Boazi akwila Ruta kyombo.
2
1 Naomi abezaga na mubuto w'iba wage, muntu munene mwiya bikulo mu kikanga kya Elimeleki. Amanagwa Boazi. 2 Ruta muMoabu abwide Naomi bunee: “Nkutunda kwenda ku isoa kusongya mintenga za shayiri kumbusa kwa wozo waammonene kyombo.” Nu amwakwide bunee: “Mukinga wane, enda.” 3 Endile nu asongizye mu isoa kumbusa kwa bakazi ba shayiri. Bunene bwage, eingide mu isoa lya Boazi, wa kikanga kya Elimeleki. 4 Nu, Boazi atukile ku Betelehemu nu abwide bakazi ba shayiri bunee: “Yehowa abe n'inyu.” Nu bamwakwide bunee: “Yehowa akukase mponga.” 5 Boazi abuzizie mukiti wabikilwe kulola bakazi ba shayiri bunee: “Mukinga wa nazi wono?”
6 Mukiti wabikilwe kulola bakazi ba shayiri amwakwide bunee: “Eli mukinga muMoabu waavule na Naomi kutuka ku kisi kya Moabu. 7 Nu we ambuzizie bunee: ‘Ndi witabizia, nkase bwangato nisongye mintenga gasamba mikanda kumbusa kwa bakazi ba shayiri.’ Avule nu eli gago kutukila mu nindunindu aaba nu kano kaluma. Tugu umwinwe kakeke ga lusu.”
8 Nu Boazi abwide Ruta bunee: “Mukinga wane, ungwilila; ntwende kusongya mintenga mu lingo isoa aba ntutuke mu lilino tondo sigala bwigi na bakikulu bakunkitila. 9 Lola tugu ku isoa libakukala mulyo nu ubayange. Natendile na basikila buno tabeitubye kuguli. Ndi wakua na mpusia nti wenda ku malega nu wanwage ku mazi matagage basikila.”
10 Ruta akumbaminne nu kwikya malanga mage gansi nu amubuzizie bunee: “Buni bunamona mponga ku meiso mobe buno unkengele, nu nili mugeni?”
11 Boazi amwakwide bunee: “Bansambalide bunsania buwakitide nyokobyala kumbusa kwa lukuo lwa iba wobe nu buwasigile so nu nyoko nu kisi kyobe kya kubutwa nu kuvwa ku bantu baguteizi. 12 Yehowa alige mulimo wobe nu Yehowa, u Kalaga wa Israeli, nyene byupi biwavule kukumbatilwa munda mwabyo, akukase lukalilo lwakuka.”
13 Ruta atendile bunee: “Mukota wane, nimone mponga ku meiso mobe, kubuno wambobelezia nu watenda busoga ku mutima wa mukiti wobe. Nu nsili nunsania anga umozi wa bakikulu bakukukitilaga.”
14 Mu nkungu za kulia Boazi amutendile bunee: “Wavwa kuno nu walie ku kampampa nu watobe ntonge zobe mu maku magaga.”
Ububo eikede bwigi na bakazi ba shayiri nu amukasile ku shayiri zalangwa. Alile, embukile, nu abikile milanga. 15 Nu gazanzukile Ruta nu endile kusongya mintenga, Boazi akakizizie basikila bamukitilaga bunee: “Anasongya aba gasamba mikanda nu tamumwitie na nsoni. 16 Lingo nti mwamukolokezya mintenga imozi ku mikanda zimukukala, asongye nu tamumuzugile.”
17 Asongezye mu isoa aaba nu mwigolo nu asuswide zaasongezye. Zabede bwigi ku efa emozi.a 18 Awekile nu endile nago ku mwino. Alolesizie ninabyala wasongezye nu amukasile milanga zaabikaga.
19 Ninabyala amubuzizie bunee: “Kuni kuwasongezya lelo? Kuni kuwakitide mulimo? Akaswe mponga wozo wakukengede.”
Nu amusambalide kwa nazi kwakitide mulimo. Atendile bunee: “Izina lya wozo muntu kunakitide mulimo lelo lili Boazi.”
20 Naomi abwide mukamwana wage bunee: “Akaswe mponga na Yehowa, wozo utelekela mponga zage ku balami nu ku babo bakule.” Naomi amutendile lingo bunee: “Wozo muntu eli mubuto weitu wa bwigi, umozi wa mibuto bakuluzi beitu.”
21 Ruta muMoabu atendile bunee: “Lebelebe ambwide lingo bunee: ‘Ikala bwigi na bakiti bane aaba nu gabakasila matubulo mane mansania.’”
22 Naomi abwide mukamwana wage Ruta bunee: “Mukinga wane, buli busoga wendage na bakikulu bakumukitila, buno bantu tabakusange mu lingo isoa.”
23 Ububo, asigede bwigi na bakikulu bakitilaga Boazi kusongya aaba nu kusila kwa matubulo ma shayiri nu matubulo ma ngano. Nu eikede na ninabyala.