Mwino wa Yeriko watimbwa.
6
1 Nu mwino wa Yeriko wakandilwe nunse ku kabamba ka baIsraeli; muntu ntatukile nu muntu nteingide. 2 Yehowa abwide Yosua bunee: “Lola, nabika Yeriko mu kuboko kwobe gamozi na mukota wago, nu bantu ba magala nu bupuka. 3 Mwatimbe mwino, bantu bansania ba bita. Mutimbe mwino limbizi limozi, mukite bubo bindi mutuba. 4 Basankoga mutubakamo beeke myonze mutubakamo za mega ma bilimba bya mikoko lwabusio lwa Sanduku. Mu busi bwa mutubakamo mutimbe mwino mambizi mutubakamo, nu basankoga bide myonze. 5 Nu gabe bida myonze na magala, nu nkungu zimwungwe iyuki lya myonze, bantu bansania balaluke n'iyuki inene, nu mikolo za mwino zagoe gansi, nu bantu babakame, muntu na muntu asigelele lwabusio lwage.” 6 Yosua, mwana wa Nuni, amanine basankoga ababwide bunee: “Ekazi Sanduku z'Idagano, nu basankoga mutubakamo beeke myonze mutubakamo za mega ma bilimba bya mikoko lwabusio lwa Sanduku za Yehowa.” 7 Abwide bantu bunee: “Tingazi, mutimbe mwino nu musige beya ngabo za bita batinge lwabusio lwa Sanduku za Yehowa.”
8 Nu gabede Yosua asila kukakizia bantu, basankoga mutubakamo bekile myonze mutubakamo za mega ma bilimba bya mikoko, batingile lwabusio lwa Yehowa, nu bidile myonze, nu Sanduku z'Idagano za Yehowa zabayangile. 9 Beiya ngabo za bita bendile lwabusio lwa basankoga bakwida myonze, bakoloboyo, ba kumbusa bayangile Sanduku. Myonze zalilaga kankanka. 10 Yosua akakizizie bantu bunee: “Tamuzige moki meinyu mongubwako, iyuki talituke mu kanua keinyu aaba nu busi bubo bunkamukakizia kulaluka; nu nti mwamane mibila.” 11 Bubo u bwatimbizie mwino na Sanduku za Yehowa, zagutimbile limbizi limozi, nu bantu beingide mu ido nu beiyombekile mo.
12 Yosua ayukile lukesikesi, basankoga bekile Sanduku za Yehowa, 13 nu basankoga mutubakamo bekaga myonze mutubakamo za mega ma bilimba bya mikoko lwabusio lwa Sanduku za Yehowa, bendile na magulu nu bidile myonze kankanka. Beiya ngabo za bita batingile lwabusio lwabo, tondo balangi ba kumbusa bayangile Sanduku za Yehowa. Bendile na magulu nu kwida myonze. 14 Busi bw'ibili batimbile mwino limbizi limozi, basubizie ku ido. Babukitile bindi mutuba.
15 Nu gabede ku busi bwa mutubakamo, batukile lukesikesi nkungu za kusanuka kwa busi, batimbile mwino anga lwabusio mambizi mutubakamo. Ku bubo busi tugu, batimbile mwino mambizi mutubakamo. 16 Ku limbizi lya mutubakamo, gabede basankoga bakwida myonze, Yosua abwide bantu bunee: “Lalukazi n'iyuki inene kubuno Yehowa amukasa mwino. 17 Mwino waswililwe na Mukota; guli muzilo ku muli, guzike nu binsania bili mugo. Tugu Rahabu kitazi one, we nu bango beli gamozi nage mu numba, kubuno abisile batitiki batwasingile. 18 Nu inyuwe, mwidange bubibu na bibyo byaswililwa; kubuno mu kubyeka, munavwa kuswililwa nu kulusia lusungio ku ido lya Israeli nu kumana mbabazio kulyo. 19 Tondo feza insania nu olo, nu bintu bya nsubi nu byuma, bili kizila byalangwe mu isuku lya Yehowa.”
20 Nu nkungu zidile basankoga myonze, bantu balalukile n'iyuki inene. Nu gabede bantu bongwa iyuki lya myonze, balalukile bubibu nunse nu mikolo zagwede gansi. U bwavwamine bantu kwingila mu mwino, muntu na muntu abakamine lwabusio lwage. Bakatile mwino. 21 Bazikizye binsania byabezaga mu mwino, bamulume nu bakikulu, basikila nu bakungu, ngombe nu mikoko nu mpunda.
22 Yosua abwide babo bamulume babili bendile kutitika kisi bunee: “Ingilazi mu numba za kitazi, mutole wozo mukikulu nu bansania beli nabo, anga bumwamulumbilide.”
23 Bamulume babezaga batitiki beingide, batolile Rahabu nu isi nu nina, nu mibuto zage, nu bansania baabezaga nabo; batolile mibuto zage insania, babasigile ku isula ly'ido lya Israeli.
24 Bazikizye mwino na keiya nu binsania byabezaga mugo. Tondo feza nu olo nu bintu bya nsubi nu bya byuma byabikilwe mu isuku lya numba za Yehowa. 25 Yosua onezie kitazi Rahabu, nu kikanga ky'isi, nu bansania babezaga bage; eikede mu Israeli aaba nu lelo kubuno abisile batitiki basingaga Yosua buno batitike Yeriko.
26 Yosua alumbide mu zezo nkungu, atendile bunee: “Muntu wazanzukage nu kobaka lingo mwino wono wa Yeriko aswililwe lwabusio lwa Yehowa; kibanza kyago kibikwe mu kukua kwa nkula zage, nu mu kukua kwa malibilo mage eimike lwibi lwago.”
27 Bubo Yehowa abezaga gamozi na Yosua nu lukumu lwage lwendile mu kisi kinsania.