Kwingila mu kisi ky'idagano.
4
1 Nu gasilile kilongo kinsania kusoka Yordani, Yehowa abwide Yosua bunee: 2 “Tola bantu ikumi nu babili munkatini mwa bantu; muntu umozi wa kikanga na kikanga, 3 nu bakakizie bunee: ‘Songyazi makozi ikumi nu mabili mu Yordani, gago gemanaga masindi ma basankoga, nu mumeeke lisilya nu kumasiga ku ido, kiziki kimwiyombeke mu kindi kikino.’” 4 Yosua amanine bantu ikumi nu babili mu baIsraeli, babo baabikile kayikayika, muntu umozi mu kikanga na kikanga. 5 Nu Yosua abatendile bunee: “Tingazi lwabusio lwa Sanduku z'Idagano lya Yehowa, u Kalaga weinyu, mu Yordani, nu mubike muntu na muntu ikozi ga kituli kyage, anga buli maganzo ma bikanga bya baIsraeli, 6 mabe kalolesio munkatini mweinyu. Gakabuzia bana beinyu kumbusa bunee: ‘Bwisulilwa bwa makozi mamano buli bukizi?’ 7 Nu mukabaakula buno mazi ma Yordani malekanukile lwabusio lwa Sanduku z'Idagano lya Yehowa, nkungu zizasokaga luuzi lwa Yordani, mazi ma Yordani malekanukile. Ububo makozi mamano mabe kakengelezio ku bantu ba Israeli ku milyalya.”
8 Nu bantu ba Israeli bakitile anga bwabakakizizie Yosua, nu basongezye makozi ikumi nu mabili munkatini mwa Yordani anga bwabwide Yehowa ku Yosua, bumozi na maganzo ma bikanga bya bantu ba Israeli, bamekile lisilya gamozi nabo ku kiziki kibeiyombekile, nu bamabikile gansi gago.
9 Nu Yosua eimikile makozi ikumi nu mabili munkatini mwa Yordani, ga kiziki kyemanaga masindi ma basankoga bekaga Sanduku z'Idagano, numo meli kuko aaba nu lelo.
10 Gazindilide binsania byakakizagia Yehowa ku Yosua buno atende bantu, basankoga bekaga sanduku bemenne munkatini mwa Yordani anga bunsania bwakakizizie Musa ku Yosua. Bantu basokile lubilo, 11 nu gasilile kusoka bantu bansania, Sanduku za Yehowa nu basankoga basokile ku meiso ma bantu. 12 Bamulume ba Rubeni nu ba Gadi nu kyindi kya kikanga kya Manase basokile na ngabo zabo lwabusio lwa baIsraeli, anga bwabakakizizie Musa; 13 bwigi na bantu tununu makumi manazi (40.000) kayikayika kwitana bita basokile lwabusio lwa Yehowa ku bita, ku kibitabita kya Yeriko.
14 Mu bubo busi Yehowa akutizie Yosua lwabusio lwa baIsraeli bansania, nu bamukule boba anga bubakule Musa boba bindi binsania bya kalamo kage.
15 Nu Yehowa abwide Yosua bunee: 16 “Kakizia basankoga bakweka Sanduku z'Idagano buno batuke mu Yordani.” 17 Ububo Yosua akakizizie basankoga bunee: “Vwazi. Mutuke mu Yordani.” 18 Nu gatukile basankoga bekaga Sanduku z'Idagano lya Yehowa munkatini mwa Yordani nu bikwata bya masindi ma basankoga byanyantile ku mutili kwakama, mazi ma Yordani masubizie mu kiziki kyamo nu mwiyalo wiyalile lingo anga buwabezaga.
19 Bantu batukile ku Yordani ku kindi ky'ikumi kya mwezi mutangi nu beiyombekile ku Gilgali ku mwaga wa kuntata kwa Yeriko. 20 Nu Yosua eimikile makozi ikumi nu mabili mabasongezye mu Yordani. 21 Atendile ku baIsraeli bunee: “Gakaba mu bindi bya kumbusa kungwa ibuta lyeinyu likubuzia beisibo bunee: ‘Buni buli bwisulilwa bwa makozi mamano?’ 22 Mukaakula bana beinyu bunee: ‘BaIsraeli basokile Yordani akama. 23 Kubuno Yehowa, Kalaga weinyu, amukamizizie mazi ma Yordani aaba nu ga mwasilile kusoka, anga bwakitile ku Kitatenge Kyakisimana, kyakamizie aaba nu gatwasilile kusoka, 24 buno bantu bansania ba kisi bamenye buno kuboko kwa Yehowa kuli na magala, buno mukue Yehowa, Kalaga weinyu, boba ku milyalya.’”