YOSUA
Kalaga akukakizia Yosua.
1
1 Gakule Musa, mukiti wa Yehowa, Yehowa atendile ku Yosua mwana wa Nuni, mukasia wa Musa, bunee: 2 “Mukiti wane Musa es'akua. Zanzuka kano kaluma usoke Yordani, uwe nu bantu babano bansania, mwingile mu kisi kinkukasa bana ba Israeli. 3 Kiziki na kiziki kikanyantaga magulu meinyu, nasilile kumukasa kyo anga bunalagile Musa. 4 Kutukila ku kalula nu ku Lebanoni lino, aaba nu luuzi lunene lwa Furati, u kutenda ku kisi kinsania kya baHiti aaba nu ku kitatenge kinene kya kunsi kwa kisi, u kyabe kisi kyeinyu. 5 Takwabe muntu wavwame kwemana lwabusio lwobe bindi binsania bya kalamo kobe; anga bunabezaga na Musa, u bunabe nobe, nsikakwibilila aba nsikakusiga. 6 Ube na magala nu bupuka, kubuno uwe u wiyane kisi kinalumbilide beisibo buno nabakase. 7 Tugu ube na magala nu bupuka nunse, langa nu kukita mulembe unsania wa Musa mukiti wane anga bwakukakizizie; ntwende ku seidume aba ku seikazi buno ukaswe mponga kunsania kuukendaga. 8 Wono mukanda wa mulembe tagutuke mu kanua kobe tondo ugukengele musi nu kindi buno uvwame kulanga nu kukita binsania byasanzwa mugo; ububo nzila zobe zabe na mponga nu bitondo binsania biwakite byabe bisoga. 9 Ndi nsyakukakizizie? Ube na magala nu bupuka; ntukue boba, aba ntuzangezange, kubuno Yehowa, Kalaga wobe, eli gamozi nobe kunsania kuwendage.”
Bantu bagomezie na Yosua kumwanza.
10 Ububo Yosua akakizizie bemanizi ba bantu bunee: 11 “Tingazi mu biziki, mukakizie bantu bunee: ‘Mulongeke malia. Kumbusa kwa bindi bisatu mwasoke Yordani kwingila nu kwangata kisi kikumukasa Yehowa, Kalaga weinyu, buno mwakyangate.’”
12 Yosua atendile baRubeni nu baGadi nu kyindi kya kikanga kya Manase bunee: 13 “Kengelazi iyuki lyamukakizizie Musa, mukiti wa Yehowa, bunee: ‘Yehowa, Kalaga weinyu, amukasile kyumuno nu amukasile kisi kikino.’ 14 Bakikulu beinyu, bana beinyu nu bituganwa byeinu byasigale mu kisi kyamukasile Musa mu wono mutili wa Yordani; tondo inyuwe mwasoke na ngabo zeinyu lwabusio lwa mibuto zeinyu, bamulume banse beli mapuka, nu kubakasia; 15 aaba nu gakase Yehowa mibuto zeinyu kyumuno anga inyuwe, nu bangate nubo kisi kikubakasa Yehowa, Kalaga weinyu; mu zezo nkungu mwasubye ku kisi kyeinyu kya bwiyani nu kubogaboga mukyo, kyamukasile Musa mukiti wa Yehowa ku mutili wa Yordani kukutukaga kisongo kya busi.”
16 Nu bakwide Yosua bunee: “Bunsania buwatukakizia twabukite nu kunsania kuwatusinge, twende ko. 17 Anga butungwaga Musa mu bitondo binsania, twakungwe nu uwe bubo; tugu Yehowa, Kalaga wobe, abe nobe anga bwabezaga na Musa. 18 Muntu unsania utanza ikakizio lyobe nu utakungwa moki mobe mu bunsania buukumukakizia nti eitue, tondo ube na magala nu bupuka.”