Bakota bakindilwe na baIsraeli.
12
1 Nu babano beli bakota ba kisi bakindilwe na bantu ba Israeli nu kutola kisi kyabo lisilya lya Yordani ku ntungo za kusanuka kwa busi, kutukila ku Mpinga za Arnoni nu kuzindila ku mwiduko wa Hermoni, nu Araba insania ku lulenge lwa kuntata. 2 Sihoni, mukota wa baAmori, wikalaga mu Hesiboni, nu kwangata kutukila Aroeri guli mu ntungo mwa Mpinga za Arnoni nu kutukila munkatini mwa mpinga kuzindila ku luuzi lwa Yaboki, mwaga wa baAmori, u kyindi kya Gileadi, 3 nu kibitabita kya Yordani kikumanagwa Araba aaba nu ku mwaga wa Kitatenge kya Kinereti ku lulenge lwa kuntata, nu ku lulenge lwa Beti-Yesimoti aaba nu ku mwaga wa Kitatenge kya Munkange nu ku lulenge lwa kwidume aaba nu mwaga wa ku musigulu wa Pisiga.
4 Nu Ogi, mukota wa Basani, umozi ku basigede ku baRefaimu, beikalaga ku Astaroti, nu ku Edirei. 5 Angatile mu mwiduko wa Hermoni, nu mu Saleka, nu mu Basani unsania, nu kubasa ku mwaga wa baGesuri nu baMakati, nu kyindi kya Gileadi, mwaga wa Sihoni, mukota wa Hesiboni. 6 Musa, mukiti wa Yehowa, nu baIsraeli babakindile. Musa, mukiti wa Yehowa, akasenne kisi kibabezaga nakyo ku baRubeni nu baGadi nu ku kyindi kya kikanga kya Manase kuba ntiko zabo.
7 Babano u bakota ba kisi bakindilwe na Yosua nu baIsraeli lisa lya Yordani ku ntungo za kunsi, kutuka Bali-Gadi mu kibitabita kya Lebanoni nu kuzindila ku mwiduko wa Halaki wabakama ku Seiri. Yosua akasenne kisi kyabo ku bikanga bya baIsraeli kuba ntiko zabo anga bwabezaga bikalo byabo: 8 kisi kya miduko nu kisi kya tukililo twa kunsi nu Araba nu bilenge bya miduko nu kalula nu Negevi, bisi bya baHiti nu baAmori nu baKanana nu baPerizi nu baHivi nu baYebusi: 9 mwino wa Yeriko, mukota umozi; mwino wa Ai guli mu ntungo na Beteli, mukota umozi; 10 mwino wa Yerusalema, mukota umozi; mwino wa Hebroni, mukota umozi; 11 mwino wa Yarmuti, mukota umozi; mwino wa Lakisi, mukota umozi; 12 mwino wa Eguloni, mukota umozi; mwino wa Gezeri, mukota umozi; 13 mwino wa Debiri, mukota umozi; mwino wa Gederi, mukota umozi; 14 mwino wa Horma, mukota umozi; mwino wa Aradi, mukota umozi; 15 mwino wa Libuna, mukota umozi; mwino wa Adulamu, mukota umozi; 16 mwino wa Makeda, mukota umozi; mwino wa Beteli, mukota umozi; 17 mwino wa Tapua, mukota umozi; mwino wa Heferi, mukota umozi; 18 mwino wa Afeki, mukota umozi; mwino wa Lasaroni, mukota umozi; 19 mwino wa Madoni, mukota umozi; mwino wa Hazori, mukota umozi; 20 mwino wa Simuroni-Meroni, mukota umozi; mwino wa Akisafu, mukota umozi; 21 mwino wa Tanaki, mukota umozi; mwino wa Megido, mukota umozi; 22 mwino wa Kedesi, mukota umozi; mwino wa Yokinamu mu Karmeli, mukota umozi; 23 mwino wa Dori, mukota umozi; mwino wa Goimu bwigi na Gilgali, mukota umozi; 24 mwino wa Tirza, mukota umozi. Bakota babano bansania babezaga makumi masatu nu umozi.