Kulinga kwa bwagi.
3
1 Nzoka zabezaga na menge kutinga nyama insania zakitile Kalaga Yehowa. Zabwide mukikulu bunee: “Lebelebe ndi Kalaga amubwide bunee: ‘Tamulie ku biguma bya miti insania z'isoa?’” 2 Mukikulu atendile nzoka bunee: “Tunavwama kulia biguma bya miti z'isoa, 3 tondo ku biguma bya muti guli munkatini mw'isoa, Kalaga atendile bunee: ‘Tamulie biguma byago aba tamwitubye kugo, munavwa kukua.’” 4 Nzoka akwide mukikulu bunee: “Tamunakua! 5 Tondo Kalaga eizi buno busi bumukalia ku biguma bya wozo muti nti mwazibulwe meiso, nu inyuwe nti mwabe anga buli Kalaga kumenya bubi nu busoga.”
6 Gamonine mukikulu buno biguma bya wozo muti bili bisoga bya kulia nu byatananizia meiso nu kukasa menge, akolile ku biguma nu kubilia, nu akasile iba wage bimozi, nu abilide. 7 Mu nkungu zezo, meiso mabo mazibukile nu bamenyine buno beli mundulu. Bakulumizizie nsamba za muti wa mutini buno zibe nsulu za kukukila mundulu wabo.
8 Bongule ku iyuki lya Kalaga Yehowa gaatabangile mu isoa mwigolo, nu Adamu nu mukazi babisamine ku Kalaga Yehowa munkatini mwa miti z'isoa. 9 Kalaga Yehowa amanine Adamu nu amubuzizie bunee: “Kuni kuguli?” 10 Amwakwide bunee: “Nungule ku iyuki lyobe mu isoa, nu nakule boba, kubuno nili mundulu. Ububo nabisamine.”
11 Kalaga amubuzizie bunee: “Nazi wakubwide buno uli mundulu? Ndi walide ku biguma bya muti binakukakizizie buno ntulie kubyo?” 12 Adamu akwide bunee: “Mukikulu u wankasile buno nikale nage ankasile biguma bya wozo muti nu nalide.” 13 Kalaga Yehowa abwide mukikulu bunee: “Buni buwakitile?” Mukikulu akwide bunee: “Nzoka zannengelede, nu nalide.”
Kalaga asungia bantu.
14 Kalaga Yehowa abwide nzoka bunee: “Kubuno wakitile bubo waswililwa kutinga bituganwa binsania nu nyama insania za mu kisi. Ukendaga na nda zobe nu ukalia mukungu bindi byobe binsania. 15 Nu nne nabika musona gagusamba na mukikulu, nu gasamba ibuta lyobe nu lyage. Ibuta lyage likakubungula itoe, nu uwe ukamubanga ku kasindilo kage.”
16 Nu abwide mukikulu bunee: “Nakutalikila lubaba mu kubuta kwobe. Ku lubaba ukabuta bana, nu ntundo zobe zikaba ku iba wobe, nu we akakwangata.”
17 Abwide Adamu bunee: “Kubuno wungwilide iyuki lya mukazi wobe nu walide ku biguma bya muti gunakukakizizie buno ntulie kugo, ububo kisi kyaswililwa ku kabamba kobe. Ku mulimo mubibu ukamona idia lyobe. 18 ikele nu tunkomakoma tukakwasila mu isoa, nu ukaliaga bitembele by'isoa. 19 Ukalia idia lyobe ku kilungu kyobe aaba nu gokasubya munsi, kubuno u muwatukile, kubuno uli mukungu, nu ukasubya ku mukungu lingo.”
20 Adamu einikile mukazi wage Eva, kubuno eli nina wa bantu bansania. 21 Kalaga Yehowa akitide Adamu nu mukazi wage nsulu za kikoba, nu abavwalikizie zo.
Adamu nu Eva bapumbibwa mu isoa.
22 Nu Kalaga Yehowa atendile bunee: “Wono muntu eseli bumozi n'iswe, es'amenya bubi nu busoga. Anavwa kwenda nu kukola biguma bya muti wa kalamo nu kulia nu kulama kalamo kutanakuzinda.” 23 Ku kabamba kako Kalaga Yehowa amutikizye mu isoa lya Edeni, buno alime bilongo byatikizibwe mubyo. 24 Ububo apumbizie muntu, nu abikile makerubi ku lulenge lwa kuntata lw'isoa lya Edeni na mwene wa nganda wa keiya wakelimaga na ko na ko kulanga nzila za muti wa kalamo.