<<    <     MAGANZO     1     >    >> 
MAGANZO
1
1 Ku kindi kitangi kya mwezi w'ibili wa mwaka w'ibili kumbusa kwa kutuka kwa baIsraeli mu Misri, Yehowa atendenne na Musa mu Numba za Kukulumana gababezaga mu Kalula ka Sinai. Yehowa amubwide bunee: 2 “Ganza musanganano unsania wa baIsraeli. Baganze mu bikanga bya beisibo, wamulume na wamulume, mu bikanga byabo. 3 Sanza meina mabo, muntu na muntu, kulinga na bantu ba myaka makumi mabili nu kutinga, u bansania banavwama kwenda ku bita, ba mu kilongo kya baIsraeli. Uwe nu Haruni mubaganze mu bibombo byabo. 4 Nu muntu umozi wa kikanga na kikanga, u mukulu munene wa kikanga kyage, abe gamozi n'inyuwe.
5 Meina ma bamulume baganze n'inyuwe meli: Mu kikanga kya Rubeni, Elisuri mwana wa Sedeuri; 6 mu kikanga kya Simeoni, Selumieli mwana wa Zurisadai; 7 mu kikanga kya Yuda, Nasoni mwana wa Aminadabu; 8 mu kikanga kya Isakari, Netaneli mwana wa Zuari; 9 mu kikanga kya Zebuluni, Eliabu mwana wa Heloni; 10 mu kikanga kya Yosefu: mu kikanga kya Efuraimu, Elisama mwana wa Amihudi; mu kikanga kya Manase, Gamalieli mwana wa Pedasuri; 11 mu kikanga kya Benjamina, Abidani mwana wa Gideoni; 12 mu kikanga kya Dani, Ahiezeri mwana wa Amisadai; 13 mu kikanga kya Aseri, Pagieli, mwana wa Okrani; 14 mu kikanga kya Gadi, Eliasafu, mwana wa Deueli; 15 mu kikanga kya Nafutali, Ahira mwana wa Enani.”
16 Babano basombwedwe na musanganano wa bamulume, bakota ba bikanga byabo. Babezaga bakulu ba bikanga bya baIsraeli.
17 Musa nu Haruni batolile bantu bamulume batekwidwe meina mabo, 18 nu bakundamanizie musanganano unsania ku busi butangi bwa mwezi w'ibili. Bamulume balolesizie bikanga byabo gabatendile meina ma beisibo nu bikanga byabo. Kulinga na bamulume babezaga na myaka makumi mabili nu kutinga, baganzile bansania, na muntu na muntu n'izina lyage. 19 Anga bwamukakizizie Yehowa, bubo u bwaganzile Musa baIsraeli mu Kalula ka Sinai.
20 BaRubeni, ba kikanga kya nkula za Israeli, mu bibuti byabo, ku bikanga byabo, ku numba za beisibo, anga buli maganzo ma meina ma muntu na muntu, bamulume bansania kutukila ku myaka makumi mabili nu kutinga, bansania bavwamine kwenda ku bita, 21 baganzilwe ba kikanga kya Rubeni, babezaga tununu makumi manazi nu mutuba nu nkama itano (46.500).
22 Nu baSimeoni, mu bibuti byabo, ku bikanga bya beisibo, anga buli maganzo ma meina ma muntu na muntu, bamulume bansania kutukila ku myaka makumi mabili nu kutinga, bansania bavwamine kwenda ku bita, 23 baganzilwe, ba kikanga kya Simeoni, babezaga tununu makumi matano nu mubula nu nkama isatu (59.300).
24 Nu baGadi, mu bibuti byabo, ku bikanga bya beisibo, anga maganzo ma meina ma muntu na muntu, bamulume bansania kutukila ku myaka makumi mabili nu kutinga, bansania bavwamine kwenda ku bita, 25 baganzilwe, ba kikanga kya Gadi, babezaga tununu makumi manazi nu tutano, nkama mutuba nu makumi matano (45.650).
26 Nu baYuda, mu bibuti byabo, bikanga bya beisibo, anga maganzo ma meina ma muntu na muntu, bamulume bansania kutukila myaka makumi mabili nu kutinga, bansania bavwamine kwenda ku bita, 27 baganzilwe mu kikanga kya Yuda, babezaga tununu makumi mutubakamo nu tunazi nu nkama mutuba (74.600).
28 Nu baIsakari, mu bibuti byabo, ku bikanga bya beisibo, anga maganzo ma meina ma muntu na muntu, bamulume bansania kutukila myaka makumi mabili nu kutinga, babo bavwamine kwenda ku bita, 29 baganzilwe mu kikanga kya Isakari, babezaga tununu makumi matano nu tunazi nu nkama inazi (54.400).
