BaIsraeli basoka Yordani.
3
1 Yosua nu baIsraeli bansania batukile lukesikesi ku Sitimu nu babasile ku Yordani, nu beikede gago nti tabesoka. 2 Nu gabede kumbusa kwa bindi bisatu, bemanizi batingile gasamba numba, 3 nu bakakizizie bantu bunee: “Gamwamone Sanduku z'Idagano lya Yehowa, Kalaga weinyu, nu basankoga baLawi bazeeka, nti mwazanzuke nu kuziyanga, 4 nu nti mwasige mpapa gamusamba nazo, anga masindi kanunu (1.000), tamuzikunde. Zalolesie nzila zimwatunganana kwenda muzo, kubuno tamutingaga mu nzila zeno lingo.” 5 Yosua abwide bantu bunee: “Mwiyengie, kubuno lubi Yehowa akite miganogano munkatini mweinyu.”
6 Yosua atendile basankoga bunee: “Ekazi Sanduku z'Idagano, mutinge lwabusio lwa bantu.” Bekile Sanduku z'Idagano, batingile lwabusio lwa bantu.
7 Yehowa abwide Yosua bunee: “Lelo nalinge kukukutya lwabusio lwa meiso ma kilongo kinsania kya baIsraeli, bamenye buno nabe gamozi nobe anga bunabezaga gamozi na Musa. 8 Kakizia basankoga bakwekaga Sanduku z'Idagano bunee: ‘Nkungu zimwabase ku isokelo lya mazi ma Yordani, mwemane mu Yordani.’”
9 Yosua abwide bantu baIsraeli bunee: “Vwazi mungwe bitondo bya Yehowa, Kalaga weinyu.” 10 Yosua atendile bunee: “Ku kitondo kikino mwamenye buno Kalaga Mulami eli gamozi n'inyuwe, nu We nteide kupumbia baKanana lwabusio lweinyu, baHiti nu baPerizi nu baGirgasi nu baAmori nu baYebusi. 11 Lolazi, Sanduku z'Idagano lya Mukota wa kisi kinsania zamutange nu kwingila mu Yordani. 12 Nu kano kazanga sombolazi tanga bantu ikumi nu babili mu bikanga bya Israeli, muntu umozi mu kikanga na kikanga. 13 Nu bwabe mu kako kazanga ganyante bikwata a bya masindi ma basankoga, babo bakweka Sanduku za Yehowa, Mukota wa kisi kinsania, mu mazi ma Yordani, nti mazi ma Yordani malekanuke, mamo ma kunsi magele nu mamo ma kuntata memane mubimbi.”
14 Nu gabede bantu batuka mu numba zabo za hema kusoka Yordani, basankoga bekile Sanduku z'Idagano lwabusio lwa bantu. 15 Mu nkungu zezo gabekaga Sanduku, babasile ku Yordani nu magulu ma basankoga makimine mu mazi m'isokelo, kubuno ku Yordani kwabezaga mwiyalo mu bindi binsania bya matubulo, 16 mazi magelaga kutuka kuntata memanine, nu mubimbi wamo wabakamine aaba nu ku Adamu, mwino guli bwigi na Zaretani, nu mazi magelile ku kitatenge kya Araba, u Kitatenge kya Munkange, malekanukile nunsania; nu bantu basokile bwigi na Yeriko. 17 Basankoga bekaga Sanduku z'Idagano lya Yehowa bemanine na magala kwakama munkatini mwa Yordani, baIsraeli bansania basokile kwakama, aaba nu kilongo kinsania kyasilile kusoka Yordani.