Yosua akinda bakota batano.
10
1 Adoni-Zedeki, mukota wa Yerusalema, ongule bwakatile Yosua Ai nu kuguzikya nunse, anga bwakitide Yeriko nu mukota wago akitide Ai nu mukota wago bubo, nu ongule bwagomezie bantu ba Gibeoni na Israeli, nu kwikala munkatini mwabo, 2 akule boba nunse, kubuno Gibeoni wabezaga mwino munene anga mwino umozi wa miino za bakota. Lingo kubuno wabezaga mwino munene kutinga Ai nu bantu bago bansania babezaga mapuka. 3 Ku bubo Adoni-Zedeki, mukota wa Yerusalema, asingile ku Hohamu, mukota wa Hebroni, nu ku Piramu, mukota wa Yarmuti, nu ku Yafia, mukota wa Lakisi, nu ku Debiri, mukota wa Eguloni, abatendile bunee: 4 “Bakamazi kundi, munkasie. Twitane na baGibeoni kubuno bakita malonga na Yosua nu bantu ba Israeli.” 5 Ku bubo bakota batano ba baAmori, mukota wa Yerusalema, mukota wa Hebroni, mukota wa Yarmuti, mukota wa Lakisi, nu mukota wa Eguloni, bakundamenne; babakamine, bo nu mayombo mabo mansania. Beiyombekile ido lwabusio lwa Gibeoni nu beitenne nago. 6 Bantu ba Gibeoni basingile mugenzi ku Yosua ku ido lya Gilgali, batendile bunee: “Ntusige bakiti bobe. Bakama kutuli lubilo, utonie nu kutukasia, kubuno bakota bansania ba baAmori bakwikalaga mu kisi kya miduko bakutukumbila.”
7 Ububo Yosua abakamine kutuka Gilgali, we nu bantu bansania ba bita gamozi nage, bansania ba magala nu bupuka. 8 Yehowa abwide Yosua bunee: “Ntubakue boba, kubuno nababika mu kuboko kwobe; takuli muntu munkatini mwabo wemane lwabusio lwobe.”
9 Ububo Yosua abakamine kindi kinsania kutuka Gilgali nu abasolobokede. 10 Yehowa abazangiziezangizie lwabusio lwa Israeli. Abeitile bubibu ku Gibeoni nu abeimbizie ku nzila za kubakama ku Beti-Horoni; eitenne nabo kuzindila ku mwaga wa Azeka nu Makeda. 11 Nu gabatinaga lwabusio lwa Israeli, mu kugela ku Beti-Horoni, Yehowa abeisile lubula lunene kutuka kwigulu aaba nu ku Azeka, nu bakule. Babo bakule na lubula babezaga beingi kutinga babo bakule na myene za nganda za baIsraeli.
12 Gakasenne Yehowa baAmori ku baIsraeli, Yosua abwide Yehowa lwabusio lwa Israeli bunee: “Kisongo kya busi, emana gantata ga Gibeoni, nu uwe mwezi mu mpinga za Ayaloni.” 13 Kisongo kya busi kyemenne nu mwezi wemenne aaba nu gabasilile kwisuba ku beiti babo, anga bwasanzilwe mu mukanda wa Yaseri. Kisongo kya busi kyemenne munkatini mwigulu nu tawasasizie kugoba anga ungo musi mugimagima. 14 Takwabede bungo busi anga busi bubo aba lwabusio aba kumbusa kwabo, gongwilide Yehowa iyuki lya muntu, kubuno Yehowa eitenne bita ku kabamba ka Israeli.
15 Nu Yosua asubizie na baIsraeli bansania gamozi nage ku ido lya Gilgali. 16 Babo bakota batano batinine, nu beibisile mu kalimba a ka Makeda.
17 Gasambalidwe Yosua misagu zabo bunee: “Babo bakota batano bamoneka ko, beibisa mu kalimba ka Makeda,” 18 Yosua atendile bunee: “Zibazi itengu lya kalimba na makozi manene, nu bikazi bantu gago kulilanga. 19 Tondo inyuwe tamusigale; yangazi beiti nu mwite babo beli kumbusa, tamuzige beingila mu miino zabo; kubuno Yehowa, u Kalaga weinyu, abakasenne mu maboko meinyu.”
20 Gasilile Yosua nu bantu ba Israeli kubeita bubibu bwigi na kubazikya, nu babo basigede gabasilile kwingila mu miino za mikolo, 21 bakoloboyo bansania basubizie bulonge bukata ku ido lyabezaga ku Yosua kuko ku Makeda; takuli wampa wizuzumine aba ku umozi wa bantu bansania ba Israeli.
