KULINGA
Kubumbwa kwa kisi nu muntu mutangi
1
1 Mu kulinga Kalaga abumbile meigulu a nu kisi. 2 Kisi kyabezaga bulia nu geteli kena. Kapilo kabezaga gantata ga mazi. Muuza wa Kalaga wabezaga wagubatila mazi. 3 Kalaga atendile bunee: “Kyengi kibe.” Nu kyabede. 4 Kalaga amonine buno kyengi kili kisoga. Kalaga abeganizie kyengi na mwizi, 5 nu Kalaga einikile kyengi Busi nu mwizi Kindi. Kwabede igolo nu nindunindu, u kindi kitangi. 6 Kalaga atendile lingo bunee: “Kube mpapa gasamba mazi, nuzo zilekanukye mazi na mango mazi.” 7 Kalaga akitile mpapa nu alekanukizye mazi mabezaga kunsi kwa mpapa na mamo mazi gantata ga mpapa. Nu bubo bwabede. 8 Kalaga einikile zezo mpapa Igulu. Kwabede igolo nu nindunindu, u kindi kya bibili.
9 Kalaga atendile lingo bunee: “Mamo mazi meli kunsi kwa mpelela makundamane gamozi buno nsi zakama zimoneke,” nu bubo bwabede. 10 Kalaga einikile nsi zakama Kisi, nu mamo mazi Bitatenge. Kalaga amonine buno bwabezaga busoga. 11 Nu Kalaga atendile bunee: “Kisi kyasie bisugu nu biyikanwa bili na mbuto ku lukita lwabyo nu miti zikukolamaga biguma bili na mbuto zazo munda mwabyo ku lukita lwazo mu kisi,” nu bwabede. 12 Kisi kyasizie bisugu nu biyikanwa bili mu mbuto ku lukita lwabyo, nu miti zikukolamaga biguma bili na mbuto zazo munda mwabyo ku lukita lwazo. Kalaga amonine buno bwabezaga busoga. 13 Kwabede igolo nu nindunindu, u kindi kya bisatu.
14 Kalaga atendile lingo bunee: “Byengi bibe kwigulu buno bibeganie gasamba busi nu kindi, nubyo bibe tulolesio ku nkungu nu ku bindi nu ku myaka, 15 nu byengi bibe kwigulu kusania kyengi ga kisi.” Nu bubo bwabede. 16 Kalaga akitile byengi bibili binene, kikyo kinene nunse kyangate busi, nu kikyo kikeke kyangate kindi, gamozi na nkeninkeni. 17 Kalaga abibikile kwigulu buno bisane ga kisi, 18 nu kwangata busi nu kindi nu kubegania kyengi nu mwizi. Kalaga amonine buno bwabezaga busoga. 19 Kwabede igolo nu nindunindu, u kindi kya binazi.
20 Kalaga atendile lingo bunee: “Mazi mitile na bibumbwa binsania bili na kalamo, nu tuzoni tulenge ku kisi mu mpelela.” 21 Kalaga abumbile nyama nnene za mu kitatenge nu kibumbwa na kibumbwa kikulama mu mazi, nu byitide byingi ku nkita zabyo, nu tuzoni tukulenga ku lukita lwato. Kalaga amonine buno bwabezaga busoga. 22 Kalaga abikasile mponga gaatendile bunee: “Butanazi, mwitile, mwizazie mazi ma bitatenge, nu tuzoni twitile mu kisi.” 23 Nu kwabede igolo nu nindunindu, u kindi kya bitano.
24 Kalaga atendile lingo bunee: “Kisi kyitile na kibumbwa na kibumbwa kili na kalamo ku lukita lwakyo, nu bituganwa nu bikugelegeta nu nyama ku lukita lwazo.” Nu bubo bwabede. 25 Kalaga akitile nyama za mu kisi ku nkita zazo, nu bituganwa ku nkita zabyo, nu bikugelegeta ku nkita zabyo. Kalaga amonine buno bwabezaga busoga.
26 Nu Kalaga atendile bunee: “Tukite muntu ku kisusania kyeitu nu ku kilungi kyeitu. Angate byena bya mu kitatenge nu tuzoni twa mu mpelela nu nyama nu kinsania kikugelegeta ga kisi, nu kisi kinsania.” 27 Kalaga abumbile muntu mu kisusania kyage, mu kisusania kya Kalaga amubumbile. Ababumbile wamulume nu mukikulu. 28 Nu Kalaga abakasile mponga. Ababwide bunee: “Butanazi, nu mwitile. Mwizazie kisi nu ku kyangata. Mwangate byena bya mu kitatenge nu tuzoni twa mu mpelela nu binsania bili na kalamo bikugelegeta mu kisi.” 29 Kalaga atendile bunee: “Lolazi, namukasa biyikanwa binsania bili na mbuto bili mu kisi kinsania, nu muti na muti guli na biguma bili na mbuto zazo mubyo. Bibyo binsania byabe idia lyeinyu. 30 Nu ku nyama insania za mu kisi, nu ku tuzoni tunsania twa mu mpelela, nu ku binsania bikugelegeta ga kisi bili na kalamo, nakasile bisugu nu biyikanwa bibe idia lyabo.” Nu bwabede anga bubo. 31 Kalaga amonine buno binsania byakitile byabezaga bisoga nunse. Kwabede igolo nu nindunindu, u kindi kya mutuba.