Bwagi bwa Akana bwamenywa.
7
1 Tondo bantu ba Israeli bagile ku bintu byaswililwa, kubuno Akana mwana wa Karmi, mwana wa Zabedi, mwana wa Zera, wa kikanga kya Yuda, akatile bintu byaswilidwe. Ku bubo bongoa bwa Yehowa bwabede bukali ku bantu ba Israeli. 2 Yosua asingile bantu kutuka Yeriko bende ku Ai ku ntungo za Beti-Aweni kuntata kwa Beteli. Ababwide bunee: “Bakamazi mutitike kisi.” Bantu babo bendile, batitikile Ai. 3 Basubizie ku Yosua, bamubwide bunee: “Bantu bansania tabende, tondo bantu bakuka tununu tubili aba tusatu bende kwitana na Ai, ntukutie bantu bansania kwenda kuko kubuno babo beli bakeke.”
4 Ububo bantu bakuka tununu tusatu ba Israeli bendile, nu batinine lwabusio lwa bantu ba ku Ai. 5 Bantu ba ku Ai beitile munkatini mwabo bantu makumi masatu nu mutuba; babapumbizie kutuka ku lwibi lwa mwino aaba nu kubasa ku Sebarimu, babeitile mu kugela. Ku bubo mitima za bantu zakutukile nu zabede na boba.
6 Yosua atile nsulu zage, agwede bukukama lwabusio lwa Sanduku za Yehowa aaba nu mwigolo, we nu bakulu ba Israeli, beibikile mukungu ku matoe mabo. 7 Yosua atendile bunee: “Ee Yehowa, Mwita Bwangato Bunsania, kubuni wasokezie bantu babano bansania lisilya lya Yordani buno utubike ku maboko ma baAmori buno batuzikye? Nibinibi, songo twikede na mbogimbogi lisilya lya Yordani! 8 Ee Yehowa, nitende buni, kubuno baIsraeli bese bakasa migongo zabo ku beiti babo? 9 Kubuno baKanana nu bantu bansania ba kisi bongwe, batutimbe, nu batikye izina lyeitu mu kisi. Nu buni buwakite n'izina lyobe inene?”
Kalaga akula masego ma Yosua.
10 Yehowa abwide Yosua bunee: “Zanzuka. Kubuni buwagoa bukukama? 11 BaIsraeli bagile nu beitile idagano lyane linabakakizagia, kubuno beka bintu byaswililwa, nu beiba nu bengelela, nu babibisa mu mizigo zabo. 12 Ku bubo bantu ba Israeli tabanavwama kwemana lwabusio lwa beiti babo, tondo batinine beiti babo, kubuno baswililwa; nsyabe gamozi n'inyu lingo kungwa tamwatikya bintu byaswililwa munkatini mweinyu.
13 Zanzuka, engia bantu, nu tenda bunee: ‘Mwiyengie lubi kubuno Yehowa, Kalaga wa Israeli, atenda bunee: “Ee Israeli, bintu byaswililwa bili munkatini mweinyu. Tamunavwama kwemana lwabusio lwa beiti beinyu aaba nu gamwatikye kintu kyaswililwa munkatini mweinyu.” 14 Ububo nindunindu mwakundamane mu bikanga nu kwabe buno kikanga kyatole Yehowa kyavwe kikanga na kikanga, nu kikanga kyatole Yehowa kyavwe numba na numba, nu numba zatole Yehowa zavwe muntu na muntu. 15 Nu kwabe buno wozo wamonekage na kyaswililwa, nti eiswa mu keiya, we nu binsania byeli nabyo, kubuno eita idagano lya Yehowa, nu kubuno akita kitondo kya nsoni mu Israeli.’”
Lusungio lwa Akana
16 Ububo Yosua ayukile lukesikesi, nu alusizie Israeli, kikanga na kikanga. Kikanga kya Yuda kyatolilwe. 17 Alusizie bikanga bya Yuda nu atolile kikanga kya Zera. Alusizie kikanga kya Zera nu akatile mutula wa Zabedi. 18 Yosua alusizie mutula wage muntu na muntu nu akatile Akana, mwana wa Karmi, mwana wa Zabedi, mwana wa Zera, ku kikanga kya Yuda.
19 Nu Yosua abwide Akana bunee: “Mwana wane, nkukusega, kasa Yehowa, Kalaga wa Israeli, lutanuno, nu igonge lwabusio lwane nu mbule kiwakitile. Ntumbise kena.”
20 Akana akwide Yosua bunee: “Lebelebe nagile lwabusio lwa Yehowa, Kalaga wa Israeli, nu bubuno u bunakitile: 21 Mu bikulo bya mu mwino, namonine nsulu nsoga za Babeli, nu shekeli nkama ibili za feza nu kyindi kya olo za buzitu bwa shekeli makumi matano.a Nabitundile nu nabyekile, nu nabibisile mu bilongo mu hema zane, nu feza kunsi.”
22 Ububo Yosua asingile migenzi, bendile lubilo ku hema, nu byamonekile mu hema zage nu feza kunsi. 23 Babitikizye mu hema, babyekile kuli Yosua nu Israeli unsania gamozi nage; babibikile gansi lwabusio lwa Yehowa.
24 Yosua nu baIsraeli bansania batolile Akana, mwana wa Zera, nu feza, nu nsulu, nu kyindi kya olo, nu bana bage basikila nu bakinga, nu ngombe zage, nu mpunda zage, nu mikoko zage, nu hema zage, nu binsania byabezaga nabyo, babyekile ku mpinga za Akori. 25 Yosua atendile bunee: “Kubuni watubasia lusungio? Yehowa akukusungia lelo.” BaIsraeli bansania bamwisile makozi; babagisizie na keiya, nu kubeisa makozi. 26 Babikile kaliba kanene ka makozi kumukukila, keikili go aaba nu lelo. Ububo Yehowa agalukizye bongoa bwage, ukinsa izina lya kikyo kiziki lyamaninwe Mpinga za Akori b aaba nu lelo.