Batitiki ba Yeriko
2
1 Nu Yosua mwana wa Nuni asingile bamulume babili mu lumbisombiso kutuka ku Sitimu anga batitiki, abakakizizie bunee: “Mwende mulole kisi, u kutitika aaba ku Yeriko.” Bendile nu beingide mu numba za kitazi kyamanagwa Rahabu nu beikede mumo. 2 Mukota wa Yeriko asambalidwe bunee: “Lola bamulume bamozi ba baIsraeli bavule mwigolo lelo kutitika kisi kikino.” 3 Ububo mukota wa Yeriko asingile musagu ku Rahabu, atendile bunee: “Basia babo bamulume bavule nu kwingila mu numba zobe, kubuno bavule kutitika kisi kinsania.”
4 Tondo wozo mukikulu asangile abisa babo bamulume babili, nu akwide bunee: “Ee, babo bamulume babasile kwane, tondo nsyamenyine kiziki kibatukile. 5 Gakandilwe lwibi lwa mwino mu kwida kwa busi, babo bantu batukile. Nsizi kubendile. Mubayange lubilo. Embe mwabasange.” 6 Tondo asangilwe ababisa gantata ga numba mu mpeku zaasangile anza gago. 7 Ububo bantu babayangile mu nzila z'isokelo lya Yordani, nu kazanga kongo lwibi lwa mwino lwakandilwe.
8 Lwabusio lwa kwiyombeka kwabo, wozo mukikulu endile kubasanga gantata ga numba, 9 nu abwide babo bantu bunee: “Nizi Yehowa amukasile kikino kisi nu boba bweinyu bwatutambia nu beiya kisi banse bese bakoloboka ku kabamba keinyu. 10 Tuse tungwa ku lukita lwa bwamukamizizie Yehowa mazi ma Kitatenge Kyakisimana gamwatukile ku Misri, nu kimwakitile ku Sihoni nu Ogi, bakota babili ba baAmori, babo bamwitile nunsania ku mutili wa Yordani kukutukaga kisongo kya busi. 11 Nu gatungule ku bubo, mitima zeitu zatambile nu bupuka tabwabede lingo mutuli ku kabamba keinyu, kubuno Yehowa, Kalaga weinyu, eli wozo Kalaga uli mwigulu nu gansi ga kisi. 12 Kano kaluma mundumbilile mu izina lya Yehowa buno bunamukitide busoga, u bumwankitile busoga ku kikanga kyane, nu kunkasa kakengelezio ka bulili, 13 buno mwalange tulamo twa tatane nu twa mmane nu twa mibuto zane nu bansania ba beli nabo, nu mwonie tulamo tweitu buno tatukue.”
14 Nu bamulume bamwakwide bunee: “Tulamo tweitu ku tulamo tweinyu! Ndi ntwasambala bitondo byeitu, nti twamukitile busoga nu bulili gatukase Yehowa kisi.”
15 Ububo abagezizie mu muzigi g'idilisa, kubuno numba zage zabezaga zobakwa mu kitutu kya mwino, 16 nu abatendile bunee: “Mwende ku mwiduko buno bakumuyanga tabamukate; mubisame kuko bindi bisatu aaba nu gasubye bakumuyanga, kumbusa nti mwiyendela.”
17 Nu bamulume bamutendile bunee: “Tatwabe na bwagi ku kikino kilumbilo kyobe kiwatulumbizia. 18 Lola, mu nkungu zitwingile mu kisi, swika musinge wono wakisimana mu idilisa gago gawatugezizie, nu kundamania so nu nyoko nu mibuto zobe nu bansania ba so mu numba zobe. 19 Muntu unsania wabasage mu numba zobe nu kubasa mu nzila, mikila zage zabe gantata g'itoe lyage nu tatwabe na katati; nu muntu unsania wasangwe gamozi nobe mu numba, ndi muntu alambya kuboko kweli kumwita, nti mikila zage zabe gantata g'itoe lyeitu. 20 Nu ndi wasambala musagu wa mulimo weitu, tatwakandwe lingo na kilumbilo kyobe kiwatulumbizizie.”
21 Nu abatendile bunee: “Bube anga bumwatenda.” Ababasizie nu bendile; nu aswikile musinge wakisimana g'idilisa.
22 Bendile nu kubasa ku mwiduko, beikede kuko bindi bisatu aaba nu gasubizie babo babayangaga. Nu babo babayangaga babalondile ku nzila insania tondo tababamonine. 23 Ububo bamulume babo babili basubizie, bagelile mu mwiduko, basokile luuzi nu babasile ku Yosua, mwana wa Nuni, bamusambalide binsania bibamwenne kubyo. 24 Nu batendile ku Yosua bunee: “Lebelebe Yehowa abika kisi kinsania mu maboko meitu, kubuno aba beiya kisi bansania batamba ku kabamba keitu.”