Mponga nu bulengania bwa Yakobo.
49
1 Kumbusa kwa bibyo bitondo binsania, Yakobo amanine bana bage bansania, nu ababwide bunee: “Kundamanazi, nimusambalile bibyo bikavwa kumuli ku bindi bya ga lwabusio: 2 Kundamanazi nu ungwililazi, inyuwe bana ba Israeli.
Ungwililazi soinyuwe, u Israeli.
3 Rubeni, uli nkula zane, nu magala mane, mutangi wa magala,
Nu waswaga kuganunwa, waswaga kuba na bwangato.
4 Tondo ukutengatenga anga mazi, nu ntukaba mutangi lingo,
Kubuno wendile ku mugu wa so nu kubika nsese kugo.
5 Simeoni nu Lawi beli mibuto, nu myene zabo za nganda zili za nsake.
6 Nsineingila mu lwango lwabo, aba kwingila ga lusu lwabo,
Kubuno beitile bantu ku bongoa bwabo,
nu kusesa miki za magulu ma ngombe anga bubatundile tugu.
7 Bongoa bwabo bwaswilidwe kubuno buli bukali;
nu bwiti bwabo bwaswilidwe kubuno buli bukali nunse.
Nkababalangania mu kilongo kya Yakobo, kubabalangania mu kisi kya baIsraeli.
8 Yuda, mibuto zobe zikakuganuna. Kuboko kwobe kwabe ku ikosi lya beiti bobe.
Kibuti kya so kikakukumbamina.
9 Ee Yuda, uli anga kyana kya nsimba.
Mwana wane, ukusubania ku bita anga bukusubya nsimba ku kwita engo nyama.
Anga bwiyombeka nsimba, bubo u buwiyombeke.
10 Musumbo wa bwangato bwa mukota munene tawatikibwe ku Yuda,
Aba bwangato bunene tabwatuke kweli, aaba nu kuvwa kwa wozo mwiya bwangato bunene.
BaBilongo bansania bakamwanza nunse.
11 Akaswika muzigi wa kukanda mpunda zage ku muzigi wa biguma,
Nu akaswika kyana kya mpunda ku muzigi musoga wa biguma.
Akasuga nsulu zage na maku, ee, nsulu zage mu mazi ma mizabibu.
12 Meiso mage makaba makisimana na maku,
Nu meinyo mage menga na mabele.
13 Zebuluni akeikala bwigi na kitatenge kinene,
Nu akaba mwiya maato manene, nu mwaga wage ukabasa ku Sidoni.
14 Isakari eli na magala anga buli mpunda nnene namo,
Tondo akubunda gansi anga bukubundaga mpunda gansi gasamba mizigo zage ibili.
15 Gaakamona ku busoga bwa kiziki kyage kya kwikala, u busoga bwa kisi kyage,
Nti akakita mulimo na magala mage,
Tondo akakitila bango mu bukobe.
16 Dani akangata bantu bage anga bukukita ngatu,
Anga kimozi ku bikalo bya baIsraeli.
17 Dani akaba anga nzoka ku ntungo za nzila,
Aba anga mpoma mu nzila.
Zikutoa magulu ma farasi,
Nu wozo ukwenda gazo akoloka gansi.
18 Mukota Kalaga, nkulindila konibwa nobe.
19 Gadi akanyagwa na babo bakunyaga,
Tondo akabakinda nu kubapumbia.
20 Aseri akalia malia meingi,
Nu akasinga ku mukota malia masoga nunse.
21 Nafutali eli anga nyama zikususania kangolo ka mu lubanda,
Zikubuta byana bibili anga maasa.
22 Yosefu eli anga muzigi wa biguma bisoga.
Wayikwa bwigi na kanuabalongo buno
Ntabi zago zikwasa kutinga kitutu ku bulazi.
23 Na lubaba beiya bunkanda basingile misungu kweli,
Ee, beisile misungu zabo na bwiti bwabo.
24 Tondo bunkanda bwage bwasigede bwagugumana.
Nu maboko mage masigede na magala,
Ku kabamba ka kuboko kwa Mwiya Magala wa Yakobo,
Ku kabamba ka Mulangi, u Kibanza a kya Israeli.
25 Ku kabamba ka Kalaga wa so, ukukukasia,
U Mwiya Mayombo ukukukasa mponga
Na mponga zikutuka kwigulu, nu ga kisi,
U mponga za kubuta nu kumomia bana.
26 Mponga za so zikutinga magala ma miduko,
Ee, zikutinga busoga bwa miduko mikeke.
Mponga zezo zibe ku Yosefu g'itoe lyage,
Ku wozo uli mutonge munkatini mwa mibuto zage.
27 Benjamina eli anga kimbwe kikuliaga.
Mu nindunindu kikulia nyama zeitile,
Nu mwigolo akubegania bibyo byanyagile.”
28 Babano u banene nu beisi ba bikanga ikumi nu bibili bya baIsraeli, nu moki mamano u matendile isibo kubeli gaabakasaga mponga; kukasa ku muntu na muntu mponga zaswaga kweli.
Lukuo lwa Yakobo.
29 Kumbusa kwa kubakasa mponga, abakakizizie bunee: “Nise nalekana nu kwenda kuli batatane. Yikazi kitumba kyane gamozi na batatane mu nsinda za kalimba keli mu isoa lya Efuroni muHiti, 30 u kalimba keli mu isoa likumanwa Makipela, bwigi na mwino wa Mamure mu kisi kya Kanana. Abrahamu, tatangulu, akunzile kalimba gamozi na lilyo isoa buno libe nsinda. Alikunzile ku Efuroni muHiti. 31 Mumo u mwayikilwe Abrahamu nu mukazi wage Sara, nu mumo u mwayikilwe Isaka nu mukazi wage Rebeka, nu mumo u munayikile Lea. 32 Isoa gamozi na kalimba byakunzilwe ku baHiti.”
33 Gasilile Yakobo kukakizia bana bage bubo, eiyombekile lingo ga mugu wage nu alekenne.