NGATU
Bita na baKanana.
1
1 Kumbusa kwa lukuo lwa Yosua, baIsraeli babuzizie Yehowa bunee: “Nazi kutuli wabe mutangi kubakama ku baKanana kulwana nabo?” 2 Yehowa akwide bunee: “Yuda u wabakame. Lolazi, nise nakasana kisi mu kuboko kwage.” 3 Nu Yuda atendile ku mubuto wage Simeoni bunee: “Bakama na nne mu kisi kinalasidwe nu twitane na baKanana, nu nne nende nobe mu kikyo kiwalasidwe.” Ububo Simeoni endile nage.
4 Yuda abakamine, nu Yehowa akasenne baKanana nu baPerizi mu maboko mabo. Beitile tununu ikumi (10.000) twa bantu ku Bezeki. 5 Nu bamonine ku Adoni-Bezeki mu Bezeki nu beitenne nage nu beitile baKanana nu baPerizi. 6 Adoni-Bezeki atinine tondo bamuyangile nu bamukatile, nu bamusesile binkumu bya maboko nu mpanda za mulume za masindi. 7 Adoni-Bezeki atendile bunee: “Bakota makumi mutubakamo babezaga baseswa binkumu bya maboko nu mpanda za mulume za masindi, basongagia mbobu kunsi kwa meza mane; Kalaga andigia anga bunakitile.” Bendile nage ku Yerusalema, nu akule kuko.
8 BaYuda beitenne na Yerusalema nu bagukatile. Bagwitile na myene za nganda nu bagisizie mwino. 9 Kumbusa, baYuda bakumbile kulwana na baKanana beikalaga mu kisi kya tukililo nu ku Negevi nu ku kibitabita. 10 Nu baYuda balwanizie baKanana beikalaga ku Hebroni, wamanagwa Kiriati-Arba, nu beitile Sesayi, nu Ahimani nu Talmayi. 11 Kutuka gago, bendile kulwania beiya Debiri wamanagwa Kiriati-Seferi.
12 Kalebu atendile bunee: “Wozo wakindage Kiriati-Seferi nu kugukata, namukase Akisa mukinga wane kumusonga.” 13 Otinieli, mwana wa Kenazi, muto wa Kalebu, agukatile; ububo Kalebu amukasile mukinga wage Akisa kuba mukazi wage.
14 Nu gabasile mukikulu ku iba wage, Akisa amusindikile buno asege isi Kalebu isoa. Gakimine Akisa ga mpunda zage, Kalebu amubuzizie bunee: “Kikizi kyukutunda?”
15 Nu amutendile bunee: “Nkase mponga kubuno wambika ku kalula ka Negevi. Nkase nu tunuabalongo twa mazi.” Nu Kalebu amukasile tunuabalongo twa kuntata nu twa kunsi.
16 Bana ba Keni, isibyala wa Musa, bendile gamozi na baYuda kutuka ku mwino wa miti za bibila, kubakama ku kalula ka Yuda, wabezaga mu Negevi bwigi na Aradi; nu bendile kwikala gamozi na bantu ba kuko.
17 Nu baYuda bendile gamozi na mibuto zabo, u baSimeoni, nu beitile baKanana beikalaga mu Zefati, nu baguzikizye nunse. Ububo izina lyago lyamanagwa Horma. 18 Lingo baYuda bakatile Gaza, Askeloni nu Ekuroni gamozi na myaga zazo.
19 Yehowa abezaga gamozi na baYuda nu bakatile kisi kya tukililo; tondo tabavwamine kupumbia beikalaga mu kibitabita kubuno babezaga na tuyanga twa byuma. 20 Bakasile Kalebu Hebroni anga bwatendile Musa; nu gago, apumbizie bana basatu ba Anaki. 21 Tondo baBenjamina tabapumbizie baYebusi beikalaga mu Yerusalema; ububo baYebusi beikede gamozi na bantu ba Benjamina mu Yerusalema aaba nu lelo.
22 Bantu ba numba za Yosefu nubo babakamine kulwania Beteli. Yehowa abezaga gamozi nabo. 23 Nu baYosefu basingile kutitika Beteli. (Izina lya Beteli lyalingile kumanwa Luzi). 24 Batitiki bamonine ku wamulume akutuka ku mwino nu bamutendile bunee: “Tulolesie nzila za kwingila mu mwino nu twakukitile busoga.” 25 Ububo abalolesizie nzila za kwingila mu mwino nu bagwitile na mwene wa nganda, tondo basigile wozo wamulume nu kikanga kyage kinsania. 26 Nu we endile ku kisi kya baHiti. Obakile mwino nu kuwinika izina lya Luzi, nu lili izina lyago aaba nu lelo.
27 Tondo baManase tabapumbizie beikalaga mu Beti-Sani, aba Tanaki, aba Dori, aba Ibileamu, aba Megido, nu miino zazo mikeke, kubuno baKanana tabazigile kutuka mu kikyo kisi. 28 Nu gamonine baIsraeli magala, babikile baKanana anga bakobe nu tababapumbizie nunse.
29 Nu baEfuraimu tabapumbizie baKanana beikalaga mu Gezeri, tugu baKanana beikede munkatini mwabo mu Gezeri.
30 Aba baZebuluni tabapumbizie beikalaga mu Kitironi, aba beikalaga mu Nahaloli, tondo baKanana beikede munkatini mwabo nu babakitide milimo anga bakobe.
31 BaAseri tabapumbizie beikalaga mu Ako, aba beikalaga mu Sidoni, aba baAlabu, aba baAkizibu, aba baHelba, aba baAfeka, aba baRehobu, 32 tugu baAseri beikede munkatini mwa baKanana beikalaga mu kisi kubuno tababapumbizie.
33 Aba baNafutali tabapumbizie beikalaga mu Beti-Semesi, aba beikalaga mu Beti-Anati, tondo beikede munkatini mwa baKanana beiya kisi; tondo beikalaga mu Beti-Semesi nu mu Beti-Anati babede bakobe babo.
34 BaAmori basindikile baDani ku miduko; tabazigile bakumba ku kibitabita. 35 Nu BaAmori tabazigile kutuka mu Heresi, mu Ayaloni nu mu Salabimu, tondo kuboko kwa numba za Yosefu kwabede kubibu kubeli nu babede bakobe babo. 36 Nu mwaga wa baAmori watukide ku kilenge kya Akarabimu, ku Sela, nu kubakama.