Kalaga akakizia Yosua kubeganizia baIsraeli kisi.
13
1 Nu gabede Yosua ese mukungu na myaka ningi, Yehowa amubwide bunee: “Use mukungu wa myaka ningi nu kyindi kinene kya kisi kyasigala takyangatwa. 2 Kikino u kisi kyasigala: Bisi binsania bya baFilistini, nu bibyo binsania bya baGesuri, 3 kutukila ku luuzi lwa Sihori luli bwigi na Misri aaba nu ku mwaga wa Ekuroni ku lulenge lwa kwikazi, kisi kyaganzagwa buno kya baKanana, muli bakota batano ba baFilistini, babo ba Gaza nu Asidodi nu Askeloni nu Gati nu Ekuroni, nu bibyo bya baAwimu, 4 ku lulenge lwa kwidume, kisi kinsania kya baKanana, nu Ara guli wa baSidoni, nu kuzindila ku Afeki, aaba nu ku mwaga wa baAmori, 5 nu kisi kya baGebali, nu Lebanoni unsania, ku ntungo za kusanuka kwa busi, kutuka ku Bali-Gadi ku mwiduko wa Hermoni aaba nu ku kwingila ku Hamati; 6 bantu bansania ba kisi kya miduko kutuka Lebanoni nu kuzindila ku Misirepoti-Maimu, u baSidoni bansania. Nne nabapumbie lwabusio lwa baIsraeli. Begania tugu kisi ku baIsraeli buno kibe ntiko zabo, anga bunakukakizizie. 7 Nu kano kaluma begania kisi kikino kuba ntiko za bikanga mubula nu kyindi kya kikanga kya Manase.”
8 Kingo kyindi kya kikanga kya Manase gamozi na baRubeni nu baGadi bakatile ntiko zabo, anga bwabakasile Musa lisilya lya Yordani ku ntungo za kuntata, anga bwabakasile Musa, mukiti wa Yehowa. 9 Kutuka Aroeri, guli ku ntungo kwa Mpinga za Arnoni, nu mwino guli munkatini mwa mpinga nu ku kibitabita kya Medeba, kuzindila ku Diboni, 10 nu miino insania za Sihoni, mukota wa baAmori, wangataga mu Hesiboni, kuzindila ku mwaga wa baAmori 11 nu baMakati, nu mwiduko wa Hermoni unsania, nu Basani unsania kuzindila ku Saleka, 12 u bukota bunsania bwa Ogi mu Basani, wangataga mu Astaroti nu mu Edirei (we umpanga u wasigede mu babo baRefaimu). Musa akindile babano bakota nu kubeimbia. 13 Tondo baIsraeli tabeimbizie baGesuri nu baMakati, tondo beikede munkatini mwa Israeli aaba nu lelo.
Bwiyani bwa baLawi
14 Kikanga kya Lawi tugu u kitakasilwe ntiko na Musa; tuyulo twa Yehowa, u Kalaga wa Israeli, twagisibagwa na keiya, twabede ntiko zabo anga bwababwide.
Bwiyani bwa baRubeni.
15 Musa akasile kikanga kya baRubeni bwiyani anga bwabezaga bikalo byabo. 16 Nu mwaga wabo wabezaga kutuka Aroeri, guli mu ntungo mwa mpinga za Arnoni, nu mwino guli munkatini mwa mpinga, nu kibitabita kinsania kya Medeba; 17 Hesiboni, nu miino zage insania zili mu kibitabita, Diboni, nu Bamoti-Baali, nu Beti-Baali-Meoni, 18 nu Yahaza, nu Kedemoti, nu Mefati, 19 nu Kiriataimu, nu Sibuma, nu Zereti-Sahari guli gantata ga mwiduko guli mu kibitabita, 20 nu Beti-Peori, nu bilenge bya Pisiga, nu Beti-Yesimoti; 21 u miino insania za kibitabita, nu bukota bunsania bwa Sihoni, mukota wa baAmori, wangatile mu Hesiboni. Musa amukindile gamozi na bakota ba Midiani, u Evi, nu Rekemu, nu Zuri, nu Huri, nu Reba, bakota ba Sihoni, beikalaga mu kikyo kisi. 22 Balama, mwana wa Beori, wabezaga mulaguzi, bantu ba Israeli bamwitile na mwene munkatini mwa babo bango bakule. 23 Nu mwaga wa bantu ba Rubeni wabezaga luuzi lwa Yordani, nu myaga zeno zili bwiyani bwa baRubeni anga bwabezaga bikanga byabo, miino minene nu miino mikeke zazo.
Bwiyani bwa baGadi.
24 Musa akasile kikanga kya Gadi, u baGadi, bwiyani anga bwabezaga bikanga byabo. 25 Kisi kyabo kyabezaga Yazeri, nu miino insania za Gileadi, nu kyindi kya kisi kya baAmori, ku mwaga wa Aroeri guli bwigi na Raba; 26 nu kutuka ku Hesiboni ku mwaga wa Ramati-Misipa, nu Betonimu; nu kutuka ku Mahanaimu ku mwaga wa Debiri; 27 nu mu kibitabita Beti-Haramu, nu Beti-Nimira, nu Sukoti, nu Zafoni, zasigalaga ku bukota bwa Sihoni, mukota wa ku Hesiboni, Yordani u mwaga wabo na kuzindila ku kitatenge kya Kinereti lisilya lya Yordani ku lulenge lwa kuntata. 28 Bubo u bwabezaga bwiyani bwa baGadi anga bwabezaga bikalo byabo; miino minene nu mikeke zazo.
Bwiyani bwa kyindi kya kikanga kya Manase.
29 Musa akasile ntiko ku kyindi kya kikanga kya Manase, zabeganizibwe ku kyindi kya kikanga kya Manase anga buli bikalo byabo. 30 Kisi kyabo kyabezaga kutukila Mahanaimu, Basani bansania, bukota bunsania bwabezaga na Ogi, mukota wa Basani, nu miino insania za Yairi zili mu Basani, miino makumi mutuba: 31 Nu kyindi kya Gileadi, nu Astaroti, nu Edirei, miino insania za bukota bwabezaga na Ogi mu Basani, zakasilwe ku bana ba Makiri, mwana wa Manase aaba nu ku kyindi kya baMakiri anga buli bikanga byabo.