KUKOKOMEZIA MULEMBE
Kalaga abakakizizie kwingila mu Kanana.
1
1 Mamano meli moki masambede Musa ku baIsraeli gababezaga mu kalula ku mutili wa lulenge lwa kukutukaga kisongo kya busi lwa luuzi Yordani, ku kibitabita kya kibe kya Sufu, gasamba miino za Parani nu Tofeli nu Labani nu Hazeroti nu Dizahabu. 2 Kutukila mwiduko wa Horebu nu kubasa ku Kadesi-Barnea, genda bantu mu nzila za miduko za Seiri, kuli lugendo lwa bindi ikumi nu kimozi. 3 Ku busi butangi bwa mwezi w'ikumi nu umozi wa mwaka makumi manazi wa kutuka mu Misri, bubo busi Musa abwide baIsraeli makakizio mansania mamukakizizie Yehowa. 4 Atendile kubeli kumbusa kwa kwita Sihoni, u mukota wa baAmori wikalaga mu Hesiboni, nu eitile Ogi, u mukota wa Basani wikalaga mu Astaroti nu Edirei. 5 Ku mutili wa Yordani ku lulenge lwa kukutukaga kisongo kya busi, Musa alingile kusambala mulembe wono, gaabatendile bunee: 6 “Yehowa, Kalaga weitu, atutendile bunee: ‘Muse mwikala mu mwiduko wono nkungu zakuka. 7 Mugaluke nu kwenda ku kisi kya miduko za baAmori nu biziki binsania bili bwigi nazo, u kibitabita kyamanwa Araba, nu miduko nu kisi kyabota nu ku Negevi nu ku mutili wa kitatenge Kinene, kisi kya baKanana aaba nu ku mwiduko wa Lebanoni nu ku luuzi lunene Furati. 8 Nne Yehowa namukasile kikino kisi. Mwingile mukyo nu kukiyana, kubuno kili kisi kinalagile ku basoinyuwe, u Abrahamu, nu Isaka nu Yakobo. Nakilagile kubeli nu ku kibuti kyabo.’
Bakulu nu ngatu zasombwedwe.
9 Mu nkungu zezo gatwabezaga twikala ku mwiduko wa Horebu namubwide bunee: ‘Nsinavwama kumweka nnenyene. 10 Yehowa, Kalaga weinyu, amukitile kuba beingi, nu lelo muli beingi anga nkeninkeni za kwigulu. 11 Yehowa, Kalaga wa basoinyuwe, amukite kuba beingi mambizi kanunu kutinga bumuli, nu amukase mponga anga bwamulagile. 12 Nnenyene, buni buninavwama kweka buzitu bweinyu nu nsake zeinyu? 13 Musombole gamusamba beiya menge nu bumenyinino, u bantu bakulu bakusongolola bitondo. Basombolwe ku kikanga na kikanga kyeinyu, nu nne, nababike basondelezia beinyu.’
14 Nu mwanakwide bunee: ‘Kikyo kiwatenda kili kisoga kutuli.’
15 Ububo nabikile basondelezia ba bikanga byeinyu, u bantu ba menge nu bumenyinino, nu mitonge, buno babe bemanizi ba tununu, aba bemanizi ba nkama, aba ba makumi matano, aba ba bantu ikumi, nu bangati ba bikanga byeinyu. 16 Nkungu zezo nakakizizie ngatu zeinyu bunee: ‘Atulazi milondo zili gasamba mibuto zeinyu, nu sungiazi na kwisanana muntu nu mubuto wage nu mugeni uli n'inyu. 17 Tamukutye bantu mu lusungio. Ungwililazi bakeke nu banene; tamukue bantu boba, kubuno lusungio luli lwa Kalaga. Nu mulondo u mutavwame, nti mwavwa nago kundi nigusese.’ 18 Mu nkungu zezo namukakizizie binsania bimwakite.
BaIsraeli banana kwingila mu kisi.
19 Twakitile anga bwatukakizizie Yehowa, Kalaga weitu. Twatukile ku Horebu nu twendile mu kalula kanene kakuganiagania nu kamwamonine kuko mu nzila zikwenda ku miduko za baAmori aaba nu twabasile ku Kadesi-Barnea. 20 Nu namutendile bunee: ‘Mwavule ku miduko za baAmori ku kisi kyatukasile Yehowa, Kalaga weitu. 21 Lolazi kisi kili lwabusio lweinyu, Yehowa,Kalaga weinyu, amukasile kyo. Bakamazi nu kukiyana anga bwamubwide Yehowa, Kalaga wa basoinyuwe. Tamukue boba nu kukutwa.’
