Mwino wa Ai wakindwa.
8
1 Nu Yehowa abwide Yosua bunee: “Ntukue boba nu ntuzangezange. Tola bantu bansania ba bita. Emana, mubakame ku Ai, kubuno nakukasa mukota wa Ai mu kuboko kwobe, nu bantu bage, nu mwino wage, nu kisi kyage. 2 Wakite ku Ai nu mukota wago anga buwakitile ku Yeriko nu mukota wage, tondo bikulo byage nu ngombe zage, mwabyeke, bibe byeinu. Bika bantu mu kakala ka bita ku ntungo za mwino nu kumbusa kwago.” 3 Ububo Yosua emanukile nu bantu bansania ba bita, kubakama ku Ai. Yosua asombwede bantu babibu nu mapuka tununu makumi masatu (30.000), nu abasingile mu kindi. 4 Abakakizizie bunee: “Ungwililazi, mwabisame kumbusa kwa mwino, tamwende bulazi na mwino, tugu mube kayikayika. 5 Nu nne nu bantu bansania beli gamozi na nne twigelele bwigi na mwino, nu gabatusolobokele kwitana n'iswe, twatine lwabusio lwabo anga mu kulinga. 6 Nu bo batuke nu kutuyanga, nu twabalute ku isula lya mwino kubuno batende bunee: ‘Batina anga bubatutinine lingo.’ Ububo gatwatine lwabusio lwabo, 7 nti mwatuke mu kakala kumbusa kweitu nu mwakate mwino, kubuno Yehowa, Kalaga weinyu, agubike mu kuboko kweinyu. 8 Nu nkungu zimwasile kukata mwino, mwagugisie na keiya anga ikakizio lya Yehowa. Ungwazi, bunamukakizia.”
9 Ububo Yosua abasingile, bendile kubisama, nu beikede gasamba Beteli nu Ai ku ntungo za kunsi kwa Ai, tondo Yosua eiyombekile mu kindi kikyo munkatini mwa bantu. 10 Yosua ayukile lukesikesi nu akundamanizie bantu nu abakamine ku Ai, we nu bakulu ba Israeli lwabusio lwa bantu. 11 Bantu bansania ba bita babakamine nu beigelede bwigi na mwino. Beiyombekile ku lulunge lwa kwikazi lwa Ai nu mpinga zabezaga gabasamba na Ai. 12 Yosua atolile bantu bwigi tununu tutano, nu ababisile gasamba Beteli nu Ai, ku ntungo za kunsi kwa mwino. 13 Balongekile bantu mu bibombo, iyombo inene ku isula lya mwino, nu beiya kakala babisamine ku lulenge lwa kwikazi lwa mwino. Mu kindi, Yosua agelile mu mpinga.
14 Gamonine mukota wa Ai kubo asasizie kwenda, we nu bantu bage, kwitana na Israeli, nu agelile ku kibitabita ku kiziki kyakakizibwe, tondo ntamenyine buno bango babisamine mu ntungo mwa mwino.
15 Yosua nu baIsraeli bansania beisusanizie anga bakindwa lwabusio lwabo nu batinine ku nzila za ku kalula. 16 Bantu bansania babezaga mu Ai bamaninwe kubayanga, nu gabayangile Yosua, balutilwe bulazi na mwino. 17 Takwasigede muntu mu mwino wa Ai aba mu Beteli utayangile baIsraeli. Basigile mwino bwasi mu kuyanga Israeli.
18 Yehowa atendile ku Yosua bunee: “Lambya isumo lili mu kuboko kwobe ku lulenge lwa ku Ai, kubuno nagukasa mu kuboko kwobe.” Yosua alambizie isumo lyabezaga mu kuboko kwage ku ntungo za mwino. 19 Bantu babisamaga babisukile lubilo ku biziki byabo gaalambizie kuboko; bakatile mwino nu basasizie kuguzikya na keiya.
20 Galolile bantu ba Ai kumbusa kwabo bazangilezangile kubuno bamonine muuki watukaga mu mwino nu kubakama kwigulu tondo tababezaga na nzila za kutina kubuno baIsraeli batinaga mu kalula bagalukide babo babayangaga. 21 Gamonine Yosua nu Israeli unsania buno bantu babisamaga bakata mwino, nu buno muuki ukutuka mu mwino, bagalukile nu beitile bantu ba Ai. 22 Babo bagisizie mwino batukile mu mwino nu kwitana nabo; bubo babakubizizie munkatini mwa Israeli, bamozi mu ntungo zeno, bango ku zengo ntungo, babasile nu tabasigile umozi mulami aba watina. 23 Bakatile mukota wa Ai eki mulami nu bamwekile ku Yosua.
24 Nu gasilile baIsraeli kwita bansania na bupanga nu kubazikya, baIsraeli bansania basubizie ku Ai, kwita basangagwa mumo na bupanga. 25 Nu bansania bakule busi bubo, bamulume nu bakikulu, babezaga tununu ikumi nu tubili (12.000), u bantu bansania ba Ai. 26 Kubuno Yosua ntakunyine kuboko kwage kwalambizie n'isumo aaba nu gasilile kwitwa bantu bansania ba Ai. 27 Ngombe nu bikulo bya mwino byekilwe na Israeli, anga iyuki lya Yehowa lyakakizizie Yosua. 28 Yosua azikizye Ai na keiya, agukitile kuba bukindu ku milyalya aaba nu lelo.
29 Akamine mukota wa Ai ku muti aaba nu mwigolo. Mu nkungu za kwida kwa busi, kazanga kongo Yosua abakakizizie buno bagezie kitumba kyage kukitikya ku muti nu kukyisa ku lwibi lwa kwingila mu mwino. Nu bakukide gantata gage kaliba kanene ka makozi, kasigede aaba nu lelo.
30 Nu Yosua akitide Yehowa, u Kalaga wa Israeli, kasenga ka kayulo gantata ga mwiduko wa Ebali. 31 Anga bwakakizizie Musa, mukiti wa Yehowa, ku bana ba Israeli, anga bwasanzilwe mu mukanda wa mulembe wa Musa bunee: “Kasenga ka kayulo ka makozi matatwa na kyuma.” Babikile gantata gako bisansa bya kugisia ku Yehowa nu bisansa bya bubobelelo. 32 Nu gantata ga makozi, Yosua asanzile mulembe wa Musa waasanzile ku baIsraeli.
33 BaIsraeli bansania nu bakulu babo, nu bemanizi babo, nu ngatu zabo bemanine ku zeno ntungo nu ku engo ntungo za Sanduku lwabusio lwa basankoga ba baLawi bekaga Sanduku z'Idagano lya Yehowa, bageni nu baIsraeli babezaga gago; kyindi kyabo lwabusio lwa mwiduko wa Gerizimu nu kingo kyindi lwabusio lwa mwiduko wa Ebali, anga bwakakizizie Musa, mukiti wa Yehowa, wakalazi buno bakase mponga ku baIsraeli.
34 Kumbusa asomine bitondo binsania bya mulembe, mponga nu biswililo anga bubyasanzilwe mu mukanda wa mulembe. 35 Takuli kitondo kimozi kya binsania byakakizizie Musa ku Yosua kyatasomine lwabusio lwa musanganano unsania wa Israeli bamulume nu bakikulu, nu bana, nu bageni batabangaga munkatini mwabo.