Kulongekwa kwa bikanga.
2
1 Yehowa atendile ku Musa nu Haruni bunee: 2 “BaIsraeli bobake numba zabo za hema bulazi na Numba za Kukulumana, na muntu na muntu ku lyage iyombo ku ibendela lyalyo nu ku kalolesio ka kikanga ky'isi. 3 Ku lulenge lwa kuntata, u ntungo za kukutukaga kisongo kya busi, mayombo ma kikanga kya Yuda mobake numba zabo ku ibendela lyabo. Nu mukota wa baYuda abe Nasoni mwana wa Aminadabu. 4 Maganzo ma mayombo mage meli tununu makumi mutubakamo nu tunazi nu nkama mutuba (74.600). 5 Nu bwigi nabo, mayombo ma kikanga kya Isakari mobake numba zabo. Mukota wa baIsakari abe Netaneli, mwana wa Zuari. 6 Maganzo ma mayombo mage meli tununu makumi matano nu tunazi nu nkama inazi (54.400).
7 Bwigi nabo, mayombo ma kikanga kya Zebuluni mobake numba zabo. Mukota wa baZebuluni abe Eliabu, mwana wa Heloni. 8 Maganzo ma mayombo mage meli tununu makumi matano nu mutubakamo nu nkama inazi (57.400).
9 Maganzo ma bamulume bansania b'ibendela lya Yuda, u babo beikalaga ku kibe kya baYuda mu mayombo mabo, mabezaga bamulume tununu lukama makumi kinana nu mutuba nu nkama inazi (186.400). Mayombo ma Yuda makwenda lwabusio.
10 Ku lulenge lwa kwidume kwabe ibendela lya Rubeni, nu mayombo ma kikanga kya Rubeni mobake numba zabo kulyo. Mukota wa baRubeni abe Elisuri mwana wa Sedeuri. 11 Maganzo ma mayombo mage meli tununu makumi manazi nu mutuba nu nkama itano (46.500).
12 Bwigi nabo, mayombo ma kikanga kya Simeoni mobake numba zabo. Mukota wa baSimeoni abe Selumieli mwana wa Zurisadai. 13 Maganzo ma mayombo mage meli tununu makumi matano nu mubula nu nkama isatu (59.300).
14 Bwigi nabo, mayombo ma kikanga kya Gadi mobake numba zabo. Mukota wa baGadi abe Eliasafu, mwana wa Deueli. 15 Maganzo ma mayombo mage meli tununu makumi manazi nu tutano, nkama mutuba nu makumi matano (45.650).
16 Maganzo ma bamulume bansania b'ibendela lya Rubeni, u babo beikalaga ku kibe kya baRubeni mu mayombo mabo, mabezaga bamulume tununu lukama makumi matano nu kamozi, nkama inazi nu makumi matano (151.450). Mayombo ma Rubeni makwenda mu kiziki kya bibili.
17 Nu Numba za Hema za Kukulumana gamozi na bantu ba kikanga kya Lawi zikwenda munkatini mwa mayombo mansania. Bakwenda na muntu na muntu mu kiziki kyage ku ibendela lyage, anga bubeikale mu ido.
18 Ku lulenge lukwendaga kisongo kya busi kwabe ibendela lya Efuraimu, nu mayombo ma kikanga kya Efuraimu mobake numba zabo ku ibendela lyabo. Mukota wa baEfuraimu abe Elisama, mwana wa Amihudi. 19 Maganzo ma mayombo mage meli tununu makumi manazi nu nkama itano (40.500).
20 Mayombo ma kikanga kya Manase mobake bwigi nabo, nu mukota wa baManase abe Gamalieli mwana wa Pedasuri. 21 Maganzo ma mayombo mage meli tununu makumi masatu nu tubili nu nkama ibili (32.200).
22 Mayombo ma kikanga kya Benjamina mobake numba zabo bwigi nabo. Mukota wa baBenjamina abe Abidani mwana wa Gideoni. 23 Maganzo ma mayombo mage meli tununu makumi masatu nu tutano nu nkama inazi (35.400).
24 Maganzo ma bamulume bansania b'ibendela lya Efuraimu, u babo beikalaga ku kibe kya Efuraimu mu mayombo mabo, mabezaga bamulume tununu lukama nu kinana nu lukama lumozi (108.100). Mayombo ma Efuraimu makwenda mu kiziki kya bisatu.
25 Ku lulenge lwa kwikazi kwabe ibendela lya Dani, nu mayombo ma kikanga kya Dani ku ibendela lyabo. Mukota wa baDani abe Ahiezeri mwana wa Amisadai. 26 Maganzo ma mayombo mage meli tununu makumi mutuba nu tubili nu nkama mutubakamo (62.700).
27 Mayombo ma kikanga kya Aseri mobake bwigi nabo. Mukota wa baAseri abe Pagieli mwana wa Okrani. 28 Maganzo ma mayombo mage meli tununu makumi manazi nu kamozi nu nkama itano (41.500).
29 Mayombo ma kikanga kya Nafutali mobake bwigi nabo. Mukota wa baNafutali abe Ahira mwana wa Enani. 30 Maganzo ma mayombo mage meli tununu makumi matano nu tusatu nu nkama inazi (53.400).
31 Maganzo ma bamulume bansania b'ibendela lya Dani, u babo beikalaga ku kibe kya Dani, mabezaga tununu lukama makumi matano nu mutubakamo nu nkama mutuba (157.600). Mayombo mamo makwenda ku kuzinda gamozi n'ibendela lyabo.” 32 Babo beli baIsraeli baganzilwe mu bikanga bya beisibo. Maganzo ma bansania mu mayombo mabo meli tununu nkama mutuba nu tusatu nu nkama itano (603.500). 33 Tondo babo ba kikanga kya Lawi, u baLawi, tabaganzilwe na bango baIsraeli, anga bwakakizizie Yehowa ku Musa. 34 Bubo u bwakitile baIsraeli binsania byakakizizie Yehowa ku Musa. Beikalaga mu ido lyabo, na muntu na muntu mu kibe kyage ku ibendela lyage, nu bubo u bubendaga, na muntu na muntu mu kikanga kyage mu bikanga bya beisibo.