22 Inyuwe bansania mwankundile nu kuntenda bunee: ‘Tusinge bantu batitike kisi nu kutuvwila na musagu wa nzila zitwatinge muzo, nu miino zitunabasa muzo.’ 23 Kikino kyantananizizie, nu natolile bantu ikumi nu babili, nawe nawe wa kikanga kimozi. 24 Bendile nu kubakama ku miduko. Babasile ku kibitabita kya Eskoli nu kukitambula. 25 Bakolile biguma bimozi bya kikyo kisi nu kuvwa nabyo kutuli. Batusambalide musagu wa kisi bunee: ‘Kikino kisi kyatukasa Yehowa, Kalaga weitu, kili kisoga.’
26 Tondo mwasombile kubakama, kubuno mwagunine ikakizio lya Yehowa, Kalaga weinyu. 27 Nu mwakitile manungunungu mu numba zeinyu za hema. Mwatendile bunee: ‘Yehowa atutikizye mu kisi kya Misri kutukasana ku maboko ma baAmori kutuzikya, kubuno akutusomba. 28 Twabakame kuni? Mibuto zeitu zakutizie mitima zeitu. Batutendile bunee: “Bantu beli balazi nu mapuka kututinga nu miino zabo zili minene nu zili na mikolo zasakama. Nu twamonine ku bana ba Anaki gago.”’
29 Mu nkungu zezo namubwide bunee: ‘Tamukue boba, aba kubakua boba. 30 Yehowa, Kalaga weinyu, u gukumusondelezia, amulwanine anga bumwamonine binsania byamukitide mu Misri, 31 nu mu kalula mwamonine buni bwamwekile Yehowa, Kalaga weinyu, mu nzila insania zimwendile aaba nu mwabasile gano, anga bukweka muntu mwana wage.’ 32 Tondo kumbusa kwa bitondo bibyo binsania tamwakatizizie Yehowa, Kalaga weinyu, 33 wamusondelezizie mu nzila buno amulondele biziki bya kobaka numba zeinyu za hema. Amusondelezizie na keiya mu kindi nu mu kimpa mu musi.
Mukota Kalaga asubya baIsraeli.
34 Yehowa ungule moki meinyu, nu ongilwe. Alumbide bunee: 35 ‘Lebelebe ta umozi wa bantu ba kibuti kikino kibi akamona kisi kikino kisoga kinalagile kukasa ku basoinyuwe, 36 tondo Kalebu mwana wa Yefune akakimona, nu we nu bana bage nabakase kisi kyendile ko na magulu mage, kubuno ayangile Yehowa nunsania.’
37 Yehowa anongedwe ku kabamba keinyu. Antendile bunee: ‘Nu uwe ntwingile mukyo. 38 Yosua mwana wa Nuni akwemana lwabusio lwobe. Nu we eingile mukyo. Mukase magala kubuno we akakiyania ku baIsraeli. 39 Nu babo bana beinyu bamukutenda buno beitwe, u babo beteli na bumenyinino bwa busoga nu bubi lelo, bakeingila mukyo, nu nkabakasa kyo buno bakiyane. 40 Nu inyuwe tondo, mwagaluke kwenda ku kalula ku nzila zikwenda ku Kitatenge Kyakisimana.’
41 Ububo mwakwide nu kubula bunee: ‘Twagide Yehowa. Twabakame nu kulwana anga bwatukakizizie Yehowa, Kalaga weitu.’ Nu mwekile bansania na muntu na muntu ngabo zage, nu mwabakamine mwiduko.
42 Tondo Yehowa antendile bunee: ‘Babule buno tababakame nu tabeitane, kubuno nsili munkatini mweinyu, munavwa kukindwa na beiti beinyu.’ 43 Namubwide bubuno, nu inyuwe tamungwilide, tondo mwagunine ikakizio lya Yehowa nu mwagelekile kubakama mwiduko. 44 Nu baAmori bakwikalaga mu mwiduko bamubaside nu bamusolobokede anga minzunzu, nu bamupumbizie kutuka mu Seiri aaba nu ku Horma. 45 Nu mwasubizie nu kulila lwabusio lwa Yehowa, tondo Mukota Kalaga ntongwilide iyuki lyeinyu, aba kumutegekela kutuzi aba kakeke. 46 Ububo mwikalaga mu Kadesi bindi byingi, u bindi binsania bitwabezaga twikala ko.”