Bakota ba ku lulenge lwa kwikazi bakindwa.
11
1 Nu gongule Yabini, mukota wa Hazori, ku bibino bitondo, asingile mubila ku Yobabu, mukota wa Madoni, nu ku mukota wa Simuroni, nu ku mukota wa Akisafu, 2 nu ku bakota babezaga mu kisi kya miduko, nu mu mpinga za Araba ku lulenge lwa kwidume lwa kitatenge kya Kinereti, nu kisi kya tukililo, nu Nafati Dori kunsi, 3 ku baKanana, ku ntungo za kuntata nu za kunsi nu baAmori nu baHiti nu baPerizi nu baYebusi mu kisi kya miduko nu baHivi, kunsi kwa Hermoni mu kisi kya Misipa, 4 batukile na mayombo mabo mansania gamozi nabo, bantu beingi anga misege zili ku mutili wa kitatenge, gamozi na farasi nu tuyanga twingi nunse. 5 Bakota babano bansania bakundamenne gamozi, bavule kukita ido gamozi ku Kiziba kya Meromu, buno beitane na Israeli. 6 Yehowa abwide Yosua bunee: “Ntubakue boba kubuno lubi, ku nkungu anga zeno, nabakasane bansania bese bitumba ku Israeli. Wasese miki za magulu ma farasi zabo, nu kugisia tuyanga twabo na keiya.”
7 Ububo Yosua nu iyombo linsania lya bakoloboyo gamozi nage babavwilide kitangalabesi ku Kiziba kya Meromu nu kubasolobokela. 8 Yehowa abakasenne mu kuboko kwa Israeli, babeitile nu babayangile aaba nu ku mwaga wa Sidoni munene nu ku Luuzi lwa Misirepotaimu, nu ku mpinga za Misipa ku lulenge lwa kuntata; babeitile nu tabasigile wampa kubeli. 9 Yosua abakitide anga bwamukakizizie Yehowa; asesile miki za magulu ma farasi zabo nu agisizie tuyanga twabo na keiya.
10 Mu zezo nkungu Yosua asubizie nu akatile Hazori. Eitile mukota wago na mwene wa nganda, kubuno lwabusio, Hazori abezaga itoe lya bukota bubo bunsania. 11 Beitile bantu bansania babezaga mugo na mwene wa nganda, babazikizye nunsania. Takwasigede wampa ukwiza. Azikizye Hazori na keiya.
12 Nu miino insania za babo bakota, nu babo bakota bansania, Yosua abakatile, abeitile na mwene, nu kubazikya nunse, anga bwakakizizie Musa, mukiti wa Yehowa. 13 Tondo ku miino zabezaga zobakwa ga bitulu byabo, Israeli ntazigisizie, tugu Hazori wagisizibwe na Yosua. 14 Nu bikulo binsania byasigalaga bya miino zezo, nu ngombe, bantu ba Israeli babitolile kuba byabo; tondo beitile muntu na muntu ku myene aaba nu babazikizye nu tabasigile wampa ukwiza. 15 Anga bwakakizizie Yehowa ku Musa mukiti wage, u bubo bwakakizizie Musa ku Yosua, nu Yosua abukitile; nteidile kukita kitondo aba kimozi ku binsania byakakizizie Yehowa ku Musa.
Yosua akata kisi kinsania.
16 Bubo Yosua akatile kisi kikyo kinsania, kisi kya miduko, nu Negevi, nu Goseni, nu kisi kya tukililo, nu Kibitabita kya Yordani kikumanagwa Araba, nu kisi kya miduko za Israeli nu tukililo twazo, 17 kutukila ku mwiduko wa Halaki bwigi ku Seiri, nu kuzindila ku Bali-Gadi mu mpinga za Lebanoni kunsi kwa mwiduko wa Hermoni, akatile babo bakota bansania nu kubakinda, nu kubeita. 18 Yosua eitenne bita nkungu ndazi na babo bakota bansania. 19 Takwabezaga mwino aba umozi wakitile bubobelelo na baIsraeli, tugu baHivi, u beiya Gibeoni; bazikatile insania mu bita. 20 Kubuno kwa Yehowa u kwatukile kitondo kya kubakanda mitima buno bavwe kwitana na baIsraeli, buno abeite nunse geteli kyombo, tondo bazikibwe anga bwakakizizie Yehowa ku Musa.
21 Nu Yosua endile mu zezo nkungu nu azikizye baAnaki kutuka ku kisi kya miduko, kutuka ku Hebroni, kutuka ku Debiri, kutuka ku Anabu, nu kutuka ku kisi kinsania kya miduko za Yuda, nu kutuka ku kisi kinsania kya miduko za Israeli. Yosua abazikizye nunse gamozi na miino zabo. 22 Takuli umozi wa baAnaki wasigede mu kisi kya Israeli; tugu mu Gaza, mu Gati, nu mu Asidodi u mwasigede bamozi.
23 Bubo u bwakatile Yosua kisi kinsania, anga bunsania bwabwide Yehowa ku Musa; Yosua akikasile anga ntiko ku Israeli anga bwabezaga bikanga byabo. Kumbusa kisi kyumwinwe ku bitondo bya bita.