22 Nu Yosua atendile bunee: “Igulazi itengu lya kalimba, nu mumbasizie babo bakota batano.” 23 Bakitile bubo, nu bamuvwilide na babo bakota batano kutuka mu kalimba, mukota wa Yerusalema, nu mukota wa Hebroni, nu mukota wa Yarmuti, nu mukota wa Lakisi, nu mukota wa Eguloni. 24 Nu gabavwilide Yosua na babo bakota batano, Yosua amanine bamulume bansania ba Israeli, nu abwide basondelezia ba bantu ba bita bendaga gamozi nage bunee: “Kundazi gano, mubike masindi meinyu ga makosi ma bakota babano.” Bakundile nu babikile masindi ku makosi mabo.
25 Yosua ababwide bunee: “Tamukue boba, nu tamuzangezange; mube na magala nu bupuka, kubuno bubo u bwakitage Yehowa ku beiti beinyu bansania bamukwitana nabo.” 26 Kusila, Yosua abalibwide nu kubeita. Abaswikile ku miti itano, nu baswikilwe ku miti aaba nu mwigolo.
27 Nu geidile busi, Yosua akakizizie babagezie ku miti, babeisile mu kalimba, kiziki kibabezaga beibisa, bazibile itengu lya kalimba na makozi manene, nu meikile aaba nu lelo.
Lulenge lwa kwidume lwakindwa.
28 Yosua akatile mwino wa Makeda busi bubo, aguzikizye na mwene wa nganda nu mukota wago, azikizye bansania babezaga mugo, ntasigile wampa na kalamo; akitide mukota wa Makeda anga bwakitide mukota wa Yeriko. 29 Yosua atingile kutuka ku Makeda na Israeli unsania gamozi nage, kubasa ku Libuna, nu beitenne na Libuna. 30 Nu Yehowa akasenne mwino wono nugo gamozi na mukota wago mu kuboko kwa Israeli; agwitile na mwene wa nganda nu bansania babezaga mugo, ntasigile wampa mugo na kalamo, akitide mukota wago anga bwakitide mukota wa Yeriko.
31 Yosua atingile ku Lakisi kutuka ku Libuna na Israeli unsania gamozi nage. Abikile ido lya bita nu eitenne nabo. 32 Yehowa abikile Lakisi mu kuboko kwa Israeli, nu kumbusa kwa bindi bibili, agukatile nu agwitile na mwene wa nganda nu bantu bansania babezaga mugo, anga bwakitide Libuna. 33 Mu zezo nkungu, Horamu, mukota wa Gezeri, abakamine kukasia Lakisi. Yosua amwitile nu bantu bage, nu ntasigile muntu umozi kubeli.
34 Yosua atingile na baIsraeli bansania gamozi nage kutuka Lakisi nu kubasa ku Eguloni, babikile ido lya bita bwigi na mwino, beitenne nabo. 35 Bagukatile busi bubo nu kuwita na mwene wa nganda, nu bantu bansania babezaga mugo abazikizye nunse busi bubo, anga bwakitide Lakisi. 36 Yosua atingile kutuka Eguloni, nu baIsraeli bansania gamozi nage, nu kubasa ku Hebroni. Beitenne nago. 37 Bagukatile nu kuwita na mwene wa nganda, nu mukota wago, nu miino zago insania, nu bantu bansania babezaga mugo; ntasigile wampa kubeli, bumozi anga bwakitide Eguloni; tondo aguzikizye nunse, gamozi na bansania babezaga mugo. 38 Kusila Yosua asubizie na baIsraeli bansania gamozi nage ku Debiri; eitenne nago, 39 agukatile, nu mukota wago, nu miino zago insania. Babeitile na mwene wa nganda nu kuzikya nunse bantu bansania babezaga mugo, takwasigede wampa kubeli, anga bwakitide Hebroni nu Libuna nu bakota bazo, bubo u bwakitide Debiri na mukota wago.
40 Bubo Yosua eitile kisi kikyo kinsania, kisi kya miduko, nu kisi kya Negevi, kisi kya gansi, nu kisi kya mpinga, nu bakota babo bansania; ntasigile wampa kubeli, tondo azikizye nunse bansania bakwiza anga bwakakizizie Yehowa, u Kalaga wa Israeli. 41 Yosua abeitile kutuka ku Kadesi-Barnea nu kuzindila ku Gaza, nu kisi kinsania kya Goseni nu kubasa ku Gibeoni. 42 Nu bakota babano bansania nu bisi byabo, Yosua abikatile mu lugendo lumozi, kubuno Yehowa, u Kalaga wa Israeli, eitenne bita ku lulenge lwa Israeli. 43 Kumbusa Yosua asubizie na baIsraeli bansania gamozi nage ku ido lya Gilgali.