Ruta ayanga lusungu lwa Naomi.
3
1 Nu Naomi, ninabyala, amubuzizie bunee: “Mukinga wane, ndi nsinakulondela bulami, umone bubobelelo? 2 Kengela, Boazi eli mubuto weitu. Ukubezaga gamozi na bakikulu bakumukitila. Lola, we es'apepa shayiri ga mulungu mu kindi kya lelo. 3 Oga, wibongie mwambo nu kuvwala nsulu zobe nsoga, nu gela ku mulungu wa kususulila makanda. Tugu, ntwidolesie ku wozo muntu aaba nu gaasile kulia nu kunua. 4 Geiyombeke, nti wamenya kiziki kyeiyombeka kukyo. Kusila nti wenda nu kulimbula ku magulu mage, nu wiyombeke kunsi kwa magulu mage. We akubule buwakite.” 5 Amwakwide bunee: “Bunse buwambula nabukite.”
6 Agelile ku mulungu wa kususulila makanda nu akitile anga bunse bwamukakizizie ninabyala. 7 Gasilile Boazi kulia nu kunua, mutima wage wabogilebogile, nu endile kwiyombeka mu ntungo n'ibimbi. Ruta avule alomboka, alimbwide ku magulu mage nu eiyombekile. 8 Munkatini mwa kindi, muntu wozo asalimine nu eigalukizye, eitangede ku mukikulu eiyombeka kunsi kwa magulu mage. 9 Abuzizie bunee: “Uwe u nazi?” Nu amwakwide bunee: “Nne u Ruta, mukiti wobe. Kukila mukiti wobe na nsulu zobe, kubuno uli mukuluzi weitu.”
10 Abwide bunee: “Mukinga wane, ukaswe mponga na Yehowa. Walolesia busoga bwobe buzinda kutinga butangi kubuno ntwayangile basikila, bazambi aba bagumi. 11 Kano kaluma, mukinga wane, ntukue boba. Bubo bunsania buwatenda nakukitile kubuno bansania ba kweitu bamenya buno uli mukikulu musoga. 12 Lebelebe buligo buno nili mukuluzi umozi, tondo kuli ungo mukuluzi eli bwigi kuntinga. 13 Ikala kindi kikino, nu mu nindunindu ndi akukulule, nti busoga akukulule. Nu ndi ntatunda kukukulula nti, bukulama Yehowa, nne nakukulule. Iyombeke aaba nu busi bwakya.”
14 Ububo eiyombekile kunsi kwa magulu mage aaba nu kukya kwa busi nu ayukile lukesikesi nti muntu nteisongolola ungo, kubuno Boazi atendile bunee: “Tabumenywe buno mukikulu abasile ku mulungu wa kususulila makanda.” 15 Boazi abwide bunee: “Vwa na kikwembe kyobe, ukyanze.” Akyanzile nu Boazi aganzile byanzi mutuba bya shayiri nu amukasile byo.
Ruta asubize ku mwino. 16 Abasile ku ninabyala. Ninabyala amubuzizie bunee: “Misagu mikizi, mukinga wane?” Ruta amusambalide bunsania bwamukitila Boazi. 17 Atendile bunee: “Ankasile bibino byanzi mutuba bya shayiri kubuno antendile bunee: ‘Ntunasubya ku nyokobyala maboko bwasi.’”
18 Naomi abwide bunee: “Mukinga wane, lindila aaba nu wamenya bwabe kitondo kikino, kubuno wozo muntu ntabobelele aaba nu azindilizie kitondo kyongo lelo.”