wa mwino nu bakulu batendile bunee: “Twabulongeka. Yehowa akase wono mukikulu ukwingila mu numba zobe mponga, buno abe anga Rakeli nu Lea, bobabili bubalindizie numba za Israeli. Ugume mu Efurata nu umenywe mu Betelehemu. 12 Numba zobe zibe anga numba za Perezi wabutilwe na Tamari nu Yuda, mu ibuta lyakukase Yehowa na wono mukikulu.”
13 Ububo Boazi akatile Ruta nu abede mukazi wage. Mu nkungu zeiyamine nage, Yehowa amukasizie kweka iyimi nu abutile mwana wamulume. 14 Nu bakikulu babwide Naomi bunee: “Yehowa aganunwe utakusigile mu buno busi geteli mubuto mukuluzi. Izina lyage lisambalwe mu Israeli. 15 Asubya kalamo kuguli nu akulisie mu bukungu bwobe, kubuno mukamwana wobe wakwelamine, uli musoga kuguli kutinga bana bamulume mutubakamo, amubutile.”
16 Naomi ekile wozo mwana ga bukuba bwage nu abede mulezi wage. 17 Bakikulu banyage bamwinikile izina nu batendile bunee: “Naomi abutile mwana wamulume.” Nu bamwinikile Obedi; abezaga isi wa Yese, isi wa Davidi.