2
1 Ububo bwasililide meigulu nu kisi nu kibombo kinene kili mubyo, 2 nu ku kindi kya mutubakamo mulimo wa Kalaga wasilile. Mu kindi kya mutubakamo umwinwe ku milimo zage zinsania zaakitile. 3 Kalaga akasile kindi kya mutubakamo mponga, nu akibikile buno kyabe kindi kya kumunwa, kubuno mu kindi kikyo Kalaga umwinwe ku milimo zage zinsania za kubumba nu kukita. 4 Kakano keli kazeni ka kubumbwa kwa meigulu nu kisi.
Isoa lya Edeni
Gabumbile Kalaga Yehowa kisi nu meigulu, 5 takwabezaga biyikanwa, nu bitembele tabyabezaga mu kisi. Mbuto tazasile, kubuno Kalaga Yehowa ntalokezye mbula mu kisi, nu takwabezaga muntu wa kulima isoa, 6 tondo lutundutundu lwalambile mu kisi, lwanunizie kisi kinsania. 7 Kalaga Yehowa abumbile muntu na mukungu wa kisi, nu opide muuza wa kalamo mu mwembe wage, nu muntu abede na kalamo.
8 Nu Kalaga Yehowa ayikile isoa ku lulenge lwa kuntata mu Edeni, nu abikile wozo muntu waabumbile mulyo. 9 Kalaga Yehowa asizie miti insania za kutananizia nu misoga za kulia, nu muti wa kalamo munkatini mw'isoa, nu muti wa kumenya bubi nu busoga.
10 Luuzi lwabasile mu Edeni lwa kununia isoa, nu galwatukile mu Edeni lwibeganizie ku myasa inazi. 11 Izina lya lutangi lili Pisoni; nu lwatimba mu kisi kinsania kya Havila, u kuko kuli olo, 12 nu olo za kikyo kisi zili nsoga. Lingo, kuko kuli bedola nu makozi makumanwa sardoniki. 13 Izina lya lw'ibili lili Gihoni, nu lwatimba mu kisi kinsania kya Kushi. 14 Izina lya lw'isatu lili Tigre, u lwagela kuntata kwa Asuria. Nu lw'inazi lili Furati.
15 Kalaga Yehowa abikile wozo muntu mu isoa lya Edeni kulilima nu kulilanga. 16 Kalaga Yehowa akakizizie wozo muntu bunee: “Unavwama kulia biguma bya miti insania zili mu isoa, 17 tondo ntulie ku biguma bya muti wa kumenya bubi nu busoga, kubuno ku busi buukalia kubyo lebelebe ukakua.”
18 Kalaga Yehowa atendile bunee: “Tabuli busoga muntu eikale wenyene. Namukitile mukasia wagomie nage.” 19 Kalaga Yehowa abumbile nyama insania za mu kisi na mukungu nu tuzoni tunsania twa mu mpelela. Abilusizie kuli muntu kulola buni bwanabyinika meina. Nu izina lyinikile kibumbwa na kibumbwa kili na kalamo u lyabede izina lyakyo. 20 Muntu einikile bituganwa binsania nu tuzoni twa mu mpelela nu nyama za mu lubanda, tondo ku muntu takwamonekile mukasia wa kugomia nage.
21 Kalaga Yehowa abikile muntu ku kabwebwe ka tulo, nu atikizye lupege lwage lumozi, nu akulumanizie lingo misuna galwabezaga. 22 Kalaga Yehowa abumbile mukikulu na lulo lupege lwatikizye ku muntu, nu avule na wozo mukikulu kuli muntu. 23 Muntu atendile bunee: “Kano kaluma wono eli ikwa lya makwa mane nu misuna za misuna zane. Akamanwa mukikulu, kubuno atukibwa mu wamulume.” 24 Ububo wamulume akasiga isi nu nina nu kulandana na mukazi wage, nu bobabili nti bakaba mubili umozi. 25 Nu bobabili babezaga mundulu, wamulume nu mukazi wage, nu tababezaga na nsoni.