Kisi kyabeganibwa mu kwesa mbale.
14
1 Bubo u bwabezaga bwiyani bwakatile baIsraeli ku kisi kya Kanana bubabeganizibwe na Eleazari, sankoga, nu Yosua mwana wa Nuni, nu bakota ba bikanga bya baIsraeli. 2 Bamonine bwiyani bwabo ku kwesa mbale, anga bwakakizizie Yehowa ku Musa, ku bikanga mubula nu ku kyindi kya kikanga. 3 Kubuno Musa akasile bikanga bibili nu kyindi bwiyani lisilya lya Yordani, tondo ntakasile baLawi kubo. 4 Kubuno baYosefu babezaga bikanga bibili, baManase nu baEfuraimu, bubo baLawi tabakasilwe kyabo kyindi kya kisi, tugu miino za kwikala muzo nu biziki bya kulisizia lusumba lwabo nu biziki bya bintu byabo. 5 BaIsraeli bakitile anga bwakakizizie Yehowa ku Musa; babeganizie kisi. Bwiyani bwa Kalebu.
6 Nu baYuda bavule ku Yosua ku Gilgali; nu Kalebu, mwana wa Yefune muKenizi, amubwide bunee: “Wizi kitondo kyatendile Yehowa ku Musa, muntu wa Kalaga, ku kabamba kane nu ku kabamba kobe ku Kadesi-Barnea. 7 Gansingile Musa, mukiti wa Yehowa, kutuka ku Kadesi-Barnea kwenda kutitika kisi, nabezaga nise na myaka makumi manazi; nu namuvwilide na misagu anga bwabezaga mu mutima wane. 8 Tondo mibuto zane zinendile nazo zatambizie mitima za bantu; tugu nne nayangile Yehowa, Kalaga wane, nunse. 9 Musa alumbide bubo busi bunee: ‘Lebelebe kisi kiwanyantile kyabe bwiyani bwobe nu bwa bana bobe ku milyalya, kubuno wayangile Yehowa, u Kalaga wane, nunse.’
10 Lola, anga bwatendenne Yehowa lilino iyuki na Musa, andamia anga bwatendile zeno myaka makumi manazi nu itano, gatimbiletimbile Israeli mu kalula; nu kano kaluma, lola, nise nakukya myaka makumi kinana nu itano. 11 Nu lelo, nili na magala anga bunabezaga namo busi bwansingile Musa; magala mane meli bumozi lelo anga magala manabezaga namo mu nkungu zezo, aba mu kwitana bita aba mu kubasa nu mu kwingila. 12 Kasi, nkase mwiduko wono watekwide Yehowa busi bubo, kubuno wungule ku bubo busi buno baAnaki beli gago nu kuli miino minene za mikolo; tugu Yehowa eli na nne nu navwame kubapumbia anga bwatendile Yehowa.”
13 Yosua akasile mponga ku Kalebu, mwana wa Yefune, nu amukasile Hebroni kuba bwiyani bwage. 14 Ububo Hebroni bwabezaga bwiyani bwa Kalebu, mwana wa Yefune, muKenizi, aaba nu lelo, kubuno ayangile nunse Yehowa, u Kalaga wa Israeli. 15 Mu kulinga, Hebroni amanagwa Kiriati-Arba. (Arba abezaga muntu munene mu baAnaki).
Nu kisi kyumwinwe ku bitondo bya bita.