Kubutwa kwa Musa.
2
1 Muntu umozi wa kikanga kya Lawi asongile mukinga muLawi. 2 Wozo mukikulu ekile iyimi nu abutile mwana wamulume. Amonine buno eli mwana musoga, nu amubisile myezi isatu, 3 aaba nu ntavwamine kumubisa lingo. Nkungu zezo atolile nsekenseke nu azilukile luzi. Atalikile kulo kabulimbo nu aliga, nu abikile mwana mulo nu alubikile mu bisugu ku mutili wa luuzi. 4 Mubitu wa mwana emanine bulazi nage kulola, kumulanga, nu kumenya buni bwabase kweli. 5 Mukinga wa Farao agelile ku luuzi, gamozi na bakiti bage, atabangile ku mutili wa luuzi. Amonine ku luzi mu bisugu, nu asingile mukiti umozi kulutola. 6 Alwigwide nu amonine mwana mulo. Mwana abezaga es'alila, nu mukinga wa Farao amukwilide kyombo, nu atendile bunee: “Wono eli mwana wa baEbrania.”
7 Mubitu wa mwana abuzizie mukinga wa Farao bunee: “Ndi nende kukumanina mulezi umozi wa bakikulu ba baEbrania buno akumomezie mwana?” 8 Mukinga wa Farao amwakwide bunee: “Ee, enda.” Nu mubitu wa mwana endile kumana nina wa mwana.
9 Mukinga wa Farao abwide mulezi bunee: “Tola mwana wono ummomezie we, nu nne nkakuliga.” Ububo mukikulu atolile mwana nu amumomezie. 10 Gakulile mwana endile nage ku mukinga wa Farao wamukitide anga mwana wage. Amwinikile Musa. a Atendile bunee: “Namutikizye mu luuzi.”
Musa atina ku kisi kya baMidiani.
11 Musa, gaabezaga mukulu, atabangide mibuto zage. Amonine ku mizigo zabo. Amonine muMisri umozi akulibula muIsraeli umozi wa mibuto zage. 12 Musa agebilegebile nu ntamonine ku muntu. Eitile muMisri nu kumubisa mu misege. 13 Endile lingo lubi, nu amonine baEbrania babili bakulwana. Atendile ku wozo wabezaga mwagi bunee: “Kubuni ukulibula munyobe?”
14 Akwide bunee: “Nazi wakusombwede kuba mukota nu ngatu kutuli? Ndi ukutunda kunita anga buwitile wozo muMisri?”
Nu Musa akule boba nu akengede bunee: “Lebelebe bunakitile bwamenywa.”
15 Gongule Farao ku bubo, alondile kwita Musa. Tondo Musa atinine Farao ku kisi kya Midiani. Eikonkile bwigi na kanuabalongo. 16 Sankoga wa baMidiani abezaga na bakinga mutubakamo, nu bavwaga kutaga mazi nu kwizazia migezi za kunusia mikoko z'isibo. 17 Bango balangi ba mikoko bavule nu bapumbizie bakinga. Musa akasizie babo bakinga, nu anusizie lusumba lwa mikoko z'isibo. 18 Gabasubanizie ku isibo Reueli, b ababuzizie bunee: “Buni bumwasasia kusubya?”
19 Bakwide bunee: “MuMisri atutikizye mu maboko ma balangi, nu wenyene atutagide mazi nu kunusia mikoko zeitu.”
20 Isibo ababuzizie bunee: “Kuni kweli? Kubuni mwamusiga? Mumanazi avwe kulia n'iswe.”
21 Musa eitabizizie kwikala na wozo muntu, nu Yetoro asongizie Zipora mukinga wage ku Musa. 22 Zipora abutile mwana wamulume nu Musa amwinikile Gersomi, kubuno atendile bunee: “Nili mugeni mu kisi kiteli kyane.”
23 Kumbusa kwa bindi byingi, mukota wa Misri akule. BaIsraeli batongaga na mbabazio za bukobe bwabo nu balilile; nu kulila kwabo kungulwe na Kalaga. 24 Gongule Kalaga ku idilo lyabo, akengede idumbilo lyalumbide na Abrahamu nu Isaka nu Yakobo. 25 Kalaga amonine ku baIsraeli nu abakwilide kyombo mu mbabazio zabo.