50
1 Yosefu eiyisile ku isi ga mugu, kumumuma nu kumulilila. 2 Nu akakizizie basakizi bage kubika miti ku kitumba ky'isi buno takibole. Nu basakizi bakitile bubo, 3 na busi na busi, bindi makumi manazi, kubuno u byabezaga bindi bya kubika miti za kutabozia bitumba. Nu baMisri balilide Israeli bindi makumi mutubakamo. 4 Gasilile bindi bibyo bya kulilila Yakobo, Yosefu abwide bantu ba numba za Farao bunee: “Ndi mwankwila kyombo, ntendelazi ku Farao bunee: 5 ‘Tatane andumbizizie bunee: “Nise nalekana. Nyikazi mu nsinda zinombile ku kisi kya Kanana.”’ Kano kaluma nakusega kwenda kuyika tatane muzo. Kumbusa nasubye gano.”
6 Farao amwakwide bunee: “Enda uyike so, anga bwakulumbizizie kukita.”
7 Yosefu endile kuyika isi, nu mitonge insania za Farao, u banene bansania ba numba zage nu ba kisi kinsania, bendile gamozi na Yosefu. 8 Mibuto za Yosefu nu bansania ba bikanga byabo nu bansania ba numba za Yakobo, u bakiti bage, bendile gamozi na Yosefu. Basigile tugu bana bakeke nu balezi babo, nu basigile bituganwa binsania byabo mu kisi kya Goseni. 9 Babo bendile na Yosefu babezaga beingi nu bendile na tuyanga twingi nu na babo bendaga ga farasi.
10 Gababasile ku kiziki kya kususula mumpunge kya Atadi, lisilya lya luuzi lwa Yordani, balalukile n'idilo lya kabebe nu lubaba lukali. Kuko, Yosefu alilide isi bindi mutubakamo. 11 Gamonine baKanana beikalaga kuko ku kulila kubalilaga ku kiziki kya kususula mumpunge kya Atadi, batendile bunee: “BaMisri beli na kisagulo kya kulila!” Ku kabamba kako kiziki kikyo kili bwigi na Yordani kyamaninwe Abeli-Misraimu.
12 Bubo u bwakitile ba Israeli anga bwabakakizizie isibo. 13 Bekile kitumba kyage ku kisi kya Kanana nu kukiyika mu kalimba kili mu isoa lyamanagwa Makipela, bwigi na mwino wa Mamure. Abrahamu akunzile kibe kya nsinda ku Efuroni muHiti isoa gamozi na nsinda. 14 Kumbusa kwa kuyika isi, Yosefu asubanizie ku Misri gamozi na mibuto zage nu bango bansania bavule nage kuyika isi.
Yosefu abibya mibuto zage.
15 Gamenyine mibuto za Yosefu buno isibo akua nu kuyikwa, batendenne bunee: “Buni bwabasa kutuli; ndi Yosefu eli na musona kutuli, nu ndi aneisuba ku bwagi bunsania butwamukitide?” 16 Ukinsa basingile mugenzi ku Yosefu kutenda bunee: “So akakizizie lwabusio ntekua bunee: 17 ‘Tendazi ku Yosefu bunee: “Nakusega kusigilila mibuto zobe bwagi nu bubi bubakukitide.”’ Kano kaluma twakusega kusigilila bwagi bwakukitide bakobe ba Kalaga wa so.” Gongule Yosefu ku musagu wozo, alilile.
18 Mibuto zage zo zenyene zakundile Yosefu nu kukumbama lwabusio lwage. Bamutendile bunee: “Tuli bakobe bobe.”
19 Tondo Yosefu abakwide bunee: “Tamukue boba! Ndi nili Kalaga? Aba ndi nili mu kiziki kya Kalaga? 20 Mwakengede kunkitila bubi, tondo Kalaga wenyene abugalukizye ku busoga buno nikite anga bubo lelo nu konia tulamo twingi. 21 Kasi tamukue boba. Nkamulanga inyuwe nu bana beinyu.” Nu ababibizie nu atendile kubeli na kyombo.
Lukuo lwa Yosefu.
22 Yosefu eikede mu Misri, gamozi na bansania ba kikanga ky'isi. Alamine myaka lukama nu ikumi, 23 nu amonine ku bana ba Efuraimu aaba nu ku kibuti kyabo kya bisatu. Lingo bana ba Makiri mwana wa Manase bakasilwe ku Yosefu buno abalele ga mazu mage. 24 Atendile ku mibuto zage bunee: “Nise nakua, tondo Kalaga akamulanga lebelebe nu kumutikya mu kisi kikino, kumubasia ku kisi kyalagile mu idagano ku Abrahamu nu Isaka nu Yakobo.” 25 Yosefu alutile baIsraeli nu kubalumbizia bunee: “Lebelebe Kalaga akamulanga nu kumukasia; nu inyuwe mwatunganana kweka makwa mane kutuka mu kisi kikino.”
26 Nu Yosefu akule gaabezaga eseli na myaka lukama nu ikumi. Kumbusa kwa kumubika muti buno ntabole, bamubikile mu sanduku mu kisi kya Misri.