KUTUKA
Mbabazio za baIsraeli mu Misri.
1
1 Mamano meli meina ma baIsraeli bavule na Yakobo ku Misri, muntu na muntu na kyage kikanga: 2 Rubeni, Simeoni, Lawi, Yuda, 3 Isakari, Zebuluni, Benjamina, 4 Dani, Nafutali, Gadi nu Aseri. 5 Maganzo ma bansania ba kikanga kya Yakobo mabezaga makumi mutubakamo. Yosefu abezaga mu Misri kalazi. 6 Yosefu akule, nu mibuto zage zinsania nu bansania ba kibuti kyabo bakule. 7 BaIsraeli babutile bana beingi, nu bitide nunse, nu babede na magala. Beizazizie kisi kya Misri.
8 Kwabede ungo mukota utamenyine Yosefu. 9 Abwide bantu bage bunee: “Tamukumona, baIsraeli beli beingi nu beiya magala kututinga. 10 Tubakitile na menge buno tabitile lingo, kubuno ku nkungu zinavwa bita banagomia na beiti beitu, kwitana n'iswe nu kutuka mu kisi kyeitu.”
11 Ububo babikile bemanizi ba mukota kubababazia na mizigo nu mulimo mubibu nunse. BaIsraeli bobakide Farao miino za bigenge, u Pitomu nu Ramesesi. 12 Tondo gabatalikide mbabazio za baIsraeli, bitide nunse, nu bagandilegandile, nu baMisri babakule boba gabamonine ku bwingi bwa baIsraeli. 13 BaMisri basungizie baIsraeli na mulimo mukali nunse, 14 nu babababazizie na bukobe bukali. BaIsraeli bakitilaga baMisri na milimo za kututa mabiliki nu kobaka numba, nu za masoa, nu za nkita insania za bukobe bukali. BaMisri tababezaga na kyombo ku baIsraeli aba kakeke.
15 Mukota wa Misri atendenne na babo basana ba baEbrania. Izina lya mutangi lyabezaga Sifura, nu lya ungo lyabezaga Puha. 16 Mukota ababwide bunee: “Nkungu zimukubutia bakikulu ba baEbrania nu mwamona buno babuta mwana wamulume, nti mwamwita, tondo ndi babuta mukinga nti mwamusiga buno alame.” 17 Tondo basana bakule Kalaga boba nu tabakitile anga bwababwide mukota wa Misri. Basigile bana bamulume. 18 Ububo mukota wa Misri amanine basana nu ababuzizie bunee: “Kubuni mwakitile bubuno? Kubuni mwasigile bana bamulume?”
19 Basana bakwide Farao bunee: “Kubuno bakikulu ba baIsraeli tabeli anga bakikulu ba baMisri, kubuno beli na magala kubatinga. Bakubika gansi nti basana tabebasa.” 20 Kalaga akitide basana mponga, nu baIsraeli bitide nunse, nu babede beingi lingo. 21 Kalaga akwilide basana kyombo nu bo babede na babo bana bobenyene, kubuno bakule Kalaga boba.
22 Nkungu zezo Farao akakizizie bantu bage bansania bunee: “Mwana wamulume wabutagwe, nti mwamwisa mu luuzi, nu mwana wa mukazi nti mwamusiga.”