BALAWI
Bisansa bya kugisibwa
1
1 Yehowa amanine Musa ku Numba za Kukulumana. Amubwide bunee: 2 “Tenda na baIsraeli nu kubabula bunee: ‘Ndi umozi kumuli atunda kuvwa kukasana ku Yehowa kisansa, nti avwe na kisansa kya ngombe aba kya mukoko. 3 Ndi kisansa kyage kili ngombe, nti akasane mulume wa ngombe waswaga nunse. Azikase ga mwingilo wa mukolo wa Numba za Hema buno eitabizibwe na Yehowa. 4 Abike kuboko kwage gantata g'itoe lya ngombe za kisansa kya kugisibwa, nu zitabizibwe ku kabamba kage kuba bukuluzi bwage. 5 Nu we asese mulume wa ngombe lwabusio lwa Yehowa, nu basankoga, u bana ba Haruni, balusie mikila zazo nu kuzisandila ku ntungo insania za kasenga ka kayulo keli bwigi na mwingilo wa mukolo wa Numba za Kukulumana na Kalaga. 6 Kumbusa azitutule nu kuzibaga byindibyindi. 7 Nu bana ba Haruni sankoga bakongie keiya ga kasenga nu balongeke misali ga keiya, 8 nu balongeke byindi bya ngombe n'itoe gamozi na manona mazo gantata misali zikugulumina ga kasenga. 9 Tondo asuge tanga byamunda byazo nu magulu na mazi, nu sankoga abibike ga keiya keli ga kasenga kugisia binsania byazo, kubuno bili kisansa kya keiya, u kisansa kya kugisibwa na keiya kya nsunu nsoga zatananina Yehowa.
10 Ndi kisansa kyage kili kya mukoko aba kya mpene, nti akasane kilimba kyaswaga nunse. 11 Akisese ku ntungo za kwikazi kwa kasenga ka kugisia bisansa lwabusio lwa Yehowa. Basankoga, u bana ba Haruni, basandide mikila zakyo ku ntungo insania za kasenga ka bisansa. 12 Kumbusa akibage byindibyindi, nu sankoga abilongeke gamozi n'itoe nu manona gantata misali zili ku keiya ga kasenga. 13 Tondo asuge byamunda byakyo nu magulu makyo na mazi, nu sankoga alusie binsania ku kasenga nu kubigisia nunsania. Bili kisansa kya kugisibwa na keiya kya nsunu nsoga zatananina Yehowa.
14 Ndi kisansa kyage kyakukasana ku Yehowa kili kazoni ka kugisibwa, nti anakasana kilinga aba mwana wa nkulimba. 15 Sankoga azilusie ku kasenga ka bisansa nu kuzikutula itoe nu kuzigisia mu keiya keli ga kasenga. Mikila zazo zasongolozibwe ku lulenge lwa kasenga ka bisansa. 16 Nu atikye lutelelo lwazo gamozi na nsala zazo nu kuzisa ku lulenge lwa kukutukaga kisongo kya busi lwa kasenga ku kiziki kya lwito. 17 Azate buno ku kibe na kibe kwasigale kyupe kyakyo, nu ntazilekanukye nunsania ku byindi bibili. Zili kisansa kya kugisibwa na keiya, u nsunu nsoga zatananina Yehowa.’”