Boba bwa baKanana.
5
1 Gongule bakota bansania ba baAmori, babo babezaga lisilya lya Yordani ku ntungo za kunsi, nu bakota bansania ba baKanana bwigi na kitatenge, buni bwakamizie Yehowa mazi ma luuzi lwa Yordani lwabusio lwa bantu ba Israeli, aaba nu gabasilile kusoka lisilya, mitima zabo zakutukile, nu tababezaga na bupuka lingo ku kabamba ka baIsraeli. Kumonesibwa.
2 Ku nkungu zezo Yehowa abwide Yosua bunee: “Kita myene mikali za makozi nu monesia bantu ba Israeli limbizi lya mabili.” 3 Yosua akitile myene mikali, amonesizie bantu ba Israeli ku Gibea Haaraloti. a
4 Nu Yosua abamonesizie ku kabamba kakano: bamulume bansania batukile ku Misri, u bantu ba bita, bakule mu kalula kumbusa kwa kutuka ku Misri. 5 Kubuno bantu bansania batukile bamonesibwa, tondo bansania babutilwe mu nzila mu kalula kumbusa kwa batukile ku Misri tabamonesizibwe. 6 Kubuno baIsraeli bendile lugendo lwa myaka makumi manazi mu kalula, aaba nu bantu ba bita batukile ku Misri bakule kubuno tabanzile Yehowa. Yehowa abalumbide buno ntabalolesie kisi kyalagile beisibo buno akatukasa, kisi kiyala mabele nu buuki. 7 Kasi Yosua amonesizie babo bana, u bana beimikile Kalaga mu kiziki kyabo, kubuno babezaga tabemonesibwa, kubuno tabamonesizibwe mu nzila. 8 Nu gabede asila kumonesia bantu bansania, beikede ku biziki byabo mu ido aaba nu gabonine.
9 Yehowa abwide Yosua bunee: “Lelo natikya nsoni za Misri kumuli.” Ku bubo izina lya kiziki kikyo lyamaninwe Gilgali aaba nu lelo.
Isuluko litangi mu Kanana
10 Nu gabeikede ku Gilgali, bantu ba Israeli balide Isuluko mwigolo kindi ky'ikumi nu binazi kya mwezi ku kibitabita kya Yeriko. 11 Nu gakede busi kusila kw'Isuluko, mu bubo busi balide idia lya mu kikyo kisi, tumpampa tutagaga nu mabela mokibwa. 12 Nu mana meidile mu bubo busi gabalide ku idia lya kikyo kisi; nu baIsraeli tabalide mana lingo, tondo balide ku biguma bya kisi kya Kanana mu wozo mwaka.
13 Nu bwigi na Yeriko, Yosua alambwide meiso mage nu alolile, nu amonine muntu emana lwabusio lwage na mwene wa nganda mu kuboko kwage; nu Yosua endile bwigi nage nu amubuzizie bunee: “Ndi uli ku lulenge lweitu aaba ku lulenge lwa beiti beitu?”
14 Atendile bunee: “Kilo, tondo kano kaluma navwa anga Musondelezia w'iyombo lya Yehowa.” Yosua agwede gansi ku meiso mage nu amukumbaminne nu amubwide bunee: “Buni bukubula Mukota wane ku mukiti wage?”
15 Nu Musondelezia w'iyombo lya Yehowa abwide Yosua bunee: “Tikya bisalapata ku magulu mobe, kubuno kiziki kiwemana kukyo kyasililila.” Nu Yosua abukitile.