Mugomio wa bakota ba Kanana.
9
1 Nu bakota bansania babezaga mu wozo mutili wa Yordani ku miduko nu ku kibitabita kili bwigi na Kitatenge Kinene, lwabusio lwa Lebanoni, baHiti nu baAmori nu baKanana nu baPerizi nu baHivi nu baYebusi, gabongule ku musagu, 2 bakundamenne gamozi na mutima umozi buno beitane na Yosua nu Israeli. Bwengelezi bwa baGibeoni.
3 Tondo beya Gibeoni gabongule ku lukita lwakitile Yosua ku Yeriko nu Ai, 4 bakitile na bwengelezi mu kulongeka bya lugendo, bamenywe buno basingilwe na migenzi. Bekile makunino makulu nunse gantata ga mpunda zabo, nu tutembe twa bikoba bya kulanga maku bikulu byabotoka nu byalandwa, 5 nu bisalapata bikulu byabotoka nu byalandwa ku magulu mabo nu nsulu zise mikungio, nu tumpampa twabo twabezaga tuse na mbubu. 6 Babasile ku Yosua mu ido lya Gilgali, bamubwide we nu bantu ba Israeli bunee: “Twatuka ku kisi kya bulazi, buno mukite malonga n'iswe.”
7 Bantu ba Israeli bababwide bunee: “Embe mukwikala munkatini mweitu, kasi buni butunakita kilumbilo gamozi n'inyu?”
8 Babwide Yosua bunee: “Iswe tuli bakiti bobe.”
Yosua ababwide bunee: “Inyuwe muli banazi? Nu mukutuka kuni.”
9 Bamubwide bunee: “Bakiti bobe bakutuka ku kisi kya bulazi nunse ku kabamba k'izina lya Yehowa, Kalaga wobe. Kubuno tungwa luganuno lwage nu bunsania bwakitile mu Misri, 10 nu bunsania bwakitide bakota babili ba baAmori babezaga lisilya lya Yordani, u Sihoni, mukota wa Hesiboni, nu Ogi, mukota wa Basani wabezaga ku Astaroti. 11 Ububo bakulu beitu nu bantu bansania ba kisi kyeitu batubwide bunee: ‘Tolazi idia gamozi n'inyu ku lugendo, mwende kukulumana nabo nu kubabula bunee: “Iswe tuli bakiti beinyu.”’ Kasi mukite kano kaluma malonga gamozi n'iswe.
12 Kampampa keitu kakano twakeekile keikili kazuza gatwatukile ku numba zeitu busi butwatukile kuvwa kumuli, tondo kano kaluma, lola, kakama, nu keseli na mbubu. 13 Nu bikoba bibino bya maku bitwizazizie bikili bito, lola, biseli byabuga, nu nsulu zeitu zino nu bisalapata byeitu byakunguka kubuno lugendo luli lulazi nunse.”
14 BaIsraeli basondile ku idia lyabo nu tababuzizie lwango ku kanua ka Yehowa. 15 Yosua akitile nabo lwango lwa bubobelelo, akitile nabo kilumbilo buno balame, nu bakota ba musanganano babalumbilide.
16 Kusila kwa bindi bisatu kwa kukita kilumbilo, bongule buno babo babezaga bantu ba bwigi nabo, buno beikalaga munkatini mwabo. 17 Ububo bantu ba Israeli babendede, nu babasile ku miino zabo kumbusa kwa bindi bisatu. Miino zabo zabezaga Gibeoni nu Kefira nu Beroti nu Kiriati-Yearimu. 18 BaIsraeli tababeitile kubuno bakota ba musanganano babalumbilide mu Yehowa, u Kalaga wa Israeli.
Musanganano unsania wakitile manungunungu ku bakota. 19 Tondo bakota babwide musanganano unsania bunee: “Twabalumbilide mu Yehowa, u Kalaga wa Israeli; kasi tatunavwama kwitubya kubeli. 20 Twabakitile bubuno, twabasige kulama; bongoa tabube kutuli ku kabamba ka kilumbilo kitwalumbide.” 21 Bakota bababwide bunee: “Mubasige balame. Tondo babe baseni ba misali nu batagi ba mazi ku musanganano unsania anga bwabalagile bakulu.”
22 Yosua abamanine, ababwide bunee: “Kubuni mwatwengelede nu kutenda bunee: ‘Tukwikalaga bulazi nunse n'inyu,’ nu kasi mukwikalaga munkatini mweitu? 23 Ku bubo mwaswililwa, nu mumuli takwide muntu utabe mukobe, museni wa misali aba mutagi wa mazi ku numba za Kalaga wane.”
24 Bakwide Yosua bunee: “Kubuno bakiti bobe basambalidwe musagu wa buno Yehowa, u Kalaga wobe, akakizizie mukiti wage Musa kumukasa kisi kinsania, nu kuzikya bantu bansania lwabusio lweinyu, twakule boba nunse ku tulamo tweitu ku kabamba keinyu, u kitwakitide bubo. 25 Nu kano kaluma, lola, iswe tuli mu kuboko kobe, utukitile anga bukumoneka busoga nu bwisanana ku meiso mobe.”