30 Nu baZebuluni, mu bibuti byabo, ku bikanga bya beisibo, anga maganzo ma meina ma muntu na muntu, bamulume bansania kutukila myaka makumi mabili nu kutinga, babo bavwamine kwenda ku bita, 31 baganzilwe mu kikanga kya Zebuluni, babezaga tununu makumi matano nu mutubakamo nu nkama inazi (57.400).
32 Ku bana ba Yosefu, baEfuraimu, mu bibuti byabo, ku bikanga bya beisibo, anga maganzo ma meina ma muntu na muntu, bamulume bansania kutukila myaka makumi mabili nu kutinga, babo bavwamine kwenda ku bita, 33 baganzilwe mu kikanga kya Efuraimu, babezaga tununu makumi manazi nu nkama itano (40.500).
34 Nu baManase, mu bibuti byabo, ku bikanga bya beisibo, anga maganzo ma meina ma muntu na muntu, bamulume bansania kutukila myaka makumi mabili nu kutinga, babo bavwamine kwenda ku bita, 35 baganzilwe mu kikanga kya Manase, babezaga tununu makumi masatu nu tusatu nu nkama ibili (33.200).
36 Nu baBenjamina, mu bibuti byabo, ku bikanga bya beisibo, anga maganzo ma meina ma muntu na muntu, bamulume bansania kutukila myaka makumi mabili nu kutinga, babo bavwamine kwenda ku bita, 37 baganzilwe mu kikanga kya Benjamina, babezaga tununu makumi masatu nu tutano nu nkama inazi (35.400).
38 Nu baDani, mu bibuti byabo, ku bikanga bya beisibo, anga maganzo ma meina ma muntu na muntu, bamulume bansania kutukila myaka makumi mabili nu kutinga, babo bavwamine kwenda ku bita, 39 baganzilwe mu kikanga kya Dani, babezaga tununu makumi mutuba nu tubili nu nkama mutubakamo (62.700).
40 Nu baAseri, mu bibuti byabo, ku bikanga bya beisibo, anga maganzo ma meina ma muntu na muntu, bamulume bansania kutukila ku myaka makumi mabili nu kutinga, babo bavwamine kwenda ku bita, 41 baganzilwe mu kikanga kya Aseri, babezaga tununu makumi manazi nu kamozi nu nkama itano (41.500).
42 Nu baNafutali, mu bibuti byabo, ku bikanga bya beisibo, anga maganzo ma meina ma muntu na muntu, bamulume bansania kutukila ku myaka makumi mabili nu kutinga, bansania bavwamine kwenda ku bita, 43 baganzilwe mu kikanga kya Nafutali, babezaga tununu makumi matano nu tusatu nu nkama inazi (53.400).
44 Babano bansania baganzilwe na Musa nu Haruni nu bakota ikumi nu babili, nawe nawe wa kyage kikanga. 45 Baganzile baIsraeli bansania babezaga bamulume ba myaka makumi mabili nu kutinga, u babo bavwamine kwenda ku bita, nu babaganzile mu bikanga byabo. 46 Maganzo ma bamulume bansania babezaga tununu nkama mutuba nu tusatu, nkama itano nu makumi matano (63.550).
47 Tondo baLawi mu bikanga bya beisibo tabaganzilwe na bango bamulume, 48 kubuno Yehowa abwide Musa bunee: 49 “Tamuganze bikanga bya baLawi; nu tamubaganze gamozi na bango baIsraeli. 50 Tondo bakase mulimo wa Numba za Hema za Bulongeki, nu mulimo wa bintu binsania bili byazo, bya munda mwazo nu bya kumbuga kwazo. Beeke Numba nu binsania byazo, nu kuzilanga, nubo babike ido lyabo kuzitimba. 51 Mu nkungu za kwendelela na Numba, baLawi bazikane nu kuzeka. Kungwa zikwimikwa, nti zimikwe na baLawi; ndi mugeni wa kingo kikanga wazikunde, nti eitwe. 52 BaIsraeli bobake numba zabo, muntu na muntu, mu kiziki kya kikanga kyage, nu nawe nawe ku ibendela lyage, mu bibombo byabo. 53 Tondo baLawi bobake ido lyabo kutimba Numba za Bulongeki buno bongoa bwane tabube ku baIsraeli. BaLawi bakunge Numba za Hema za Bulongeki.” 54 BaIsraeli bakitile bubo, anga bwakakizizie Yehowa ku Musa. U bubo bubakitile.