Kaina nu Abeli.
4
1 Adamu amenyine mukazi wage Eva, nu ekile iyimi. Abutile wamulume, nu atendile bunee: “Nakata mwana wamulume ku Kalaga Yehowa,” nu einikile mwana Kaina. 2 Nu Eva abutile lingo muto wage Abeli. Abeli abezaga mulangi wa mikoko, nu Kaina abezaga mulimi. 3 Kumbusa kwa bindi byingi Kaina avule na kayulo ka biguma ku Kalaga Yehowa. 4 Abeli avule na mwana wanona ku byana bitangi bya lusumba lwage, nu Kalaga Yehowa eitabizizie Abeli nu kisansa kyage, 5 tondo Kaina nteitabizizibwe aba nu kayulo kage. Kaina ongilwe nunse nu akandile malanga. 6 Yehowa abuzizie Kaina bunee: “Kubuni ukongoa nu kukanda malanga? 7 Ndi wakita busoga, nti witabizibwe. Ndi ntwakita busoga, nti bwagi bwasigala ku lwibi lwobe nu ntundo zage zakwangate. Tondo uwe, unabukinda.” 8 Kaina abwide muto wage Abeli bunee: “Twende mu isoa.” Gababezaga mu isoa, Kaina ayukide Abeli muto wage, nu amwitile.
9 Yehowa abuzizie Kaina bunee: “Kuni kuli Abeli muto wobe?”
Akwide bunee: “Nne nsizi. Nne, ndi nili mulangi wa muto wane?”
10 Nu Yehowa abuzizie bunee: “Buni buwakitile? Mikila za muto wobe zikulila kundi kutuka mu kisi. 11 Kano kaluma waswililwa mu kisi kyasula kanua kakyo kukata mikila za muto wobe ku maboko mobe. 12 Kungwa walima isoa talinakunagila aba kakeke. Ukaba mutini nu mutingitingi uteli na ga kwikala mu kisi.”
13 Kaina akwide Yehowa bunee: “Lusungio lwane luli luzitu lunsyavwame kweka. 14 Lebelebe wampumbia lelo mu kisi nu nabiswe bulazi nobe. Nabe mutini nu mutingitingi mu kisi, nu unsania ukammonako, nti anite.”
15 Yehowa amubwide bunee: “Ku kabamba kako unsania ukeita Kaina, Kaina akasubwa mambizi mutubakamo.” Nu Yehowa abikile kamenyikilo ku Kaina buno muntu unsania wamumonako ntamwite. 16 Kaina atukile lwabusio lwa Yehowa nu endile kwikala mu kisi kya Nodi ku lulenge lwa kuntata kwa Edeni.
17 Kaina amenyine mukazi wage, nu ekile iyimi nu abutile mwana. Obakile mwino nu agwinika n'izina lya mwana waabutile, izina lyage Enoke. 18 Enoke abutile mwana wamulume Iradi. Iradi abutile mwana wamulume Mehuyaeli. Mehuyaeli abutile mwana wamulume Metusaeli. Metusaeli abutile mwana wamulume Lameki. 19 Lameki asongile bakikulu babili. Izina lya mutangi lyabezaga Ada, nu lya wa babili lyabezaga Sila. 20 Ada abutile Yabali, u isi wa babo bakwikalaga mu numba za hema nu kulanga bituganwa. 21 Izina lya muto wage lyabezaga Yubali, nu we u isi wa babo bakututa nzenze nu bapili. 22 Sila nu we abutile mwana wamulume Tubali-Kaina. Abezaga mutumbi wa kutula bya kusesa bya nsubi nu bya kyuma. Izina lya mubitu wa Tubali-Kaina lyabezaga Nama.
23 Lameki abwide bakazi bage bunee:
“Ada nu Sila, ungwililazi iyuki lyane,
Inyuwe bakazi ba Lameki, ungwililazi bunkutenda.
Kubuno nitile muntu wansumitile,
mutoka wampundile.
24 Ndi Kaina akasubwa mambizi mutubakamo,
Nti Lameki mambizi makumi mutubakamo nu mutubakamo.”
Seti nu Enosi